Ta Pelavöl skëvë pimëlu jaata da nna kitan palea Korinto jaba, se tan kë ja lazhan dantu dëneñ na tan bi sa gavu shif. Jativie se sa jö shi fë ku ëli tan skëvë jaata shi fë dösu amea patadu tëjantu ku öguë dëli ku uan sinchidu ngongo levu. Dantu jaata sai Pelavöl bi ska mazhna pa ëli ba ua ineñ, mandji se jabamentu se ëli tuka mazhnamentu (1:12-24).

Dantu jaata sai Pelavöl ja faa ineñ ja tëjantu ku amea shi pa sa legadu ku Kilitu. Ëli ja limian lensu shi ku Moises bi ska kubili jala dëli (Exo 34:29-35) valadji pa ëli da ineñ lazhan fa, dantu vida kitan, ja tudu a ja fë bababa, ku se sa jö shi ja lega pa nna kitan ja faa fala amea legadu (3:12-15).

Pelavöl ja msa öguë no shimafan uan limada levu, se fë ku ëli ja faa fa, liba dösë no sa ku uan jadji finkadu ödu, ku sa ja Nashian se fë ku na ja sa ja nna pöjödölö se ja fëf (5:1).

Shimafan zhugan ja tëjantu ku dëtu apostol dëli, Pelavöl ja ma jabamentu jaata dëli ja da lazhan öma betu utu nna kitan, shimafan nna nguë guëzha loso loso Masedonia, se ëli ja lambela nna nguë korinto fa nguë shi ja da uan fi kuzhu, ten ja ma uan fi kuzhu, nguë shi ja da monchi, ten ja ma monchi (9:6). Ëli ja jaba jaata dëli sai ja pindji Nashiolo da nna nguë korinto pa ineñ ja sa nna balë ödu mashi da Kilitu (13:9), ku pa ineñ ja sa ku fala shime ku pa ineñ ja bibe legadu ku liguilia (13:11).