Öguë novu novu
5
Pakë no sëbë fa,
shi limada san tela se ku no ja ta iai ja lolo,
(sa fa ta no ja mölë ku no ja lega öguë no se pë san tela iai),
sa shimafan uan limada ku ja lolo,
mandji se no sëbë fa shi limada se ku no ja bibe iai ja lolo,
Nashian fë vadu uan jadji ösë pa sempele,
ku na sa ja a fë ku öma nna pöjödölöf.
2 Dajantu shi,
se no ja djimi ja dishia pa no sa dantu limada dösë no.
3 Pakë no ske bi bishi ku uan öguë dösë;
no na ske sa spitu shin öguëf.
4 Öshi ontolo no ja bibe dantu limada sai,
no ja ska djimi ja sa foshi jansadu,
mandji se no na ja dishia pa no sa gödödjifa,
shina bishidu,
valadji pa ja mölidu sai ja sa ngulidu dajantu vida shi novu.
5 Tuludöguë Nashian se fë vadu jö ineñ se tudu da no,
se pa sa suguladu,
se ëli da no Spitu Santu dëli.
6 Dajantu shi se no ja bibe ku jonfiansa sai,
ku benga zha pa no sëbë fa öshi ontolo no ja ska bibe dantu öguë sai no na ja sa jadji dösë ku Shiölöf.
7 No ja bibe da jonfa,
na sa dajantu vitaf.
8 Se sa amea shi no ja sa ku jonfa,
se no ja ngongo pa ja së fo öguë sai,
pakë tadashi se no ske sa dantu jadji dösë ku Shiölö.
9 Dajantu shi se no ja ngongo fë ja pa ja fë gavu olatuvëdji da Shiölö,
ja sa fa ontolo no sa öguë sai ö ja fa no lega öguë se pë bebezha.
10 *Pakë no tudu ske ta pa no ba deenchi zhunta ngandji Kilitu,
valadji pa unian unian no ma jö shi ku ëli mësë amea ja gavu ö ja fëfëiu ku ëli fë öshi ontolo ëli sa ku öguë sai.
Tan vlame jözhë ja pë ku Nashiolo amea Kilitu
11 Dajantu shi,
ku no sëbë fa ta pa ja tëndë Shiölö ku pa ja da ëli ondolo,
se no ja ska fë pa utu nguë ten ja sëbë.
Nashian jönsë no gavu,
se amu gada pa namsëdji ten jönsë no ku kusan limpi.
12 ¿No na ja ska da gavu döguë no dajantu namsëdji ua?,
shina no se ja da namsëdji fölöshö jamian pa dajantu no pa namsëdji ja sa këlëdöguë,
valadji pa namsëdji ja paadji kundji nna nguë ineñ shi,
ja ska sinchi gavu da döguë dëneñ ku ineñ ja ska fë ku na ja sa ja,
ja së fo dantu kusanf.
13 Shi no ja kë nna nguë ku ja ska dana ja sa ja pa ja da Nashian gloria,
se shi no ja sa gavu ku tëndëmentu no,
ja sa ja gavu da namsëdji.
14 Ngongo Kilitu se ja fë no afoshi,
pakë no sëbë gavu fa uan nguë mölë dajantu nna nguë tudu,
se dajantu shi se nguë tudu mölë.
15 Se ëli mölë dajantu nguë tudu valadji pa nna nguë ineñ shi ja ma vida novu Kilitu na tan ja bibe da öguë dëneñ mashif.
Gavu mashi,
pa ineñ ja bibe da Kilitu,
ku se mölë ku tan lanta bi vida dajantu dëneñ.
16 Dajantu shi,
se no fo öseshi be deenchi no na tan jönsë zhugan nguë amea fidu ja nna pöjödölöf.
Se benga zha pa no bi jönsë Kilitu amea sai,
öseshi no na tan jönsë ëli amea sef.
17 Se dajantu shi,
nguë shi ja sa nguë Kilitu ja sa uan pöjödölö novu.
Vida shi veiu pasa bebezha,
¡Ja pia,
pöjödölö sai ja vla fë uan pöjödölö novu!
18 Se jö ineñ se tudu sa ja Nashian ja da nguë dödji,
ku ëli se tan vlame jözhë ja pë amea Kilitu.
Se Nashian da no sulvisu jözhë ja pë.
19 Se sa fa,
fo Kilitu,
se Nashian tan ja ska vlame ma nna nguë ba toja tuludöguë ëli me,
se ëli na ja sa tave pekadu nna nguë munduf.
Se ëli da no nova fumözhö se pa no ja jözhë ja pë.
20 Se amea sai se Kilitu da no bai valadji pa no ja faa fala pachi dëli,
se Nashian ja sama nguë amea no.
No ja ska faa fala ku namu Kilitu ta no ja ska luga ineñ:
«¡Namsëdji tan vlame jözhë ja pë ku Nashiolo!».
21 Nguë shi na fë pekadu zhugan djiaf,
dajantu no se fë ëli pekadölö,
valadji pa no paadji fë djustishi da Nashiolo.