Kilitu tan lanta bi vida
15
Öseshi,
nna namain,
amu ngongo pa namsëdji ja ska lambela evanjelio shi amu pegua da namsëdji iai.
Ku se sa evanjelio shi ku namsëdji ma ku ngongo ku ontolo namsëdji ja mdja dëtu.
2 A shime amea evanjelio sai se namsëdji ske të savasan,
shi namsëdji ja jonfa ëli,
amea shi amu pegua da namsëdji iai,
pa na ja sa fa namsëdji këlë shipë shif.
3 Fo pimëlu pimëlu se amu shina namsëdji jö shime ku a ten shina amu,
ku sa fa Kilitu mölë dajantu pekadu no,
amea Fa Nashiolo;
4 *se a da ëli spitula se ëli tan lanta ta da tëishi djia,
amea Fa Nashiolo;
5 *se ëli ten së Sefas ku supichi,
zha se ëli ten së nna deshi ku dösu ku supichi.
6 Zha se ëli ten së ku supichi uan sentu shinku nna namain mashi uan vëdji soso,
uan sapa ineñ ontolo sa vida,
benga zha pa utu ineñ mölë bebezha.
7 Zha se ëli së Sanchagu ku supichi,
zha se ëli ten së nna apostol tudu ku supichi.
8 *Se jabamentu se ëli ten bë amu,
ku amu sa shimafan uan mina ku a na a pali dantu tempu dëlif.
9 *Pakë amu se sa nguë shi kichi mashi dantu nna apostol tudu,
ku ñi amu na mësë pa ja sama amu apostolf,
pakë amu bi pëtëpë guëzha Nashiolo.
10 Mandji se amu sa jö sai ku amu sa ödjai iai dajantu ku Nashian msa amu galasa dëli.
Se gavu dëli da amu na sa ja shipë shif.
Pakë amu tabaia mashi ku ineñ tudu,
benga zha pa na sa amuf,
shina Nashiolo,
ku dantu gavu dëli se ëli zhuda amu.
11 Jö shi sa tave sa fa,
ja sa amu ö ineñ,
jö sai se no pegua,
ku se sa jö shi ku namsëdji ten këlë.
No ten ske lanta fo dantu mölë
12 Mandji se shi no ja pegua fa Kilitu lanta fo mölë,
¿jama fë zhugan utu namsëdji ja ska faa nna nguë mölë bebezha na tan ja lanta bi vidaf?
13 Pakë shi nna nguë mölidu na tan ja lanta bi vidaf,
tadashi ñi Kilitu na ten ske lanta bi vidaf,
14 se shi Kilitu na ja lantaf,
nova shi no ja pegua na ja shivi da zhugan jaf,
a shime jonfa shi sa ku namsëdji iai na ten ja shivif.
15 Se no,
nna apostol,
ske ja da fanchila tëjantu ku Nashiolo,
pakë no ska da lazhan gavu fa Nashian lanta Kilitu fo dantu spitula.
Se sa fa jö sai na sa shishizhu shi nna nguë mölë bebezha na tan ja lanta bi vidaf.
16 Pakë shi nna nguë ineñ shi mölë bebezha na tan ja lanta bi vidaf,
tadashi Kilitu na ten lanta bi vidaf;
17 se shi Kilitu na ten lanta bi vidaf,
jonfa namsëdji na ja shivi da zhugan jaf:
ontolo namsëdji sa dantu pekadu namsëdji.
18 Tadashi a shime nna nguë ineñ shi mölë ja këlë Kilitu tudu ten sa pindjidu.
19 Shi no ja ska gada Kilitu dantu vida se moso,
no sa nna nguë ineñ shi puvili pa ja të dölö dëneñ mashi ku nguë tudu.
20 Mandji se öseshi se Kilitu lanta fo dantu mölë.
Ëli se sa pimëlu fuluta palidu shi ngandji mashi,
nguë shi pimëlu ku lanta fo dantu nna nguë ineñ shi bi mölë.
21 Se sa amea shime ku dajantu uan masebu se mölë bi,
se ten sa amea shime ku dajantu uan masebu se lanta nguë fo mölë ten bi.
22 Se shi amea Adan se nguë tudu mölë,
se ten sa amea shime ku fo Kilitu se nna nguë tudu ten ske të vida.
23 Mandji se unian unian ku jalëla shi ja sa dji ineñ:
Kilitu se sa pimëlu jamian;
zha se ta Kilitu tan ja bi,
se ten ja bi nna nguë ineñ shi sa nguë dëli.
24 Zha se ske bi jabamentu,
ta ëli ske da Nashian shi sa Pai gövöndölö dëli,
zha se ëli ske të gövöndölö tudu ku pödë ku odji tudu.
25 Pakë Kilitu ske ta pa ëli sa alë ba toja pa ëli pë nna namigu dëli tudu sa basu dope dëli;
26 se jabamentu namigu shi a ske të fea fea ske sa mölë.
27 Pakë Nashian «pë ja tudu basu dope dëli».
Ta a ja faa «ja tudu» ja mdja basu odji dëli,
se sa amea bababa ku a na jonta nguë shi pë ja tudu basu dëlif,
ku se pë ja tudu basu Kilitu.
28 Se ta ja tudu ske sa basu dope Kilitu bebezha,
se sa öshi tuludöguë Kilitu,
ku se sa Mina,
ske pë öguë dëli basu Nashiolo,
ku se pë ja tudu basu dëli.
Se sa amea shi,
Nashian ske sa liba ja tudu ku jamian tudu.
29 Fo amea patadu,
nna nguë ineñ shi ja bachizha da nna nguë mölë bebezha,
¿ja fë ineñ ja fë?
Shi nna nguë mölë bebezha na ja lanta bi vidaf,
¿da jama fë ku a ja bachizha dajantu nna nguë mölidu?
30 ¿Se pakë ja fë ola tudu no ja sa pepe pa no mölë?
31 Pakë,
nna namain,
djia tudu amu ja sa pepe mölë.
Se jö sai ja sa vedadji shimafan amea shime ku amu ja këlëdöguë amu da jö shi Kilitu Djisu Shiölö no fë namsëdji iai.
32 Se ta amu pezha ku nna limaia zhenchi dantu palea Efeso,
shi amu fë jö sai dajantu sinchidu pöjödölö,
¿a kë ja amu bi ske ngana ku jö ineñ sai?
Shi ja sa vedadji fa nna nguë mölë na ja lanta bi vidaf,
tadashi,
amea shi zhugan nguë ja faa:
«¡No ja kumu ku pa no ja bëbë,
pakë amaian se no ske mölë!».
33 Na ja lega pa ja ngaña namsëdjif.
Amea shi uan nguë faa:
«Nna jamada fëfëiu ja të kutumu gagavu të dana».
34 Namsëdji tan vlame ba mazhna ja gagavu shishizhu,
pa namsëdji chama fë pekadu,
pakë zhugan nna nguë dantu namsëdji na jönsë Nashianf.
Amu ja faa jö ineñ sai valadji pa namsëdji ja pasa govan.
Kë amea shi nna nguë mölidu tan ske lanta bi vida
35 Jativie uan nguë ja pongota:
«¿Kë amea shi nna nguë mölidu tan ske lanta bi vida?
¿Kë klase öguë ske sa ku ineñ?».
36 ¡Kë pongota danadu se sa!
Ta a ja shimian uan kuzhu,
shimenchi na ta pa mölë valadji pa tan da öpa vida ua.
37 Jö shi a ja shimian na se ja sa öguë shi ske këësëf,
shina ja sa uan shimenchi tulugu shipë ö dji utu shimenchi.
38 Zha se Nashian ja fë ëli amea shi ëli ja ngongo,
se unian unian shimenchi se ëli ja da öguë shi ja sa dji dëli.
39 Öguë tudu na se ja sa i shimef,
uan se ja sa öguë nna napai,
se utu ja sa dji nna limaia,
utu ja sa dji nna paatu se utu ja sa dji nna pishi.
40 Se ten sa amea shime,
ku ten ja të öguë dösë ku öguë san tela;
mandji se unian se ja sa ja öguë fumözhö dösë se utu ja sa öguë fumözhö dji san tela.
41 Se unian se ja sa chila blin solo,
se utu se ja sa dji önuian,
se utu se ja sa dji ntëla ntëla.
Se unian unian ntëla ja sa ku tuludöguë chila blin dëli.
42 Jö shime se ten ja pasa ku lanta nguë fo mölë.
Jö shi a ja ntela ja sa ja poto potodu,
se jö shi ja lanta fo mölë na tan ja sa ja poto potoduf.
43 Jö shi a ja ntela ja sa ja nozhodu,
se jö shi ja lanta fo mölë ja sa ku gloria.
Jö shi a ja ntela ja sa levu,
se jö shi ja lanta fo mölë ja sa ku foshi.
44 Jö shi a ja ntela ja sa uan öguë pöjödölö,
se jö shi ja lanta ja sa uan öguë spitu.
Se shi ja të öguë pöjödölö,
a shime ten të uan öguë spitu.
45 Se sa amea shi sa skividu:
«Napai shi pimëlu,
Adan se vla fë uan alma vivu»;
mandji se Adan shi jabamentu,
vla fë spitu shi ku ja da nguë vida.
46 Mandji se,
ja spitu na se ja sa pimëluf,
shina dji pöjödölö,
zha se ja bi dji spitu.
47 Napai shi pimëlu,
bi sa fidu fo san dalea,
ëli bi fo san dalea;
se napai shi fë dösu sa fo ösë.
48 Nna nguë ineñ shi sa dji san dalea sa shimafan dji masebu shi fo san dalea;
se ineñ shi sa dji ösë sa shimafan dji nguë shi fo ösë.
49 Se sa,
amea shi na ja sa fesan napai shi sa fidu ku san daleaf,
se ten sa amea shime ku no ten ske sa ku fesan nguë shi sa dji ösë.
50 Amu ngongo faa namsëdji,
nna namain,
fa zhugan pöjödölö ku ja mölë na paadji të pachi fo gövöndölö Nashianf,
se jö shi ja ske poto poto na paadji sa pachi jö shi na ja poto potof.
51 *Mandji se amu ngongo pa namsëdji jönsë kumi ja Nashian:
No tudu na se ske mölëf,
mandji se no tudu ske vla tukadu,
52 dantu uan tempu,
ta a ja bla öiö ku a tan ja sua,
ta a ja da jabamentu fala pitu.
Pakë fala pitu ske da se nna nguë mölë bebezha tan ske lanta bi vida ku uan öguë ku na ja poto potof,
se no ske vla tukadu.
53 Pakë öguë poto potodu no ske kubili ku uan öguë ku na ja poto potof,
se öguë mölidu no a ske kubili ku öguë shi ku na ja mölëf.
54 Se ta öguë no se ja poto poto iai se a ske kubili ku i shi na ja poto potof,
ku ta öguë mölidu ske sa kubili ku i shi na ja mölëf,
se ske kumpli jö shi Fa Nashian ja faa:
«Se mölë se sa ngulidu dajantu ngana.
55 ¿Kë jamian shi ngana bo sa,
ö mölë?
¿Kë jamian shi pian dumadu bo sa,
ö mölë?».
56 Pakë pian dumadu pekadu se sa mölë,
se alë se ja da pekadu pödë dëli.
57 ¡Mandji se dezhupaga ku Nashiolo,
ku da no pödë pa no ngana amea Shiölö no Djisukilitu!
58 Dajantu shi,
nna namain kilidu amu;
pa namsëdji ja mdja dëtu ola tudu,
ja ska tabaia olatuvëdji mashi ku mashi dantu tabaia Shiölö,
pakë namsëdji ja sëbë fa zhugan tabaia ku a ja fë da Shiölö na ja shipë shif.