6
Se no,
nna nguë shi ku ja tabaia ku Nashiolo,
no ja ska luga namsëdji pa na ja ma galasa dëli shipëf.
2 Pakë Nashian ja faa:
«Dantu tempu shi gavu,
se amu tëndë bo.
Se djia savasan se amu zhuda bo».
Se öseshi se sa «tempu shi gavu».
Öseshi se sa djia savasan.
Pelavöl ma mavida pa ëli shivi Nashiolo
3 No ja bibe amea shi pa no na ja fë pa zhugan nguë ja da topu dajantu nof,
se zhugan nguë na ske bë zhugan fata dantu sulvisu nof.
4 Mandji se,
ku jö ineñ shi no ja ska fë tudu,
no ja ska msa fa no sa shividölö Nashiolo.
Ku uan sapa pashiensa,
ja ma mavida,
ku dishamentu ku klase djisgalasa tudu.
5 *Se a ja da no ku kuzhu,
se a mëtë pë djili,
se no bi sa deenchi nna pövu ku bi sa shia pashian,
se no ja tabaia ngandji ku foshi,
se no na ja djunif ku se no ja pasa fomu.
6 Se no msa jö shi no sa dajantu vida limpi no,
dajantu tëndëmentu,
gaga mavida ku fidu ja gavu,
amea Spitu Santu ku dantu ngongo shishizhu.
7 Dajantu nova vedadji no ku pödë Nashian shi sa ku no.
Se no ja usa pingada djustishi ku öma shi dëtu pa no ja pezha döguë no ku öma shi skedji pa no ja fë lazhan döguë no.
8 No ja shivi Nashiolo,
ja sa fa a ja da no ondolo ö a ja nozho no;
ja sa fa a mucha da no ö a ja da gavu no.
No ja ska da fala shishizhu,
mandji se a ja sama no nna nguë ngaña nguë.
9 Ineñ na ja sa tave nof benga zha pa no sa jönshidu gavu.
No ja ska bibe pepe mölë,
mandji se ontolo no ja sa ku vida.
Ineñ ja da no ku kuzhu,
mandji se ineñ na ja chila no vida folof.
10 No ja sa modoia,
mandji se no ja sa ku liguilia olatuvëdji.
No ja sa shimafan puvili,
mandji se no ja sa liku da uan sapa dji nguë.
No na ja të zhugan jaf,
mandji se no ja sa ku ja tudu.
11 Nna namain nna nguë korinto,
no faa ku namsëdji ku kusan betu shishizhu,
no bla kusan no da namsëdji ntëlelele.
12 Na të fata ngongo fo pachi nof,
mandji se namsëdji naga no ngongo namsëdji.
13 Amu pindji namsëdji pa namsëdji kundji shimafan ja namsëdji sa nna mina tuludöguë amu.
¡Bla kusan namsëdji!
Jadji Nashian shi sa vivu
14 Na ja ska sa zhuntadu ku nna nguë ku na ja këlë Nashianf.
¿Kë amea shi djustishi ske ja zhunta ku masan?
¿Kë amea shi fögö djidjidu ja paadji sa jamada jamian kulu kulu?
15 ¿Kë amea shi ja fo të leva Kilitu ku djiabu?
¿Kë amea shi uan nguë ku ja këlë Nashiolo paadji sa zhuntadu ku uan nguë ku na ja këlëf?
16 *¿Se kë klase zhunta shi ja paadji të ku jadji Nashiolo ku nna nashian balu?
Pakë no se sa jadji Nashian shi sa vivu.
Amea shi Nashian faa:
«Amu ske bibe dantu dëneñ,
se amu ske nda dantu dëneñ.
Se amu ske sa Nashian dëneñ,
se ineñ ske sa pövu amu».
17 Dajantu shi se Shiölö ten ja faa:
«Namsëdji së fo metadji nna nguë ku na ja këlëf
safa fo ineñ.
Na ja fala ja nozhoduf,
se amu ske ma namsëdji.
18 Se amu ske sa Pai namsëdji,
se namsëdji ske sa nna mina naamain
ku nna mina napai amu,
se sa jö shi Shiölö shi sa Pödë Tudu ja fala».