Dantu jaata sai se Pelavöl skëvë da kitan loso loso Galasia se a ba jönsë shimafan jaata shi legadu da nna kitan. Dantu vadji pegua dëli shi fë dösu, se Pelavöl bi da nova gavu sai tëjantu ku Djisukilitu pachi loso loso ineñ sai (Fidk 16:6).

Uan sapa nna nguë galasia na bi jönsë Shiölö Djisu shimafan Savadölöf. Mandji se bi loso loso ineñ sai utu nna judio ku sa kitan, ku bi ska shina nna kitan galasia fa, benga pa ineñ ja këlë Djisu, ta pa ineñ ten ja kumpli ku mandamentu Moises (1:6-9). Dajantu shi se Pelavöl bi ska faa ineñ kuzhu, pakë nna nguë galasia bi sa shimafan nna nguë ku na ja tëndë shina ja ineñ shi ëli bi shina ineñf (3:1-5).

Pelavöl ja da nna nguë galasia kumi nova gavu tëjantu ku Djisukilitu, ja ska shina ineñ uan fi ja fo bechi Nashiolo ku Abraam. Se ëli ja fë ineñ bë fa alë sa ja gavu se na ja be patadu ku jonfa Djisukilituf (3:21), shina ja sa shimafan uan meeth ku ja ma ineñ ba jonfa shi no ja të ku Djisukilitu (3:24). Dantu vida jonfa sai, no tudu sa uan soso, shinke a ja pia fa no sa judio ö griego, sëlëva ö legadu, napai ö naamain (3:28). Dajantu shi, se fë ku na ja sa afoshi pa ja kumpli ku jö ineñ shi alë ja faaf.

Mandji se ja da Pelavöl ötëndë fa legadu sai a ja paadji tëndë amea shi fëiu. Dajantu shi se ëli ja da ineñ lazhan gavu pa ineñ na ja paadji usa ëli shimafan ja pa ja ma fë ja fëfëiuf (5:13), shina pa ja lega pa Spitu Nashiolo ja ma ineñ ba fë fidu kuzhu amea shi a ja ska gada pa ineñ ja fë. Se ta ëli msa jö ineñ shi ske ta pa uan kitan shishizhu ja fë (5:22-24), Pelavöl ja faa: Shi Spitu ja tuka amea shi no ja bibe, ske ta pa no ja tëndë ja dëli tudu (5:25).