2 ¡Namsëdji tëndë amu!

Amu Pelavöl,

amu faa namsëdji fa,

shi namsëdji ja kuta nguë napai dji nguë,

Kilitu na ske shivi zhugan ja da namsëdjif.

3 Amu tan vlame da namsëdji lazhan gavu fa ja sa nguë shi a ja kuta napai dëli,

a ske fë ëli afoshi pa ëli fë ku alë tudu.

4 Se namsëdji,

nna nguë ineñ shi ngongo sa jönshidu shimafan nna nguë dëtu dajantu ku ineñ kumpli alë,

se ineñ safa fo Kilitu,

se ineñ pono fo galasa Nashiolo.

5 Mandji se no,

amea Spitu se no ten ja gada pa no gaga amea jonfa djustishi shi Nashian plomëtë no iai.

6 Pakë fo Kilitu Djisu,

se a na tan ja pia nna nguë ineñ shi sa kutadu napaif ñi nna nguë ineñ shi na sa kutadu napaif.

Jö shi moso ja pia sa jonfa shi ja fë amea ngongo.

7 Namsëdji bi ska jölë gavu.

¿Kë nguë fë namsëdji da topu pa na tan tëndë vedadjif?

8 Jamangandji sai na sa fo nguë shi sama namsëdjif.

9 ^*A ja faa:

«Uan fi levadura se ja fë ku ja tudu ja vla fë fumadu».

10 Se amu ja jonfa Shiölö fa namsëdji na ske sa ku utu mazhnamentu pataduf;

mandji se Nashian ske jatiga pöjödölö se ska ma namsëdji ba utu jamangandji patadu iai,

ja sa nguë shi ja sa.

11 Mandji se tëjantu ku amu,

nna namain amu,

shi ontolo amu ja ska pegua pa ja kuta nguë napai,

¿ja fë nna judio ontolo ska pëtëpë amu?

Pakë ja sa amea sai nova kusu Kilitu na ske ja da ineñ topuf.

12 Bi ske sa gavu pa nna nguë ineñ shi ja fë namsëdji da topu iai pa ja jaba shi kutu ineñ napai folo.

13 Namsëdji,

nna namain,

a sama namsëdji pa namsëdji sa legadu.

Mandji pa namsëdji na ja ma legadu sai pa namsëdji fë dishamentu fëfëiu döguë namsëdjif.

Shina pa namsëdji ja shivi uan nguë ku uan nguë ku ngongo.

14 Pakë alë tudu ja zhunta fë uan mandamentu soso:

«Ngongo ku pusumu bo shimafan tuludöguë bo».

15 Ja ska pinchidu,

pakë shi namsëdji ja ska munda namsëdji me ku pa namsëdji ja ska kumu uan nguë ku uan nguë,

ske da pa namsëdji ja të namsëdji me të fea fea.

16 Dajantu shi,

se amu faa:

Namsëdji ja bibe amea Spitu,

pa namsëdji na ja ska jua liguilia fëfëiuf döguë namsëdjif.

17 ^*Pakë dishamentu fëfëiu döguë tudu ja ska be fëiu tëjantu ku Spitu,

se Spitu ten ja be fëfëiu tëjantu ku dishamentu fëfëiu.

Se ineñ ja ska be fëiu ku ineñ ineñ me,

valadji pa no na ja ska fë jö ineñ shi ja da no vintadjif.

18 Mandji se shi Spitu se ja ska ma no bai,

tadashi se no na tan ske sa basu alëf.

19 Shipë shi se a ja bë jö ineñ shi nna nguë ineñ shi ja ska lë dishamentu fëfëiu:

ja nda ölöluia,

ja sunzhu sunzhu,

ku ja visio monchi,

20 se ineñ ja adola nna nashian balu,

se ineñ ja fë öfia,

ja ska fë guela,

se ineñ ja ska pezha,

ja të dishamentu ngandji fëfëiu da ja dji nguë,

ja fë ineñ ma pashian,

ineñ ja ska të pashian da ja tudu,

ja ska të tavadji,

ja ska baga nguë fë uachi uachi.

21 Se ineñ ja sa nna nguë ku ja të dishamentu ngandji fëfëiu da utu nguë,

nna bedadölö,

nna nguë nda ölöluia ku utu ja shimafan ineñ sai.

Amu ska pë namsëdji vatu,

amea shi amu bi bi faa namsëdji bebezha,

fa nna nguë ineñ shi ja ska fë amea jö ineñ sai na ske të pachi dantu gövöndölö Nashianf.

22 Mandji se,

fuluta ineñ shi Spitu ja da,

sa ngongo,

liguilia,

padji,

pashiensa,

nguë gavu,

fidu ja gavu,

jonfa,

23 nguë levu ku nguë ja sëbë domina tuludöguë dishamentu.

Na ja të zhugan alë ku ja tëjantu ku jö ineñ sef.

24 Se nna nguë ineñ shi ku sa nguë Kilitu Djisu,

ku da öguë pekadu dëneñ ku dishamentu ku mazhnamentu fëfëiu dëneñ pë kusu.

25 Se shi öseshi se no ska bibe amea Spitu,

no ten ja ska lega pa Spitu ten ja ma no bai.

26 No na ja sa nna nguë këlëdöguë nof,

ja ska shimian pashian dantu nna utu nguëfa,

ñi pa no na ja ska të pashian dantu no mef.