Pelavöl ska pezha da pödë dëli
10
Amu,
Pelavöl,
amu luga namsëdji,
dajantu levu shi ku kusan gavu Kilitu,
se amea shi a ja faa tëjantu ku amu sa fa amu sa uan nguë ja mendu nguë deenchi namsëdji,
mandji se amu ja sa valëntë ta amu ja sa jamian löndji.
2 Amu ska luga namsëdji pa ta amu ja bai pa amu na ten sa tividu amea shi amu mazhna pa amu sa ku zhugan nguëf ku ja sa ku mazhnamentu fa no ja bibe amea fidu ja nna pöjödölö.
3 Benga pa no ja nda amea nna pöjödölö,
no na ja ska pezha shimafan amea shi nna pöjödölö mundu se ja ska fëf.
4 Pakë pingada ineñ shi no ja ma pezha na ja sa dji munduf,
shina ineñ ja sa ku pödë amea Nashiolo,
pa no ja të foshi fanchila të fea fea.
5 No ja të klase këlëdöguë dji nguë ku na ja lega pa ja jönsë Nashianf të lolo.
Se öma no ja kë mazhnamentu nna subebu,
se no ja shina nna pöjödölö pa ja tëndë Kilitu,
6 se no sa vadu pë pa jatiga klase fidu ja nna nguë ineñ shi na ja tëndë nguëf öshi moso ku amu ja paadji jonta ku ta namsëdji ja tëndë ntëlelele.
7 Ja ska pia jö ineñ shi a ja bë.
Shi uan nguë ja faa ëli sa suguladu dantu döguë dëli ku se sa dji Kilitu,
jö sai ëli ten ja mazhna ku dantu döguë dëli me,
pakë amea shi ëli sa dji Kilitu,
se ten sa amea shime ku no ten sa dji Kilitu.
8 Amu na ske sa ku govan pa amu ja këlëdöguë da pödë no mashi ku jö shi saf,
pödë ku Shiölö se da no valadji pa no ja të foshi pa na ja sa pa no ja të namsëdji të fea feaf.
9 Amu na ngongo pa namsëdji ja mazhna fa amu ngongo mëtë mendu pë namsëdji amea jaata amuf.
10 Pakë zhugan nguë ja ska faa:
«Jaata Pelavöl tudu ja sa jaata ödu ödu ku pizhadu,
¡mandji se tuludöguë ëli sa uan pöjödölö lolodu se fala dëli na ja shivi da zhugan jaf!».
11 Se nna pöjödölö ineñ se ta pa ja da ineñ öiö tëndë fa fidu ja no,
ta tuludöguë no ske bi,
se ske të pödë shime shimafan jö ineñ shi no ja ska faa dantu jaata no,
ku tudu ja së fo jamian löndji.
12 Pakë no na ja tividu pa no ja da no lazhan no me ñi pa no ja pia öguë ku zhugan nguë ku ja alaba öguë dëneñ mef,
mandji se ineñ,
ja mindji tuludöguë dëneñ me ja pia öguë dëneñ me,
ineñ na ja sëbë jö shi ineñ ska fëf.
13 Mandji se no na ja da öguë no gloria liba mashif,
shina amea shi ku Nashiolo pë mindjida dëli ku ëli da no,
valadji pa ba da namsëdji.
14 No na ja pasa ubulu ta no ja faa no të pödë liba namsëdjif,
shimafan ja no ba ua namsëdji.
Pakë no se sa nna pimëlu pimëlu nguë ba vadji ba toja Korinto ku evanjelio Kilitu.
15 Se no na ten ja ma gloria tabaia utu dji nguë fëf.
Mandji se,
no ja ska gada pa jonfa namsëdji ja këësë,
valadji pa tan ja bai deenchi mashi ku ubulu shi no ja tabaia dantu namsëdji.
16 Tadashi se no ske paadji ba pegua evanjelio utu jamian löndji löndji fo namsëdji,
jamian ku zhugan nguë na ska tabaia ie zhaf.
Se amea sai se zhugan nguë na ske mazhna fa no ja zhuda namsëdji këësë da tabaia shi no ska fë dantu jamian utu dji nguë fëf.
17 Gavu mashi:
«Shi uan nguë ske ja të gloria,
pa ëli ja të gloria fo Shiölö».
18 Pakë a na ja da aen da nguë ja da gavu da tuludöguë ëli mef,
shina nguë ku Shiölö me se ja da aen.