Zhuda no no me
6
Nna namain,
shi uan nguë namsëdji ja pono da uan pekadu,
namsëdji ineñ shi ja sa nna nguë Spitu Nashiolo,
ja ska zhuda ëli ku uan fidu ja levu,
ku pa nguë tudu ja ska pinchidu,
pa ëli na ten pono da tentasan shimef.
2 Ja ska zhuda dantu namsëdji me ja gaga jalga,
pa amea se pa namsëdji ja kumpli alë Kilitu.
3 Shi uan nguë ja ska këlë fa ëli se mashi,
ku sa fa ëli na sa zhugan nguëf,
ëli ja ska ngaña tuludöguë dëli me.
4 Ta pa nguë tudu ja ska juzhga amea kutumu dëli,
se shi ëli ja paadji sinchi gavu,
pa sa fo tuludöguë dëli ku pa na sa fa ëli ja pia utu nguëf.
5 Pakë nguë tudu ske ta pa ja gaga jalga shi sa dji dëli.
6 Nguë shi a ja shina uan ja fo Fa Nashiolo,
ske ta pa ëli ja pachi klase gagavu dëli tudu ku meeth dëli.
7 Na ja ska ngaña namsëdji mef:
zhugan nguë na paadji li Nashianf.
Jö shi a ja shimian,
se a ten ja totolo.
8 Nguë shi ja shimian ja fo dishamentu fëfëiu döguë,
fo dishamentu fëfëiu döguë dëli se ëli ske totolo ja poto potodu.
Mandji se nguë shi ja shimian dantu Spitu,
fo Spitu se ëli ske totolo ja ku ske da ëli vida chindadji.
9 No na ja jansa ku fë nguë gavuf,
pakë shi no na ja pëndë añimuf,
ske da tempu shi ku no ske totolo.
10 Dajantu shi,
olatuvëdji shi ku no ja të fölöshö,
no ja ska fë nguë tudu gavu,
amea shi patadu mashi ku nna igui jonfa no.
Jabamentu manten Pelavöl
11 ¡Namsëdji ja pia amea shi amu ska skëvë da namsëdji ku öma amu ku latela ngangandji!
12 Nna nguë ineñ se ska fë namsëdji afoshi pa namsëdji kuta napai namsëdji iai,
ineñ ska fë shi valadji pa ineñ sa gavu ku nna nguë dëneñ moso valadji pa na ja pëtëpë ineñ dajantu kusu Kilituf.
13 Pakë se ñi nna nguë ineñ shi kutu napai dëneñ na tan ja kumpli ku jö ineñ shi alë ja faaf.
Mandji se ineñ ja ngongo pa namsëdji ja kuta napai namsëdji,
valadji pa ineñ se ja ma gloria dajantu ku ineñ fë namsëdji afoshi pa namsëdji sa ku malka se öguë namsëdji.
14 Se tëjantu ku amu,
pa amu na sa tave zhugan ja shif ku na sa kusu Shiölö no Djisukilituf.
Pakë tëjantu ku kusu Kilitu,
se mundu sa dadu pë kusu da amu se amu sa dadu pë kusu da mundu sai.
15 Pakë fo Kilitu Djisu,
se a na tan ja pia nna nguë ineñ shi sa kutadu napaif ñi nna nguë ineñ shi na sa kutadu napaif.
Jö shi moso ja pia sa fa a ja sa uan nguë novu.
16 Pa padji ku mindjikodji sa ku nna nguë ineñ shi tudu ja bibe basu fidu ja sai,
ineñ tudu sa pövu novu Nashian Israel.
17 Fo öseshi be deenchi amu na ngongo pa zhugan nguë fë pa amu të djiskatudjiaf,
pakë öguë amu sa ku malka shinali jö ineñ shi fonta amu dajantu ku amu sa zhuntadu ku Djisu.
18 Nna namain,
pa galasa Shiölö Djisukilitu sa liba spitu namsëdji.
Amen.