Fala pata patadu ku fala nna pantafala
14
Namsëdji,
dishia ngongo;
a shime ten ja dishia gagavu ineñ shi ja fo Spitu Nashiolo,
se liba ja tudu pa ja fala nna pantafala.
2 Nguë shi ja faa fala pata patadu,
ëli ja faa fala ku Nashiolo,
na ja sa ku nna pöjödölöf,
pakë zhugan nguë na ja tëndë ëlif.
Fo spitu dëli se ëli ja faa kumi vedadji,
mandji se zhugan nguë na ja tëndëf.
3 Mandji se nguë shi ja da lazhan fala nna pantafala,
ëli ja fë pa utu nguë ja të foshi,
pa ja të añimu ku pa ten ja të dölö.
4 Nguë shi ja faa fala pata patadu,
ëli ja fë da tuludöguë dëli ödu;
mandji se nguë ja faa fala nna pantafala,
ëli ja fë pa guëzha ja ödu.
5 Amu ja ngongo pa namsëdji tudu ja faa fala pata patadu,
mandji se amu ja ske ja ngongo mashi pa namsëdji ja faa fala nna pantafala;
jö sai se gavu mashi ku faa fala pata patadu,
shi ja të uan nguë ku ja paadji da ötëndë jö shi ja sa,
valadji pa shivi pa guëzha ja të foshi.
6 Nna namain,
shi amu ja ua namsëdji se amu ja faa namsëdji ku fala pata patadu,
¿kë ja ske zhuda namsëdji shi amu na ja faa ku namsëdji ja msa kuzhufa,
ö ku tëndëmentufa,
ö ku uan fala pantafalafa ö ku uan ja pa shina nguë kuzhuf?
7 Se shi jö ineñ shi a ja ma janta,
shimafan uan pitu ö uan pandë,
na ja da fala tukaduf,
a na ske paadji jönsë fala shi ineñ ska daf.
8 Se shi,
dantu djia pezha,
se pitu na ja da gavu amea shi pa tëndëf,
zhugan nguë na ske sa plesteñi valadji pa ba pezhaf.
9 Se sa amea shime ku ja pasa ku namsëdji:
shi namsëdji na ja usa lunga pa ja faa fala pa ja tëndë gavuf,
¿kë amea shi a ske ja tëndë jö ineñ shi namsëdji ska fala?
Namsëdji ske ja ska faa fala shimafan ja a ska faa fala ku fiezha.
10 Dantu mundu sai të uan sapa fala pata patadu,
se zhugan na ja sa shinke të sinchiduf.
11 Mandji se shi amu na ja tëndë sinchidu uan falaf,
amu ja sa uan nguë utu tela patadu da nna nguë ineñ shi ku ja ska faa fala,
se nguë shi ja ska faa fala ja sa uan nguë tela patadu da amu.
12 Se ten sa jö shime ja pasa ku namsëdji.
Pakë namsëdji ja sa ku dishamentu ngandji da ja gagavu fo spitu Nashiolo,
pa namsëdji ja da nguë,
ineñ shi ja fë guëzha të foshi.
13 Dajantu shi,
nguë shi ja ska faa fala pata patadu,
pa ëli ja pindji Nashian pa ja da ëli pödë pa ëli ja da nguë ötëndë.
14 Pakë,
shi amu ja lezha ku fala pata patadu,
sa vedadji fa amu ja ska lezha dantu spitu amu,
mandji se amu na ja ska tëndë jö ineñ shi amu ja ska faaf.
15 ¿Tadashi kë ja ta pa amu fë?
Ta amu ja lezha dantu spitu,
mandji a shime ku tëndëmentu.
Ta pa amu ja janta dantu spitu,
mandji a shime ku tëndëmentu.
16 Pakë shi bo ja alaba ku spitu moso,
se uan pöjödölö shipë ja tëndë bo,
¿kë amea shi uan nguë ku a na shina jö ineñ sef ske faa «¡Amen!»,
da fidu ja galasa bo,
öshi ëli na tëndë jö shi bo faaf?
17 Bo ske ja da dezhupaga gavu,
mandji se na ske ja fë pa utu nguë ja öduf.
18 Amu ja da Nashiolo dezhupaga pakë amu ja faa fala pata patadu mashi ku namsëdji tudu;
19 mandji se dantu guëzha amu ja ngongo pa amu ja faa fala shinku pa ja tëndë,
pa amea sai pa ja shina utu nguë kuzhu,
mashi ku pa amu ja faa uan deshi milidji fala ku utu fala pata patadu.
20 Nna namain,
namsëdji na ja ska mazhna ja shimafan naminaf.
Namsëdji ja sa shimafan namina da ja fëfëiu,
mandji pa namsëdji ja sa nna nguë ngangandji ta ja da mazhna ja namsëdji.
21 Dantu alë ja faa:
«Amu ske faa tela se ku fala pata patadu
amea olea böjö nna nguë utu tela.
Mandji se benga zha pa sa shi se ineñ na ja tëndë amuf»,
Shiölö ja faa shi.
22 Tadashi,
faa fala pata patadu sa uan shinali da nna nguë ineñ shi na ja këlëf,
na sa da nna nguë ku na ja të jonfaf.
Mandji se da uan nova nna pantafala sa uan shinali da nna nguë ineñ shi ja të jonfa,
na ja sa da nna nguë ku na ja këlëf.
23 Pakë ta nna nguë guëzha ja sa zhuntadu,
shi nguë tudu ja ska faa utu fala pata patadu,
se ja lantela uan nguë shipë ö uan nguë ku na ja këlëf ëli ja fo mazhna fa namsëdji tudu ska dana.
24 Mandji se shi nguë tudu ja ska da nova nna pantafala,
se ja lantela uan nguë ku na ja këlëf ö uan nguë shipë;
ëli me se ske këlë se ëli ske golo ta ëli ske ja tëndë jö ineñ shi ineñ ska fala.
25 Se sa amea shi kumi ja ku ja fo fundu kusan dëli,
ske mdja betu,
se ineñ ske ja adola ja dajözhöiö deenchi Nashiolo,
se ineñ ske jönsë fa:
«¡Sa vedadji fa Nashian sa dantu namsëdji shishizhu!».
Fë ja tudu ku odji
26 ¿Kë jabamentu ja no ske fala,
nna namain?
Ta namsëdji ja zhunta,
pa unian unian namsëdji ja janta salmos,
ku shina nguë kuzhu,
ku msa nguë kuzhu,
ku fala pata patadu ku pa ja da nguë lazhan fala pata patadu;
mandji pa jö ineñ se tudu ja sa ja valadji pa guëzha ja të foshi.
27 Se ta a ja faa fala pata patadu,
pa nguë dösu ö nguë tëishi ö mashi,
pa ja sa unian unian,
a shime,
pa uan nguë ja da ötëndë jö ineñ shi ineñ ja ska fala.
28 Mandji se shi na ja të zhugan nguë pa ja da nguë ötëndëf,
pa ineñ na ja faa fala pata patadu deenchi nna nguë guëzhaf,
shina apachi da Nashiolo.
29 Se sa amea shime,
shi ja të nna pantafala,
pa ineñ dösu ö tëishi ja faa fala,
ku utu nna nguë ineñ ja ska juzhga jö ineñ shi ineñ bi bi fala.
30 Mandji se shi Nashian ja msa uan nguë kuzhu utu pöjödölö ku sa ala tusan pë,
tadashi pa nguë shi pimëlu chama faa fala.
31 Pakë amea sai se nguë tudu paadji pantafala fo unian unian nguë,
valadji pa nguë tudu ja shina kuzhu ku pa nguë tudu ten ja ma añimu.
32 Se spitu nna pantafala ta pa sa basu nna pantafala.
33 Pakë Nashiolo na sa Nashian ja buiadu buiadufa,
shina sa dji padji.
Ja ska lë kutumu shi ja sa ku pövu santu dantu guëzha tudu,
34 ske ta pa nna naamain ja ta filili dantu zhunta guëzha,
pakë a na ja lega pa ineñ faa falaf.
Ta pa ineñ ja sa basu nna medu dëneñ,
amea shi alë ja manda.
35 Shi ineñ ja ngongo sëbë uan kuzhu,
pa ineñ ja pongota medu dëneñ dantu jadji dëneñ,
pakë na ja sa gavu pa uan naamain ja faa fala dantu zhunta guëzhaf.
36 Namsëdji na ja mazhna fa Fa Nashiolo jomesa ku namsëdjif,
ñi namsëdji moso na se ponodu nna nguë ëli maf.
37 Shi uan nguë ja ska këlë fa ëli sa pantafala,
ö ëli ja këlë fa Nashian ja faa fala ku ëli amea Spitu Santu,
ëli ske jönsë fa jö sai ku amu ska skëvë da namsëdji iai sa uan mandatu fo Shiölö.
38 Se nguë shi na ja jönsë ëlif,
se Shiölö na ten ske jönsë ëlif.