Suian Pelavöl ku pian dumadu jañi döguë dëli
12
Ta pa amu fë uan kuzhu pakë këlëdöguë amu na ske shivi da zhugan jaf,
mandji se ske ta pa amu ja ska be ku deenchi.
Mandji se amu ske da lazhan ja tëjantu ku suian ku jö ineñ shi Shiölö ja msa amu.
2 Amu jönsë uan balë Kilitu ku fo uan deshi danu ku jatulu se a ma ëli ba ösë shi ja fë tëishi.
Amu na sëbë shime shi a ma ëli ba ala ku öguë dëlifa ö ku spituf;
Nashian moso se sëbë.
3 Mandji se amu sëbë fa masebu sai (amu na sëbë shime fo öguëfa ö fo pachi döguëf;
Nashian moso se sëbë)
4 se a ma ëli ba dantu paraiso se ëli tëndë kuzhu ku a na ja lega pa nna pöjödölö ja paadji faaf.
5 Se fo masebu sai se amu ske ma gloria;
mandji se fo tuludöguë amu fo zhugan ja amu na ske ma gloriaf,
shina fo ja levu levu döguë amu.
6 Se shi amu ja ngongo da öguë gloria na ske sa ja danaduf,
pakë amu ske ja da fala shishizhu,
mandji se amu na ske fëf,
pakë amu na ngongo pa zhugan nguë na ja mazhna fo amu mashi ku jö shi a ja bë fo vida amufa ö ja tëndë fo nova amuf.
7 Se valadji pa amu na vla fë uan nguë këlëdöguë dëli amea shin mindjida,
dajantu suian ngangandji ineñ sai,
dajantu shi,
se a da duma amu ku uan pian pë jañi döguë amu,
uan nguë ku Satanas manda valadji pa bi tomenta amu ku pa na lega amu pa amu tan vlame këlëdöguë amuf.
8 Se ope tëishi se amu ja pindji Shiölö pa ëli chila fo amu;
9 se olatuvëdji se ëli ja faa amu:
«Galasa amu se sa jö shi moso fë bo fata;
pödë amu se ja fë fidu ja gavu mashi dantu öguë levu».
Se fë ku öseshi amu ja ma liguilia ku gloria da ta amu ja sa levu,
valadji pa pödë Kilitu paadji tabaia amea amu.
10 Se fë dajantu shi se amu ja të liguilia dantu levu levu döguë amu tudu,
ku suta tudu,
ku dishamentu tudu,
ku pëtëpë nguë,
ku mavida se amu ja ma dajantu Kilitu.
Pakë ta amu ja sa ku öguë levu,
tadashi se sa öshi amu ja sa ödu.
Pelavöl sa tave nna nguë guëzha Korinto
11 Amu ja fë ja uan nguë danadu ta amu ja da öguë amu pa ja zhuda namsëdji këësë amea shi amu fë.
Pakë namsëdji bi ta pa ja ska faa ja gagavu tëjantu ku amu,
pakë amu na se kichi mashi ku zhugan nna nguë ineñ shi sa nna «apostol ngangandji»,
benga zha pa amu na sa zhugan jaf.
12 Ta amu bi sa dantu namsëdji iai amu msa namsëdji shinali jö ineñ shi fë pa amu sa apostol:
Pakë ku pashiensa se amu fë uan sapa shinali,
ja fumözhö fumözhö ku fidu ja ngangandji fo Nashiolo dantu namsëdji.
13 Ponodu jö shi moso amu na fëf,
ku sa ja amu ja fë utu guëzha guëzha,
sa ta amu ja vla fë jalga da namsëdji.
Anta pulusensa,
¿namsëdji ja paadji pada amu dajantu fata sai?
14 Öseshi se fë ope shi fë tëishi ku amu ska fë vadu pa amu ba ua namsëdji,
mandji se amu na ske sa uan jalgaf.
Pakë amu na ska jua jö ineñ shi sa ku namsëdjif,
shina tuludöguë namsëdji,
pakë na ja sa nna namina se ja gada ja pa fë lazhan nna pai dëneñf,
shina nna pai se ja fë da nna namina dëneñ.
15 Ku vintadji se amu ske jaba ku öguë amu dajantu namsëdji ku a shime jö ineñ shi sa ku amu tudu,
benga zha pa öshi amu ja ngongo ku namsëdji mashi,
se namsëdji na tan ja ska ngongo ku amu mashif.
16 Zhugan namsëdji ja faa amu na bi sa jalga da namsëdjif,
mandji se ontolo utu namsëdji ja ska mazhna fa amu bi sa ku öiö djidjidu se amu ma fölöshö pa amu ja ngaña namsëdji.
17 ¿Mandji kë ja fë?
¿Sa fa zhugan nna napai ineñ shi amu da bi da namsëdji iai ngaña namsëdji?
18 Ta amu pindji Titö pa ëli ba ua namsëdji iai ku amu ten da uan namain be ku ëli iai,
¿sa fa Titö ngaña namsëdji?
¡Na!,
pakë no tudu sa ku spitu shime se no ja nda liba san jadji dope dji nguë shiki se no ja fë ja tudu amea shime.
19 Jativie namsëdji ja ska mazhna fa no ska faa jö ineñ se valadji pa no sa gavu deenchi namsëdji.
Na,
no ja faa jö sai shimafan nna shividölö Kilitu ku no sa deenchi Nashiolo.
Jö ineñ shi no ja fë tudu,
nna namain kilidu amu,
sa pa ja zhuda fë namsëdji të foshi.
20 Pakë amu ska mendu fa,
ta amu ja bai iai,
na ske fë gavu da amu jö shi amu ske bëf,
se na ten ske fë gavu da namsëdji amea jö shi amu ske fëf.
Amu ska mendu fa amu ske dajonta ku pezha,
ku dishamentu ngandji fëfëiu,
leva kuzhu,
lo nguë mali,
faa nguë kuzhu,
këlëdöguë dji nguë ku fë ja fëfëiu.
21 Se amea sai,
se amu ska mendu fa,
ta amu tan ja vlame ba ua namsëdji iai,
se Nashian ske ja fë pa amu pasa govan deenchi namsëdji.
Se amu ske sa modoia pakë uan sapa namsëdji na sa lega pekadu tudjia shi namsëdji bi ska fë ief.
Namsëdji na tan vla ku ope tashi da ja nozhodu nozhodufa,
ja fë ja nda ölöluiafa ñi fo visio dishamentu fëfëiu ku ja gödö da jö ineñ shi namsëdji bi ska fëf.