2
Dajantu shi,
se amu mazhna pa amu na tan vlame ba ua namsëdjifa,
valadji pa na fë pa namsëdji sa modoiaf.
2 Pakë,
shi amu se ja fë pa namsëdji sa modoia,
¿kë nguë shi ske fë pa amu të liguilia shina nguë ku amu fë pa ëli sa modoiaf?
3 Dajantu shi se amu skëvë da namsëdji amea se ku amu fë iai,
valadji pa,
ta amu ja bi iai,
pa na tan fë pa amu sa modoia da nna nguë ineñ shime ku se ta pa da amu liguilia shi ngandji mashif.
Amu sa suguladu fa liguilia amu se sa dji namsëdji.
4 Ta amu skëvë jaata sai da namsëdji,
amu bi sa ku kusan modoia ku mazhna kuzhu ba toja ku amu bi ska sula.
Mandji se amu na bi ngongo fë pa namsëdji sa modoiaf,
shina pa namsëdji bë amea ngongo ngandji shi amu sa ku namsëdji.
Pada uan pekadölö
5 Amu na ngongo të jö sai të vla ja ngandji mashif,
pakë masebu shi fë djisgalasa ineñ se ku dua namsëdji tudu mashi ku amu iai.
6 Se jatigu shi uan sapa namsëdji da masebu sai iai,
dagoli bebezha.
7 Jö shi ta pa namsëdji fë öseshi sa pa pada ëli ku pa ten fia ëli kusan,
pa na sa modoia ngandji sai se ja paadji fë pa ëli pëndëf.
8 Dajantu shi se amu pindji namsëdji pa tan ja ngongo ku ëli mashi.
9 Amu bi bi skëvë da namsëdji bebezha tëjantu ku jö sai,
valadji pa amu puva namsëdji pa amu sëbë shime namsëdji ska lë jö ineñ shi amu bi shina namsëdji iai.
10 Shi namsëdji ja pada masebu sai,
a shime amu ten ske pada namsëdji.
Ta amu ja pada jö shi ta pa ja pada iai,
amu ja fë ku pödë shi ja fo Kilitu pa ja sa gavu da namsëdji,
11 valadji pa Satanas na ma fölöshö fo namsëdjif.
Pakë namsëdji jönsë amea shi ëli ja fë ja fëfëiu dëli.
12 *Ta amu bi ba palea Troas valadji pa amu ba pegua evanjelio Kilitu,
se Shiölö bi bla uan poto pa no tabaia da Shiölö,
13 mandji se amu na bi ska sinchi padji dantu spitu amuf,
pakë namain kilidu amu Titö na bi sa bi ku monova fo namsëdjif.
Dajantu shi amu be ku dezhu fo ineñ se amu ba Masedonia valadji pa amu ba jua ëli.
Shividölö bechi shi novu
14 Mandji se dezhupaga ku Nashiolo ku ja ska ma no ba jamangandji pa no ja ngana ku Kilitu ku amea no se ëli ja da pa ja jönsë nova,
ku ja ska panta panta jamian tudu ku uan sëlu ku ja saa gavu.
15 Pakë vida no ja sa shimafan sëlu ku ja saa gavu da Kilitu ku ja subili ba toja Nashiolo,
mandji se sëlu se ja panta monchi da nna nguë ineñ shi ja sava ku a shime ku nna nguë ineñ shi ja pëndë.
16 Da nna nguë ineñ shi ja ske pëndë,
no sa uan sëlu ku ja fende sëlu mölë ku kondenadu,
mandji se da nna nguë ineñ shi ja ske sava,
no ja sa ku sëlu ku ja saa gavu da vida.
¿Se kë nguë sa pöjödölö shi jotadu da klase tabaia sai?
17 No na ja nda ja fë nongosu ku pegua nova Nashianf,
amea shi uan sapa dji nguë ja fëf;
mandji se no,
ja faa fala shishizhu deenchi Nashiolo,
shimafan nna nguë ineñ shi ëli se da bi ku pa no sa zhuntadu ku Kilitu.