Gagavu fo Spitu Santu
12
Nna namain;
amu ngongo pa namsëdji të tëndëmentu tëjantu ku ja gagavu ineñ shi Spitu Santu ja da nguë.
2 Namsëdji sëbë fa djia shi ontolo namsëdji sa nna nguë ineñ shi na ja këlë Nashianf,
namsëdji bi ska lega pa ja ma namsëdji bai ku öiö tapadu tashi nna nashian balu ku na ja paadji faa falaf.
3 Dajantu shi,
amu ngongo pa namsëdji sëbë fa zhugan nguë ku ja faa fala amea Spitu Nashiolo na ja ta Djisu masanf;
se zhugan nguë na fo faa Djisu se sa Shiölö shi ëli na ja të Spitu Santuf.
4 *Dantu guëzha ja të klase ja gavu dödji pata patadu;
mandji se nguë shi ja da nguë jö sai ja sa Spitu shime.
5 Të amea gagavu pata patadu pa ja ma shivi,
mandji se tudu ja sa ja pa shivi Shiölö shime.
6 Nashian ja tabaia amea pata patadu,
mandji se ja sa tuludöguë Nashian shime ku ja fë fidu ja dëli ku no tudu.
7 Nashian ja da unian unian nguë gagavu Spitu Santu dëli valadji pa no ja ska zhuda no no me.
8 Se amea Spitu sai,
se a ja da uan nguë ja faa fala ku tëndëmentu;
se utu nguë,
amea Spitu se me,
se a ja da ineñ pa ja faa fala ku sëbë kuzhu monchi.
9 Se utu nguë ja të jonfa amea Spitu shime,
se utu ineñ ja të ja gavu dödji pa ja kula nguë ku ja ska danchi.
10 Utu ineñ ja të pödë pa ineñ ja fë fidu ja ngangandji;
se utu nguë ja të pödë pa ja sa pantafala.
Se zhugan ineñ,
se a ja da ineñ tëndëmentu pa ineñ ja jönsë Spitu Nashiolo ö spitu fanchila.
Se ontolo a ja da utu nguë tëndëmentu pa ineñ ja faa utu fala pata patadu ku a na ja jönsëf;
se utu nguë se a ja da ineñ tëndëmentu pa ineñ ja da lazhan jö shi ku faa sai ja fala.
11 Mandji se uan ponodu Spitu shime se ja fë jö ineñ se tudu,
ku se ja pachi nguë tudu amea shi ku ëli mazhna pa ëli fë.
Uan öguë ku uan sapa pachi pachi
12 *Pakë öguë pöjödölö,
benga zha pa sa fidu ku uan sapa pachi,
ja sa uan ponodu öguë soso.
Se ten sa amea shime ku Kilitu.
13 Se amea se me,
ku no tudu,
nna judio ku nna nguë ineñ shi ku na sa judiof,
nna sëlëva ku nna legadu,
a bi bachizha no tudu valadji pa no vla fë uan ponodu öguë amea uan ponodu Spitu,
se a da no tudu bëbë fo Spitu shime.
14 Uan öguë na ja sa fidu ku uan pachi sosof,
shina fo uan sapa pachi pachi.
15 Se shi ope ja faa:
«A shi ku amu na sa ömaf,
amu na sa pachi döguëf»,
na sa dajantu shi se ëli ske chama sa pachi döguëf.
16 Se shi olea ja faa:
«A shi ku amu na sa öiöf,
amu na sa pachi döguëf»,
na sa dajantu shi se ëli ske chama sa pachi döguëf.
17 Shi öguë tudu bi sa öiö,
no na bi ske ja tëndë jaf.
Se shi öguë tudu bi ja sa olea,
no na bi ske ja tëndë sëlu jaf.
18 Mandji se Nashian pë pachi öguë tudu jamian shi ëli bë pa sa gavu mashi.
19 Shi öguë tudu bi ske sa uan pachi soso,
na bi ske të öguëf.
20 Vedadji jö sai sa fa,
benga zha pa sa uan sapa pachi pachi,
öguë ja sa uan soso.
21 Se öiö na paadji faa ömaf:
«Bo na fë amu fataf»;
se ñi jasa na paadji faa opef:
«Namsëdji na fë amu fataf».
22 Mandji se;
pachi döguë ineñ shi ku se tan ja sa levu mashi,
se sa ineñ shi tan ja fë nguë fata mashi,
23 se pachi döguë ineñ shi ku no na ja da ondolo monchif ai,
se ja sa ineñ shi no ja bishi ku pinchidu mashi.
Se pachi ineñ shi no na ja ska bë gavuf,
se sa pachi ineñ shi no na ja ska ngongo msaf,
24 mandji se pachi ineñ shi të ondolo mashi na se a ja fë lazhan mashif.
Se Nashian jözhë öguë pë amea shi pa pachi döguë ineñ shi ku a na ja ngongo jö ineñ muntëf se ja da ondolo mashi,
25 valadji pa na ja baga fë uachi uachi dantu döguëf,
shina pa pachi döguë tudu ja sa tave utu pachi pachi.
26 Shi uan pachi döguë ja ska ma mavida,
pachi pachi ineñ shiki tudu ten ske ja ma mavida;
se shi uan pachi döguë a ja ska da ondolo amea patadu,
pachi ineñ shiki tudu ja sa ku liguilia ku ëli.
27 Namsëdji tudu sa öguë Kilitu,
se unian unian namsëdji tudu sa uan pachi ku ja ska fë uan ja pata patadu.
28 *Nashian bi ngongo pa dantu guëzha:
pa ja të pimëlu pimëlu,
nna apostol,
pa i shi ja fë dösu,
pa sa nna pantafala,
i shi ja fë tëishi,
pa sa nna meeth,
zha se ja bi nna nguë ku ja fë fidu ja ngangandji da Shiölö,
se utu nguë ku ja sa ku ja gavu dödji pa ja kula nna nguë ku ja ska danchi,
se bi nna nguë ku ja zhuda,
se bi nna nguë ku ja sa mötölö,
se ja bi nna nguë ku ja faa fala pata patadu.
29 ¿Sa fa no tudu sa nna apostol?
¿No tudu sa nna pantafala?
¿No tudu sa nna meeth?
¿No tudu sa ku pödë pa no fë fidu ja ngangandji da Shiölö?
30 ¿No tudu sa ku ja gavu dödji pa ja kula nna nguë ku ja ska danchi?
¿No tudu paadji faa utu fala pata patadu?
¿No tudu paadji da ötëndë fala pata patadu?
31 Ske ta pa namsëdji ja dishia ja gavu dödji mashi fo Spitu.
Mandji se amu ske bi msa namsëdji uan jamangandji ku se gavu mashi.