Nna apostol fanchila
11
Bi ske sa gavu pa namsëdji gaga ja «dana danadu» amu mashi.
Shiën,
ja gaga amu.
2 Pakë amu sa ku dishamentu ngandji ku namsëdji ku dishamentu ngandji shi ja fo Nashiolo;
pakë amu plomëtë namsëdji uan ponodu medu ku se sa Kilitu,
valadji pa amu msa namsëdji shimafan uan vidjin limpi.
3 Mandji se amu ja ska mendu fa amea sai,
se mazhnamentu namsëdji ku Kilitu na tan ja sa limpifa ñi ntëluf,
shina nozhodu shimafan ta jobolomatu ngaña Iëva ja fë ëli danadu.
4 Namsëdji ja gaga ku vintadji ja sa jö shi utu nguë ja faa namsëdji,
benga zha pa ineñ ja pegua da namsëdji uan Djisu patadu fo i shi ku no bi pegua da namsëdji iai ö uan spitu patadu fo i shi namsëdji bi ma iai ö uan evanjelio patadu fo i shi namsëdji bi bi këlë iai.
5 Mandji se zhugan limedji shi amu na ja pia öguë amu basu mashi ku nna «apostol ngangandji» ineñ se ku ja ska shina klase jö ineñ sef.
6 Amu paadji na sa uan peguadölö supetuf,
mandji se na ja fata amu tëndëmentuf.
Jö se sa uan ja ku no msa namsëdji gavu ntëlelele amea shi no paadji tudu.
7 ¿Amu bi fë uan pekadu ta amu bi kichi öguë amu valadji pa namsëdji sa lantadu ba van,
dajantu ku amu pegua evanjelio Nashian da namsëdji dödji limpi pepepe?
8 Amu «chila» fo utu guëzha guëzha öshi amu ma djiëlu valadji pa amu shivi namsëdji shinke kuta namsëdji zhugan kuzhu.
9 *Se ta amu bi ja ta dantu namsëdji ku amu na bi të batanchi pa amu bibef,
amu na bi sa jalga da zhugan nguëf.
Pakë nna namain bi bi fo loso loso Masedonia,
se ineñ ma jö ineñ shi bi fë amu fata tudu.
Zhugan djia amu na sa jalga da namsëdji ie zhafa se amu na ske saf.
10 Sa vedadji shimafan ta vedadji Kilitu sa ku amu,
zhugan nguë dantu loso loso Akaia na ske pë amu öpa pa amu na ja sa ku këlëdöguë amu da jö sef.
11 ¿Pakë?
¿Dajantu ku amu na ngongo ku namsëdjifa?
Nashian sëbë fa amu ngongo ku namsëdji monchi.
12 Mandji se amu ske be deenchi ja fë jö shi amu ja fë olatuvëdji.
Se jö sai ske chila shizhu nna nguë ineñ shi ja nda ja jua fölöshö jamian pa ineñ ja këlë fa tabaia dëneñ sa shimafan dji no.
13 Nna nguë ineñ se sa nna apostol fanchila.
Ineñ sa nna tabaiadölö ku ja ska ngaña nguë,
se ineñ ja ska bishi shimafan nna apostol Kilitu.
14 ¡Mandji se jö sai na ja së amu tukadu zhugan jaf!,
pakë ba toja Satanas ten ja bishi shimafan uan anzhu fögö djidjidu.
15 Se amea sai zhugan jö ineñ se na ja së amu tukaduf fa nna nguë ineñ shi ja shivi ëli ten ske ja bishi shimafan nna shividölö djustishi.
Se ta ske da jabamentu,
se ineñ ske ma jatigu shi ku fidu ja fëfëiu dëneñ ske mësë.
Suflimentu Pelavöl
16 Amu tan vlame fala,
namsëdji na ja mazhna fa amu sa danadu pakë amu ja faa fala amea sef;
mandji se benga zha pa namsëdji ja mazhna amea sai,
tëndë amu,
amea shi a ja fë ku uan pöjödölö danadu,
valadji pa amu ten ja këlëdöguë amu uan fi kuzhu.
17 Se ta amu ja këlëdöguë amu ku jonfadu,
se amu na ja faa fala amea shi Shiölö ngongof,
shina amu ja fë ja shimafan uan nguë danadu.
18 Se öshi uan sapa dji nguë ja ska këlëdöguë dëneñ da ja gagavu mundu sai,
amu ten ske fë.
19 Se namsëdji ja sa sëbëdölö,
mandji se namsëdji ja ska gaga nna nguë dana danadu ku vintadji.
20 Namsëdji ja ska gaga ta a ja ska fë namsëdji sëlëva,
a ja chila jö ineñ shi ja sa ku namsëdji fo namsëdji tudu,
se a ja ska ngaña namsëdji ku ja tudu,
se a ja pia namsëdji basu ö se a ja da namsëdji ku butada.
21 Benga zha pa ja da amu govan pa amu ja fala,
no bi sa «levu» muntë valadji pa no fë jö ineñ shime.
Mandji se ja sa jö shi fë ku ineñ ja ska këlëdöguë dëneñ amu tan ska vlame faa fala shimafan uan nguë danadu amu ten ske ma tividu pa amu ten këlëdöguë amu.
22 ¿Ineñ sa ebreo?
A shime amu ten sa.
¿Ineñ sa nna nguë Israel?
A shime amu ten sa.
¿Ineñ tudu sa nna minadjimina Abraam?
A shime amu ten sa.
23 *¿Ineñ sa shividölö Kilitu?
Amu sëbë fa amu ska faa ja shimafan uan nguë ku ska dana,
¡mandji se amu se shivi ëli mashi!
Amu se tabaia ku foshi mashi,
se a mëtë amu pë djili libadë libadë,
se a da amu ku valasöchi uan sapa ope ku a na ja paadji jontaf,
se amu dajonta ku mölë uan sapa ope.
24 Ope shinku dantu tempu pata patadu,
se nna jasa jasa nna judio da amu ku chirinta ku novu valasöchi.
25 *Se ope tëishi se ineñ da amu ku valasöchi.
Uan ope se a da amu ku budu.
Ope tëishi se amu pëndë pë mete domali.
Uan djia amu pasa uan nöchi se ta da amaian shi se amu bi pëndë pë mete domali.
26 *Amu bi fë uan sapa vadji löngö löngö.
Se amu bi sa pepe mölë lome lubela ku a shime fo öma nna bandjidu.
Se amu ten bi sa pepe mölë fo pachi tuludöguë pövu tela amu,
nna judio,
a shime ku nna nguë ineñ shi na sa judiof.
Amu dajonta ku pepe mölë dantu palea,
dantu jamian sölö sölö ku liba domali.
Se amu ten bi sa pepe mölë ku nna napai ku ja faa ineñ sa nna namain,
mandji ku ineñ na ja saf.
27 Amu tabaia ku foshi dantu uan sapa tempu se amu pasa uan sapa nöchi shin djuni.
Se amu pasa faku ku fomu daua.
Se fiiu mata amu,
shinke amu të bitidu batanchi pa amu kubili öguë amu.
28 Se na sa dajantu jö ineñ se mosof,
djia tudu amu ja gaga tavadji dajantu guëzha guëzha tudu.
29 ¿Kë nguë ja danchi,
se amu se na ja danchif?
¿Kë nguë tan ja da topu shinke amu na ja sinchi fëiufa ku pashianf?
30 Shi ja të uan kuzhu pa amu ja këlëdöguë amu,
amu ske ja këlëdöguë dantu levu shi ku amu sa.
31 Se Nashiolo,
Pai Shiölö no Djisu,
ku se sa ku besa pa sempele,
sëbë fa amu na ska da fanchilaf.
32 *Ta amu bi sa Damasko,
gövöndölö shi bi sa basu alë Aretas bi pë nna guada böjö poto palea pa të amu.
33 Mandji se bi ta pa da amu ba basu fo dantu uan ojali ja pasa fo uan zhnali ögö budu,
se amea sai se amu paadji jölë fo öma dëli.