3 Se shi evanjelio se ku no ja ska pegua ja sa jöndjidu tashi uan lensu,

ja sa jöndjidu da nna nguë ineñ shi ja ske pëndë.

4 Satanas,

ku se sa nashian mundu sai,

ëli tapa tëndëmentu nna nguë ineñ shi na ja këlëf.

Ineñ na ja paadji bë gloria shi ja ska dëdë ku fögö evanjeliof.

Ineñ na ja tëndë nova tëjantu ku gloria Kilituf,

ku se sa ku fesan vivu Nashiolo.

5 No na ja ska bai ja pegua tëjantu ku tuludöguë no no mef.

No ja ska pegua fa Djisukilitu se sa Shiölö,

se no sa shividölö namsëdji dajantu ngongo Djisu.

6 Pakë Nashiolo,

ku se bi faa:

«Pa ja të fögö djidjidu dantu jamian kulu»,

ëli fë pa fögö se dëdë pë dantu kusan no,

valadji pa no paadji jönsë gloria Nashiolo ku a ja bë ku fesan Djisukilitu.

7 Öseshi ku no sa ku gagavu sai gadadu pë dantu pukulu balu,

valadji pa pödë shi fumözhö ja sa ja fo Nashiolo,

ku na ja sa fo nof.

8 Dajantu shi,

benga zha pa no ja sa shia djisgalasa,

no ja të amea shi pa no ja së folo,

no ja të djiskatudjia,

mandji se no na ja pëndë añimuf.

9 A ja pëtëpë no,

mandji se a na ja abandona nof,

a ja fë pa no ja kë,

mandji se no na ja fea feaf.

10 Ja sa jamian shi no ja bai tudu,

no ja ma pë liba döguë no mölë Djisu,

valadji pa a shime vida dëli ja msa öguë no.

11 Sa vedadji,

fa no ja ska bibe pepe mölë dajantu ku no ja ska shivi Djisu,

valadji pa vida Djisu ten ja msa vedadji fa öguë no sa mölidu.

12 Se amea sai,

se no ja ska bibe ja pia mölë,

mandji se jö sai se ja fë pa ja da namsëdji vida chindadji.

13 Mandji se,

ontolo no ja be ja pegua pakë no të spitu jonfa shi bi sa ku uan nguë faa salmos ta ëli bi faa:

«Amu bi bi këlë Nashiolo,

se dajantu shi se amu bi faa fala».

14 No sëbë fa Nashiolo,

ku lanta Shiölö Djisu fo mölë,

a shime ëli se ten ske lanta no ku Djisu se ëli ske pë no deenchi tuludöguë dëli zhuntadu ku namsëdji.

15 Jö ineñ se tudu sa ja gavu tëjantu ku namsëdji,

valadji pa,

pa ta uan sapa nguë ja ma dezhupaga Nashiolo,

pa ten ja sa uan sapa nna nguë ku ten ja da ëli dezhupaga,

se Nashian ske ja ma gloria mashi mashi.

16 Dajantu shi se no na ja pëndë añimuf.

Benga zha pa öguë no ja ska mölë,

dantu kusan no ja ska be ja vla novu djia djia.

17 Pakë jö ineñ shi no ja ska padësë dantu vida sai ja sa ja levu,

ku ja pasa dandjian,

mandji se ja ma uan gloria bi da no ku ske sa ja pa sempele ku se ja ngandji mashi ku ja monchi mashi ku suflimentu.

18 Pakë no na ja ska pia jö ineñ shi a ja bëf,

shina no ja bë jö ineñ shi a na ja ska bëf,

pakë jö ineñ shi a ja ska bë goleme ske ja pasa,

mandji se ineñ shi a na ja ska bëf se ja sa pa sempele.