Zhuda nna namain Jerusalen
9
Na fë fata pa amu tan skëvë da namsëdji tëjantu ku sulvisu ma djiëlu pa zhuda nna namain no ineñ shi ja ta Jerusalenf.
2 Pakë amu jönsë dishamentu gavu shi sa ku namsëdji,
se amu bi sa ku këlëdöguë dajantu namsëdji dantu guëzha guëzha loso loso Masedonia,
fa namsëdji nna nguë Akaia anu pasadu namsëdji bi ngongo da uan djiëlu bai.
Se dajantu amea dishamentu ngandji shi sa ku namsëdji se fë ku uan sapa nguë ma añimu se ineñ jomesa ja da djiëlu.
3 Mandji se amu ska da nna namain ineñ sai bi da namsëdji,
valadji pa jö sai na ba së shipë shif da këlëdöguë no dajantu namsëdji,
shina pa namsëdji ja sa vadu pë,
amea shi amu bi faa namsëdji bi ske sa bebezha iai.
4 Ske sa uan govan da no,
na tan sa i shi ske sa da namsëdjif,
shi zhugan nna namain Masedonia ja bi ku amu,
se ëli ske bë fa namsëdji na fë vadu pa ëli da jö ineñ shi amu bi faa namsëdji bebezha ief.
5 Se sa amea shi amu luga da nna namain ineñ se bi pimëlu,
valadji pa amu sa suguladu fa namsëdji sa ku djiëlu shi namsëdji bi plomëtë iai,
mandji se amu ngongo pa sa uan djiëlu ku vintadji namsëdji,
pa na ja sa jasuf.
6 Namsëdji ja lambela jö sai:
Nguë shi ja shimian uan fi kuzhu,
ëli ten ske totolo uan fi kuzhu.
Mandji se nguë shi ja shimian monchi,
ëli ten ske totolo monchi.
7 Ta pa unian unian nguë ja da amea shi kusan dëli faa pa ëli ja da,
pa ëli na ja da ku kusan fëiufa ñi pa ja fë nguë afoshif,
«pakë Nashian ja ngongo ku nguë shi ja da kuzhu ku liguilia».
8 Se Nashian ske da namsëdji galasa dëli batanchi,
amea shi pa olatuvëdji,
ola tudu,
pa namsëdji ja të jö ineñ shi ja fë namsëdji fata,
pa fidu ja gavu ja sa batanchi dantu namsëdji.
9 Amea shi fa Nashian ja faa:
«Ëli pachi gagavu dëli tudu ja da nna puvili;
se djustishi dëli ja sa pa sempele».
10 Pakë nguë shi ja da shimadölö shimenchi,
zha se ëli ja da ëli ampan pa ëli kumu,
se ëli ske ja da namsëdji shimenchi matu batanchi,
se ëli ske fë pa ja pali da namsëdji,
pa namsëdji ja totolo fuluta djustishi batanchi.
11 Se amea sai se namsëdji ske ja të klase gagavu tudu pa namsëdji ja paadji da utu nguë ku öma betu.
Pa djiëlu shi namsëdji ja da ba da ineñ amea no iai,
se ja fë pa nna namain ja da Nashian dezhupaga.
12 Pakë fidu ja sulvisu sai,
na sa pa ja da nna santu santu jö ineñ ja fë ineñ fata mosofa,
shina a shime pa ten ja sa ku uan sapa fidu ja galasa batanchi da Nashiolo.
13 Se dajantu fidu ja sulvisu namsëdji,
se ineñ ske da Nashian gloria.
Pakë öma betu namsëdji ku ineñ a shime ku utu nna namain tudu ske ja msa fa namsëdji ja tëndë evanjelio Kilitu.
14 Se amea shime dantu lezha dëneñ da namsëdji,
ku se ineñ ja ngongo ku ineñ dajantu galasa batanchi shi ku ja fo Nashiolo da namsëdji.
15 ¡Dezhupaga da Nashiolo dajantu gagavu fumözhö dëli,
ku a na ja paadji msa ku palavuluf!