No na tan sa sëlëvaf shina nna mina
4
Mandji se a shime amu ten fa namsëdji:
Öshi ontolo nguë shi ske mdja ku gagavu tudu sa namina,
se ëli sa shimafan uan sëlëva,
benga zha pa ëli se sa shiölö ja tudu.
2 Se ja të nna pöjödölö ku ja ske fë lazhan dëli ku se ja sa mötölö liba ja dëli tudu,
ba toja djia shi tempu shi pai dëli ja pë pa sa.
3 Se sa amea shime ku ta no bi sa nna mina kichi kichi,
no bi sa sëlëva basu pödë spitu fëfëiu mundu sai.
4 Mandji se ta da tempu shi pa ja tudu kumpli,
se Nashian manda Mina dëli,
ku uan naamain se pali ëli,
basu alë Moises,
5 *valadji pa bi chila no fo basu alë sai ku pa da no dëtu shi sa ku dji nna mina Nashiolo.
6 Se dajantu ku no sa nna mina dëli,
se Nashian manda Spitu dji Mina dëli bi kusan no;
se Spitu ja faa:
«¡Abba!
¡Pai!».
7 Se fë,
ku bo na tan sa sëlëvafa,
shina nna mina;
se dajantu ku bo sa mina dëli,
se ten sa vintadji Nashiolo pa bo sa nguë shi ske sa shiölö gagavu dëli amea Kilitu.
Pelavöl ska pë jasa nna nguë galasia
8 Tudjia,
djia shi ontolo namsëdji na bi sa jönsë Nashianf,
se namsëdji bi sa sëlëva zhugan ja ku na bi ja sa nashian shishizhuf.
9 Mandji se öseshi se namsëdji ba jönsë Nashiolo,
ö pa faa gavu mashi,
se Nashian ba jönsë namsëdji,
¿a kë amea shi fo fë pa namsëdji tan ba vla basu nna spitu fëfëiu ku puvili ineñ se ku na ja të pödëf?
¿Namsëdji tan ngongo vla fë sëlëva dëneñ?
10 Namsëdji ja gada zhugan djia pa fë fesa,
zhugan mëdji,
tempu ku zhugan anu.
11 Amu ja ska mendu fa tabaia amu dantu namsëdji na ba shivi da zhugan jaf.
12 Nna namain kilidu,
amu luga namsëdji:
pa namsëdji ja sa shimafan amu,
pakë amu ten vla fë shimafan namsëdji.
Na ja sa fa namsëdji tuva amu ku zhugan jaf.
13 Amea shi namsëdji bi sëbë,
fa dajantu uan danchi döguë se amu pegua da namsëdji evanjelio fo jomesadu.
14 Se benga pa danchi döguë amu bi sa uan tempu ödu da namsëdji,
mandji se namsëdji na nozho amufa ñi na naga amuf,
shina namsëdji ma amu shimafan uan anzhu Nashiolo,
shimafan ja amu sa tuludöguë Kilitu Djisu.
15 ¿Kë ja shiga namsëdji ku liguilia shi bi sa ku namsëdji iai?
Amu ja da lazhan gavu pachi namsëdji,
amea shi namsëdji bi paadji chila öiö namsëdji pa da amu.
16 Se öseshi,
¿sa fa amu vla fë namigu namsëdji,
dajantu ku amu faa namsëdji vedadji?
17 Nna nguë ineñ se të vintadji pa ineñ sa ku namsëdji,
mandji se ineñ na sa ku shizhu gavuf.
Jö shi ineñ bi ngongo fë,
sa pa ineñ safa namsëdji fo no,
valadji pa namsëdji sa tave dëneñ moso.
18 Sa gavu pa ja të vintadji fë nguë gavu olatuvëdji,
ku na sa öshi amu ja sa plesteñi ku namsëdji mosof.
19 Nna mina amu;
amu tan ska vlame padësë dölö pali,
ba toja ta Kilitu tan ja sa dantu namsëdji.
20 Amu bi ngongo sa ku namsëdji öseshi valadji pa amu faa namsëdji ku uan fala patadu,
pakë amu na sëbë jö shi pa amu mazhna ku namsëdjif.
Jö shi ja msa Agar ku Sara
21 Namsëdji faa amu,
namsëdji ineñ shi ku ngongo sa basu alë:
¿Namsëdji na tëndë alë ua?
22 Pakë sa skividu faa Abraam bi sa ku nna mina dösu:
uan bi sa dji sëlëva,
se ëli shiki se bi sa dji tuludöguë miela dëli,
ku se a bi pali legadu.
23 A pali mina sëlëva amea shi na pöjödölö tudu ja fë,
mandji se a pali mina shi legadu valadji pa paadji kumpli jö shi Nashian bi plomëtë iai.
24 Jö sai sa ku uan sinchidu pa ja msa nguë kuzhu;
nna mooso dösu ineñ se ja msa bechi dösu:
uan sa dji iki Sinai,
ku sa i shi Agar ja sa,
ku se bi sa main nguë shi ta pa bi sa sëlëva.
25 Pakë Agar ja msa pachi iki Sinai,
ku ja ta Arabia,
ku se ja sa dji palea Jerusalen dödjai,
pakë zhuntadu ku nna mina dëli se ineñ ja bibe basu sëlëva.
26 Mandji se Jerusalen i shi dösë sa legadu,
se ëli se sa main no.
27 Pakë Fa Nashian faa:
«Të liguilia,
mooso ku na ja palif,
bo ku na të nna minaf,
ta kidëlë ku liguilia,
bo ku na jönsë dölö palif.
Pakë mooso shi a bi lega pë iai ske të nna mina mashi
ku mooso shi na të meduf».
28 Nna namain amu,
namsëdji sa shimafan Isaak:
namsëdji sa nna mina ineñ shi Nashian bi bi plomëtë iai.
29 Mandji se amea shi tempu baezha,
mina shi a pali amea dishamentu pöjödölö bi ska pëtëpë mina shi a pali amea Spitu,
se ten sa amea shime ku ska shiga öseshi.