3
Ta no ja faa jö sai,
¿namsëdji ja mazhna fa no tan ja ska jomesa ja alaba tuludöguë no no me?
¿Ö jativie no ja ske ta pa no msa öguë no ö pa no pindji namsëdji jaata pa jönsë no,
amea shi utu nna nguë ja fë?
2 Namsëdji se sa ponodu jaata shi no ngongo ku pa ja msa no:
uan jaata ku sa skividu dantu kusan no,
ku se nguë tudu ja paadji jönsë ku ja paadji lëë.
3 Se a ja bë fa namsëdji sa uan jaata ku Kilitu se skëvë amea no,
uan «jaata» ku a na skëvë ku chinchaf,
shina ku Spitu Nashian shi sa vivu,
na sa skividu pë budu lisaf,
shina pë dantu kusan nna pöjödölö.
4 Jonfiansa no sa ja ku ja fo Nashiolo amea Kilitu se no ja sa suguladu da jö ineñ se tudu.
5 Na ja sa fa tuludöguë no se no ja paadji fëf valadji pa no ja bë öguë shimafan uan ja ku na sa ja nof;
shina,
jö ineñ shi no paadji fë tudu ja sa ja fo Nashiolo.
6 Pakë ëli se fë pa no paadji sa shividölö uan bechi novu,
ku na ja sa ja fo latela skividuf,
shina amea Spitu.
Se bechi ku alë ja chila nguë vida folo,
mandji se dji Spitu ja da nguë vida.
Gloria bechi shi novu
7 Se shi sulvisu shi antigu ku alë shi ja ma nguë ba mölë ku bi sa skividu ku latela pë liba budu,
se fë ku dajantu uan sapa gloria,
se nna nguë Israel na bi paadji pia Moises jalaf dajantu gloria shi bi ska msa fesan dëli,
ku se bi ska paka bebezha.
8 ¿Gloria shi ngandji novu na se ske ngandji mashi dantu sulvisu shi novufa,
öseshi ku Spitu Santu ja da vida ua?
9 Sa fa,
shi ta a da sulvisu shi antigu ku bi shivi pa kondena no bi sa ku gloria,
¡jantu gloria mashi na bi ske sa ku nova shi fo Nashiolo ku se ske fë no dëtuf!
10 Pakë gloria shi bi sa tudjia iai na sa zhugan ja shimafan i sef,
ku se sa ku gloria mashi.
11 Se shi sulvisu shi antigu ku bi të gloria bi ske paka,
gloria shi sulvisu novu ku se tan ske sa mashi se ske mdja pa sempele.
12 Pakë dajantu sulvisu shi novu ku no sa ku alagada da jonfa sai,
se no ja faa fala shishizhu uan sapa.
13 No na sa shimafan Moisesf,
ku bi ska tapa fesan dëli ku uan lensu valadji pa pövu Israel na paadji bë gloriaf,
benga zha pa gloria sai bi ske ta pa tan paka.
14 Dajantu shi se ineñ naga pa ineñ tëndë jö sai,
se bi toja öseshi,
ta ineñ ja ska lëë lavulu bechi antigu,
ontolo lensu se ja ska pë ineñ topu pa ineñ na ja ska tëndëf,
pakë ontolo a na sa chila fo ineñf,
pakë a ja chila amea ta a ja këlë Kilitu moso.
15 Bi toja ödjai djia,
ta ineñ ja ska lëë lavulu Moises,
uan lensu ja kubili kusan dëneñ.
16 Mandji se ta uan pöjödölö tan ja vla Shiölö,
se a ja chila lensu sai folo.
17 Pakë Shiölö se sa Spitu;
se jamian shi Spitu Shiölö ja sa,
ala a ja sa legadu.
18 Dajantu shi,
no tudu,
nna nguë ineñ shi a chila no lensu,
no paadji bë ku msa gloria Shiölö.
Se Shiölö,
ku se sa Spitu,
ja fë pa no ja kë ëli mashi mashi öshi no ja ska tuka ku fesan gloria dëli.