Amea jonfa se a ja të Spitu
3
¡Nna nguë danadu tela galasia!
¿Kë nguë fë namsëdji öfia?
Fo ¿pegua no se no msa namsëdji bababa fa Djisukilitu se a da pë kusu ua?
2 Uan ja soso se amu ngongo sëbë fo namsëdji:
¿Namsëdji të Spitu fo fidu jö ineñ shi alë manda,
ö dajantu namsëdji tëndë nova jonfa shi gavu?
3 ¿Se sa amea shi namsëdji sa danadu?
Ku namsëdji bi jomesa fo dantu Spitu,
¿se öseshi se namsëdji ngongo ba jaba ku foshi pöjödölö?
4 ¿Se namsëdji padësë jö ineñ tudu shipë shi?
¡Benga zha pa amu na këlë fa sa ja shipë shif!
5 Nguë shi,
ku Nashian ja da namsëdji Spitu ku ja fë ja fumözhö fumözhö dantu namsëdji,
¿ëli ja fë da fidu ja alë ö ëli ja tëndë ku jonfa?
Zhampulu Abraam
6 *Se sa amea shi ku,
«Abraam këlë Nashiolo,
se dajantu shi se Nashian ma ëli shimafan nguë dëtu».
7 *Dajantu shi,
ske ta pa namsëdji sëbë fa,
nna nguë ineñ shi ja jonfa Nashiolo,
se sa nna nguë ineñ shi sa nna mina Abraam.
8 Se Fa Nashiolo,
ku bi sëbë fa tempu baezha fa Nashian ten ske fë ja dëtu amea jonfa nna nguë ineñ shi na sa judiof,
se ëli bi pegua djia baezha da nna nguë ineñ shi ja të jonfa,
uan nova gavu da Abraam:
«Dajantu bo se tela tela ske të besa».
9 Se amea se,
se nna nguë ineñ shi ja jonfa ske sa ku besa Abraam,
ku a shime ëli ten bi këlë.
10 Nna nguë ineñ shi ja pë jonfa dëneñ alë sa basu masan,
pakë Fa Nashian faa:
«Masan ske sa liba nguë shi na ja kumpli ntëlelele jö ineñ shi sa skividu dantu lavulu dalëf».
11 Mandji se,
sa dajantu alë fidu ja zhugan nguë na sa gavu deenchi Nashianf,
pakë:
«Nguë shi dëtu ske ja bibe amea jonfa».
12 Se alë na ja së fo jonfaf,
shina ja faa:
«Nguë shi ja fë jö ineñ sai ske bibe tëjantu ku ineñ».
13 Kilitu chila no fo basu masan dalë,
se masan no ba liba dëli,
pakë Fa Nashian faa:
«Masan ja sa ku nguë shi a ja pindja pë uan taaba».
14 Se sa amea shi fë valadji pa amea Kilitu Djisu,
besa shi a plomëtë Abraam iai ten ja ta ba da nna nguë ineñ shi na sa judiof,
ku valadji pa amea jonfa sai pa no të Spitu shi Nashian bi plomëtë iai.
Alë na ja të plomesa të bagaf
15 Nna namain amu,
amu ske pë namsëdji uan zhampulu:
Ta uan napai ja fë uan bechi,
öshi a ja ia öma pë bebezha,
zhugan nguë na paadji të tukafa ñi tan ia uan ja pë libaf.
16 Sa gavu öseshi;
Nashian fë plomesa ku Abraam ku minadjimina dëli.
Fa Nashian na faa «nna minadjiminaf»,
shimafan ja ëli ska faa ku uan sapa dji nguëf,
shina:
«da minadjimina bo»,
ku sa Kilitu.
17 Jö shi amu ngongo fala sa jö sai:
Nashian fë uan bechi ku Abraam,
se ëli ai öma dëli pë.
Dajantu shi,
alë Moises,
ku se bi sentu danu jatulu ku chirinta tashi mashi,
se a na bi ske të plomesa se të bagaf,
18 *pakë jö shi Nashian plomëtë pa ëli da no,
bi sa ja fo alë Moises,
na tan ske sa plomesaf,
mandji se jö shi Nashian plomëtë pa ëli da Abraam dödji limpi pepepe iai.
19 Tadashi,
¿a kë ja alë shivi da?
Sa ja a bi da,
pa msa pekadu nna pöjödölö,
ba toja pa tan bi nna minadjimina shi ku a fë plomesa se da,
ku sa ja a da amea nna anzhu odji,
ku amea uan nguë ku sa metadji nna nguë tudu.
20 Se nguë shi sa metadji nna nguë na sa uan ponodu nguë sosof,
mandji se Nashian sa uan ponodu soso.
Djisu pë jabamentu ku alë
21 Tadashi,
¿alë ja da fëiu plomesa Nashiolo?
¡Zhugan limedji shif!,
pakë shi alë ja paadji da vida,
se sa öshi djustishi ske sa alë.
22 Mandji se Fa Nashiolo fa nna nguë tudu sa djili basu pekadu,
valadji pa amea jonfa Djisukilitu se a ja da ineñ jö shi a bi plomëtë nna nguë ineñ ja këlë.
23 Anta pa jonfa bi,
alë bi sua no pë djili,
ja gada pa jonfa shi vla fë jönshidu.
24 Se amea sai se alë bi sa jö shi bi ska gada no,
ku pa ëli ma no ba da Kilitu,
valadji pa no ja paadji sa dëtu amea jonfa.
25 Mandji se öseshi ku jonfa bi iai,
se no na tan sa sëlëva alëf,
26 pakë dajantu jonfa Kilitu Djisu se namsëdji tudu sa nna mina Nashiolo,
27 pakë ta no ja zhunta ku Kilitu ku bachizha,
se no ten ja bishi ku bitidu Kilitu.
28 Se na tan të tave fa a sa judio ñi griegof,
ñi sëlëva ñi legaduf;
ñi napai ñi naamainf,
pakë namsëdji tudu sa uan soso ku Kilitu Djisu.
29 *Se shi namsëdji ja sa dji Kilitu,
tadashi namsëdji ten sa nna minadjimina Abraam ku se sa nna mina ineñ shi ske të plomesa ineñ shi Nashian bi fë da ëli iai.