3 Pakë amu ja paadji da lazhan gavu ja da fala shishizhu fa ineñ na da jö shi ineñ paadji mosofa,

shina ineñ ja da uan sapa mashi fo foshi dëneñ.

Ku sa ja ineñ fë ku vintadji dëneñ.

4 Ineñ luga no uan sapa ope fa pa no ten da ineñ ondolo pa ineñ ten da pachi zhuda shi ku a ske da nna nguë pövu santu.

5 Ku ba toja ku ineñ fë mashi ku jö shi no bi ska gada,

pakë pimëlu jö shi ineñ fë,

bi sa da Shiölö ku no ku tuludöguë dëneñ,

amea shi Nashian bi ngongo.

6 Se fë ku no pindji Titö ku se bi shina namsëdji pa jomesa ja da,

pa ëli tan vlame ba toja namsëdji ku pa da namsëdji añimu pa ma fidu ja gagavu ba deenchi.

7 Tadashi ku namsëdji ja sa deenchi amea fë ja tudu:

dantu jonfa,

lezha ku fala gagavu,

ku tëndëmentu,

ku cheche,

ku ngongo namsëdji ku no,

pa ngongo namsëdji ku no ten ja sa deenchi ku dantu galasa sai ku da nguë kuzhu.

8 Amu na ska da namsëdji odjif,

shina sa valadji pa amu ja puva namsëdji,

amea shi utu nguë ja sa cheche,

ku a shime ngongo shishizhu shi ja sa ku namsëdji.

9 Namsëdji jönsë galasa da nguë kuzhu shi sa ku Shiölö Djisukilitu,

ku dantu gavu dëli se ëli vla fë puvili dajantu namsëdji,

valadji pa dajantu amea puvili dëli pa namsëdji vla fë liku.

10 Shizhu sai se amu ske da namsëdji:

ske sa gavu pa namsëdji jaba jö shi namsëdji bi jomesa dantu anu se iai.

Anu pasadu,

namsëdji se bi sa nna nguë pimëlu pimëlu ku bi ngongo da,

se namsëdji se bi jomesa ja da pimëlu.

11 Öseshi namsëdji ske ta pa jaba jö shi namsëdji bi jomesa.

Pa vintadji shi bi sa ku namsëdji fo jomesadu iai ten ja sa i shime ku sa ku namsëdji öseshi pa ja da nguë kuzhu.

Ja da nguë kuzhu amea jö ineñ shi sa ku namsëdji.

12 Pakë jö ineñ shi namsëdji ja da tudu a ja ma gavu shi namsëdji ja da ku liguilia.

Ja da amea jö shi ja sa ku namsëdji,

na ja da jö ineñ shi na sa ku namsëdjif.

13 Amu na ngongo faa pa jö ineñ shi namsëdji ja da nguë pa ja fë ineñ vida levu da utu nna nguë ku ödu mashi da namsëdjif.

Amu ngongo pa ja sa jö shime.

14 Öseshi namsëdji të batanchi se namsëdji ja paadji zhuda nna nguë ineñ shi sa ku dishamentu.

Mandji se deenchi mashi,

ineñ ske të batanchi se ineñ ske paadji pachi ku namsëdji ta namsëdji ske të dishamentu.

Se amea sai,

se ske sa jö shime.

15 Amea shi Fa Nashiolo ja faa:

16 Mandji se,

¡dezhupaga da Nashiolo!,

ku se pë cheche shime dantu kusan Titö i shime ku sa ku amu tëjantu ku namsëdji.

17 Pakë,

Titö ma ku liguilia jö shi no pindji ëli fa pa ëli tan ba ua namsëdji.

Ku sa ja ku tuludöguë ëli me se bi ngongo ba ua namsëdji.

18 A shime ku Titö se no ska da utu namain bi,

ku guëzha tudu ja da gavu da ëli shimafan uan nguë ku ja shivi evanjelio.

19 Se fë ku guëzha tudu ma ëli valadji pa ëli ba vadji ku no,

ku pa ten ma gagavu ba Jerusalen,

uan sulvisu ku ja da Shiölö gloria ku ja msa dishamentu shi ja sa pa no ja zhuda.

20 No ska zhunta bi valadji pa amea sai pa no na lega pa da fëiu nof da amea shi no ska fë lazhan sapa gagavu fo kusan.

21 No ja ska pinchidu pa no sa nna nguë dondolo deenchi Shiölö,

mandji se no ten ja ngongo pa utu nguë bë amea shi no sa nna nguë dondolo.

22 A shime no ten ska da ineñ bi ku uan namain no,

ku uan sapa vëdji se ëli ja msa no jö shi ëli sa,

ku uan sapa ope se ëli ja msa fa ëli sa jolo jolo.

Se öseshi se ëli sa ku liguilia da jonfiansa se ëli të ku namsëdji iai.

23 Shi uan nguë ja pongota ja tëjantu ku Titö,

namsëdji ja faa ëli sa jamada tabaia amu,

nguë shi ja tabaia ku amu pa no ja zhuda namsëdji.

Se nna namain ineñ shi ja bi ku ëli sa nna nguë ku guëzha se da bi,

se ineñ ja da Kilitu ondolo.

24 Dajantu shi,

namsëdji ja msa ineñ amea ngongo shi sa ku guëzha tudu ku ineñ ku a shime no të dëtu shi sa ku no pa no ja këlëdöguë da namsëdji ja da lazhan gavu da guëzha guëzha.