Pelavöl ska da jabamentu shizhu
13
Ope sai se fë ope shi fë tëishi ku amu ba ua namsëdji.
«Jö ineñ se tudu a ske jözhë pë amea lazhan gavu nna nguë dösu ö nna nguë tëishi».
2 Amu bi da nna nguë ineñ shi ja ska fë pekadu lazhan bebezha ta amu bi sa ala djia shi amu bi ba ua namsëdji ope shi fë dösu.
Öseshi se amu tan ska vlame faa ineñ ku utu nna nguë,
amea shi amu bi fë tudjia,
fa amu na ske të mindjikodji ta amu tan ske bi bif.
3 Amu ske msa namsëdji jö ineñ shi namsëdji ngongo bë fa Kilitu ja faa fala amea amu.
Kilitu na sa nguë levu ta ëli ja ska tabaia ku namsëdjif,
shina ëli ja msa pödë dëli dantu namsëdji.
4 Se benga zha pa djia shi a da ëli pë kusu ëli bi sa levu,
mandji se öseshi se ëli ja bibe amea pödë Nashiolo.
Se a shime no ten ja sa nna nguë levu,
shimafan amea shi ëli ten bi sa,
mandji se no ske bibe ku ëli amea pödë Nashiolo da namsëdji.
5 Namsëdji ja golo tuludöguë namsëdji me pa sëbë shime jonfa namsëdji sa dji shishizhu.
Ja ska puva tuludöguë namsëdji me.
¿Na ja da namsëdji ötëndë fa Djisukilitu sa dantu namsëdji ua?,
se shi na ja sa shif,
namsëdji na golo tuludöguë namsëdji ku jonfa shishizhuf.
6 Amu ska gada fa namsëdji ske jönsë fa no na pëndë pödë shi sa ku no fo nna apostolf.
7 Se no ja pindji Nashiolo pa namsëdji na ja fë zhugan ja fëiuf,
na ja sa pa ja faa aen da nof,
shina valadji pa namsëdji ja fë ja gavu,
benga zha pa no ja sa shimafan ja a na faa aen da nof.
8 No na paadji fë zhugan ja tëjantu ku vedadjif,
shina ta pa no ja pezha da vedadji.
9 Dajantu shi se no ja sa ku liguilia ta no ja sa nna nguë levu se namsëdji ja sa ödu;
se no ja lezha da Nashiolo valadji pa ja fë namsëdji ödu mashi.
10 Dajantu shi se amu ska skëvë jö ineñ se tudu anta pa amu ba ua namsëdji,
valadji pa ta amu ja bai pa amu na ja sa ödu ja usa pödë amuf,
ku se Shiölö da amu pa fë pa ja zhuda namsëdji të foshi,
ku na ja sa pa të namsëdji të fea feaf.
Jabamentu manten
11 Nna namain kilidu amu,
amu ska jaba jaata sai ku jabamentu fala ineñ sai:
namsëdji ja sa ku liguilia.
Ja ska jua ja pa ja zhuda namsëdji këësë.
Ja ska da namsëdji añimu uan nguë ku uan nguë.
Ja bibe ku padji ku liguilia.
Tadashi se Nashian shi ngongo ku no ku ja da no padji ske sa ku namsëdji.
12 Namsëdji ja da uan nguë ku utu nguë manten ku uan beso santu.
13 Pövu santu Nashiolo ineñ shi ja ta iai tudu da manten bi da namsëdji.
14 Pa galasa Shiölö Djisukilitu,
ngongo Nashiolo zhuntadu ku Spitu Santu ja sa ku namsëdji tudu.