2 Anta pulusensa,

bla kusan namsëdji da no.

No na fë namsëdji zhugan malifa ñi no na ma zhugan nguë be jamangandji fëiufa ñi no na ma ja fo zhugan nguëf.

3 Amu na ska faa namsëdji jö sai valadji pa amu kondena namsëdjif.

Amu bi bi faa namsëdji bebezha fa namsëdji sa dantu kusan no se ja sa fa no sa vivu ö no sa mölidu no ja sa zhuntadu ku namsëdji.

4 Amu ja faa ku namsëdji amea shishizhu,

se amu ja sa ku këlëdöguë da namsëdji.

Namsëdji ja fia amu kusan amea añimu ngandji se namsëdji ja fë amu ja të liguilia dantu djisgalasa no tudu.

5 ^*Pakë ta no ba da loso loso Masedonia,

no na bi të zhugan tempu pa no jansa öguë nof,

shina no dajonta ku djiskatudjia pachi tudu,

ku pezha fo öluia ku mendu fo dantu no;

6 mandji se Nashian ku se ja fia kusan nna nguë ineñ shi ku ja sa ku djisgalasa,

se ëli fia kusan no ta Titö bi da ala.

7 Se ëli na bi ku liguilia mosofa,

shina ku monova shi bi ku ëli da no añimu shi ëli ma fo namsëdji iai.

Ta ëli faa amu amea shi namsëdji sa ku vintadji pa bë amu ku amea shi namsëdji ja sa modoia da jö ineñ shi bi shiga amu iai ku amea shi namsëdji ten ja sa tave amu,

¡ja fë amu të liguilia monchi!

8 Shi amu bi fë pa namsëdji sa modoia dajantu jaata ödu amu,

sa vedadji fa tuvëdji bi sa pizhadu da amu,

mandji se öseshi se na tan ja sa pizhadu da amuf.

Pakë ba da amu ötëndë fa dantu uan fi tempu se jaata amu bi fë pa namsëdji sa modoia.

9 Öseshi se ja fë gavu da amu ku amu da jaata se ba da namsëdji,

na sa dajantu ku dua namsëdjif,

shina pakë duadu se bi fë pa namsëdji tan vla ku ope tashi.

Se sa amea modoia shi Nashian ja ngongo pa pövu dëli ja të,

dajantu shi se no na fë namsëdji zhugan duaduf.

10 Pakë klase modoia shi ja bi fo Nashiolo ja ma no tan vla ku ope tashi se ja ma no ba savasan,

ku na se ja sa pa tan ja vla ku ope tashif,

mandji se modoia shi ja sa dji mundu ja pali mölë.

11 Namsëdji ja pia jö ineñ shi modoia sai ku ja së fo Nashiolo iai fë namsëdji.

¡Kë amea cheche se sa ku namsëdji iai,

kë ja fë namsëdji ngongo pindji pedan,

kë ja mëtë namsëdji pashian sai,

kë ja fë namsëdji sa ku mendu sai,

kë ja fë namsëdji të dishamentu sai,

kë ja fë namsëdji sa ku kusan jabadu sai,

kë ja fë namsëdji sa ku dishamentu valadji pa fë djustishi!

Dantu jö ineñ se tudu se namsëdji ja msa fa namsëdji sa nasenchi.

12 Se fë,

ta amu skëvë jaata sala da namsëdji,

na sa dajantu nguë shi fë ja fëiufa ñi da nguë shi a faa ja fëiu tëjantu ku ëlif,

shina pa bë namsëdji gavu deenchi Nashiolo,

amea shi namsëdji sa cheche.

13 Jö ineñ se tudu ja fia no kusan.

Mandji se kusan no tan fia mashi da jö shi a da bi da no,

fë gavu da no öshi no tan bi bë Titö ku jö shi bi ku ëli sa liguilia da amea shi namsëdji tudu ma ëli ku namsëdji da spitu ëli padji.

14 Se amu da ëli lazhan amea shi amu sa ku këlëdöguë dajantu namsëdji,

amea shi ku namsëdji na lega amu pasa govanf.

Olatuvëdji no ja da ineñ vedadji,

¡a shime gavu ineñ shi no da Titö lazhan tëjantu ku namsëdji iai ten bi sa vedadji!

15 Se öseshi se ëli ja sa tave namsëdji ku ngongo mashi ku tudjia ta ëli bi ja lambela nguë tudu ja këlë dëli ku amea shi a ma ëli ku ondolo monchi ku ja timbla.

16 Öseshi amu sa ku liguilia monchi pakë amu ja paadji të jonfiansa ku namsëdji ntëlelele.