EPISTOLA SHI FË DÖSU KU SAN PELAVÖL SKËVË DA NNA NGUË
KORINTO
Pelavöl da manten
1
*Pelavöl,
apostol Kilitu Djisu da vintadji Nashiolo,
ku namain no Timoteo da nna nguë guëzha Nashian ineñ shi ja ta palea Korinto ku utu nna namain santu ineñ shi ja ta loso loso Akaia manten.
2 Pa Nashian Pai no ku Shiölö Djisukilitu ta galasa ku padji dëneñ pë liba namsëdji.
Nashian fia kusan nna nguë tudu
3 Besa se ja sa ku Nashiolo ku Pai Shiölö no Djisukilitu;
Pai mindjikodji ku Nashian kusan fiadu tudu.
4 Ëli se ja fia kusan no dantu padësë no tudu,
valadji pa no ten ja paadji fia kusan utu nna nguë ineñ shi ten ja ska sufli,
ja ska fia kusan dëneñ amea shi Nashian ten da no.
5 Pakë,
öshi ku no ja ska ma mavida mashi dajantu Kilitu,
se sa öshi Nashian ja ska fia kusan no amea Kilitu.
6 Mandji se shi no ja ska ma mavida,
ja sa valadji pa namsëdji ja të kusan fiadu ku savasan;
se shi a ja ska fia no kusan,
a shime ten ja sa pa namsëdji ja sa ku kusan fiadu ku pa namsëdji ja paadji gaga mavida namsëdji ku foshi shime ku pashiensa shi ku no ten padësë.
7 No ja sa ku alagada shi dëtu ku tëjantu ku namsëdji,
pakë no sëbë fa amea shi ku namsëdji ja ma pachi mavida shime ku no,
se sa amea shime ku namsëdji ten ske ma pachi kusan fiadu shi Nashian ja da no.
8 *Nna namain,
no ngongo pa namsëdji sëbë jantu mavida ku no ma ta no bi sa loso loso Asia.
Bi sa uan tempu ödu ku no na tan bi paadji gaga mashi ku foshi shi ja sa ku nof,
ku ba toja ku no bi pëndë alagada fa no na ske së fo ala ku vidaf.
9 No bi sinchi shimafan nna nguë ku bi sa kondenadu a mölë.
Mandji se jö ineñ se shivi pa shina no pa na ja ku jonfiansa tuludöguë nof,
shina pa no ja sa ku jonfiansa ku Nashiolo,
ku se ja lanta bi vida nna nguë mölidu.
10 Se ëli bi fë no legadu se ëli ske fë pa no sa legadu fo pepe mölë.
Se fo ëli se no sa ku alagada no,
se ëli ske ja bai ja fë pa no sa legadu.
11 Anta pulusensa,
namsëdji zhuda no ja lezha da no.
Shi uan sapa namsëdji ja lezha da no,
uan sapa ineñ ske bi da Nashian dezhupaga dajantu ja gavu dödji shi no ma fo Nashiolo ku sa kundji lezha amea uan sapa dji nguë.
Pelavöl tuka amea fë ja dëli
12 Da no,
jö shi ja fë no sinchi gavu sa lazhan gavu kusan limpi.
Dantu fidu ja no tudu,
no ja bibe amea shipë ku sinchidu gavu ku Nashian se da no.
No bi sa basu galasa Nashiolo ku na sa fo tëndëmentu pöjödölö munduf.
Se sa amea shi no msa mundu,
mashi ku namsëdji.
13 No na ska skëvë zhugan ja ku a na paadji lëëfa ñi tëndëf.
Amu ska gada pa namsëdji ja tëndë ja tudu,
14 se öseshi ku namsëdji tëndë nna nguë ineñ shi sa no iai,
se namsëdji ske ja sa ku këlëdöguë da no,
amea shime ku no ten ske ja sa ku këlëdöguë da namsëdji dantu djia Shiölö Djisu.
15 Ku jonfiansa sai,
se amu bi mazhna pa amu ba bë namsëdji pimëlu,
pa amea sai pa amu da namsëdji besa ope dösu öshi amu ska ua namsëdji ope shi ja fë dösu:
16 *pimëlu ta amu ja ska be jamangandji ja loso loso Masedonia,
ku ta amu tan ska vlame bi fo Masedonia.
Zha pa namsëdji zhuda pa amu be vadji shi amu ska Judea.
17 Namsëdji ja ska paadji pongota ja fë amu ja tuka jö ineñ shi ku amu ja ngongo fë,
¿namsëdji ja mazhna fa amu ja fë ja amu tudu shin mazhna?
¿Namsëdji ja mazhna fa amu sa shimafan nna pöjödölö ku ja ska faa «aen,
aen» ku «na,
na» tempu shime?
18 Anta vedadji ku Nashian sa jonfadu,
fala no ku dji namsëdji na ta pa ja sa dantu «shiën» ku «na» tempu shimef.
19 *Pakë Mina Nashiolo,
Djisukilitu,
na ja paka paka fala dëlif dantu «shiën» ku «na» tempu shimef.
Ëli se sa nguë shi Silvano,
Timoteo ku amu ja pegua dantu namsëdji iai,
se jabamentu «aen» Nashiolo,
se ëli ja fë jö shi ku ëli ja fala ola tudu.
20 Pakë fo ëli se plomesa Nashian tudu ja sa «¡aen!»
ku Kilitu.
Dajantu shi,
se amea Kilitu Djisu se no ja kundji «¡Amen!»
ta no ja da Nashian gloria.
21 Se nguë shi ja fë no mdja dëtu ku namsëdji ku Kilitu,
se nguë shi bi ma no sa Nashiolo.
22 Se ëli pë no malka ku sëiu dëli,
se ëli pë Spitu Santu dantu kusan no shimafan ja gavu shi no ske ma.