11
*Namsëdji ja ska lë zhampulu amu,
amea shi ku amu ja ska lë zhampulu Kilitu.
Shina nna naamain kubili jasa dëneñ
2 Ja fë gavu da amu pakë amu ja sëbë fa olatuvëdji namsëdji ja ska lambela amu se namsëdji ten ja ska gada jö ineñ shi amu bi bi shina namsëdji iai.
3 Mandji se amu ngongo pa namsëdji sëbë fa:
Kilitu se sa jasa napai tudu,
se medu se ja sa jasa miela dëli,
ku se sa amea shi Nashian se sa jasa Kilitu.
4 Shi uan napai ja kubili jasa dëli ta ëli ja ska lezha ö ku ëli ja ska da lazhan uan nova pantafala,
ëli na ska da jasa dëli ondolof.
5 Mandji se,
shi uan naamain na ja kubili jasa ta ëli ja ska lezha ö ta ëli ja ska da lazhan uan nova pantafalaf,
ëli na ska da jasa dëli ondolof.
Ja sa shimafan ja ëli lapa jasa dëli.
6 Pakë shi uan naamain na ja kubili jasa dëlif,
ja sa gavu mashi pa ëli lapa uan vëdji soso.
Mandji se shi naamain se ja pia jö sai shimafan uan govan pa ëli pota jabelu ö lapa jasa,
tadashi pa ëli ja kubili jasa dëli.
7 Na ta pa napai ja kubili jasa dëlifa,
pakë ëli se sa fesan Nashiolo se ëli ja msa gloria Nashiolo.
Mandji se naamain ja msa gloria napai.
8 Pakë a na chila napai fo naamainf,
shina naamain se a chila fo napai.
9 Se a na mindji napai dajantu naamainf,
shina naamain se mindji dajantu napai.
10 Dajantu jö sai,
se tëjantu ku nna anzhu ja ska pia,
naamain ta pa kubili jasa shimafan shinali pödë.
11 Mandji se,
dantu pövu Shiölö,
napai na fo sa shin naamainfa,
ñi naamain na ten fo sa shin napaif.
12 Pakë benga zha pa sa vedadji fa a chila pimëlu naamain fo napai,
se a shime napai a ten ja pali fo naamain;
se ja tudu ja sa ja fo Nashiolo.
13 Tuludöguë namsëdji ja juzhga i shi ja sa gavu pa naamain ja lezha da Nashian shinke ëli kubili jasa dëli.
14 Amea fidu ja mundu,
ja shina no fa sa uan govan pa uan napai ja lega pa jabelu dëli ja këësë;
15 mandji se,
sa uan ja dondolo da naamain pa ëli ja lega pa jabelu dëli ja këësë,
pakë a da ëli jabelu löngö valadji pa ëli ja kubili jasa dëli.
16 Shi uan nguë ontolo ja ngongo sëbë mashi ja tëjantu ku jö sai,
ta pa ëli sëbë fa ñi no ñi nna nguë utu guëzha Nashiolo na tan jönsë utu kutumuf.
Fata ondolo liba Mezha Shiölö
17 Ta amu ja shina namsëdji jö ineñ sai,
amu na ja paadji da gavu namsëdjif,
pakë tan ja kë ja namsëdji na ja zhunta da ja gagavuf shina da ja fëfëiu.
18 Fo pimëlu kuzhu,
se a da amu lazhan fa ta nna nguë guëzha ja zhunta,
ja të uachi dantu namsëdji,
se fo uan pachi amu ja këlë fa sa vedadji.
19 Pakë fë fata pa të uachi dantu namsëdji,
valadji pa ja jönsë namsëdji ineñ shi sa ku aen Nashiolo.
20 Se jö shi a ja chila fo uachi uachi ineñ sai,
sa fa,
kumu ineñ shi,
namsëdji ja kumu dantu zhunta namsëdji iai na tan ja sa kumu Mezha Shiölö shishizhuf.
21 Pakë ta ja da tempu pa kumu,
se unian unian ja ska pasa nguë deenchi ja kumu tuludöguë kumu dëli;
mandji se utu nguë ja ska mdja ku faku,
se utu nguë ja ska beda.
22 ¿Namsëdji na sa ku jadji pa ja kumu ku pa namsëdji ja bëbëfa?
¿Jama fë namsëdji na ja da guëzha Nashiolo ondolofa,
se namsëdji ja fë pa nna nguë ineñ shi na ja të zhugan jaf ja pasa govan?
¿Kë ja amu ske paadji faa namsëdji?
¿Pa amu da namsëdji ilö?
¡Na,
zhugan limedji shif!
Kumu liba Mezha Shiölö
23 Pakë amu ska da namsëdji lazhan jö shi tuludöguë Shiölö se da amu lazhan,
se amu ska shina namsëdji:
Fa nöchi shime ku se a vëndë Shiölö Djisu,
se ëli ma ampan,
24 se ta ëli da Nashian dezhupaga,
se ëli pachi se ëli faa:
«Jö sai se sa öguë amu,
ku amu da dajantu namsëdji;
namsëdji ja fë jö sai pa ja lambela amu».
25 Se amea shime,
ta a kumu jaba,
se ëli ma pukulu se ëli faa:
«Pukulu sai se sa bechi shi novu ku sangui amu;
namsëdji ja ska fë jö sai olatuvëdji shi ku namsëdji ja ska bëbë,
ja lambela amu».
26 Ja ska fë amea sai,
ba toja pa Shiölö tan bi,
pa namsëdji ja ska pegua mölë dëli ola shi namsëdji ja ska kumu ampan sai ku ja bëbë fo pukulu sai.
Amea shi pa ja kumu liba Mezha Shiölö
27 Se amea sai,
ja sa nguë shi ja kumu ampan sai ö ja bëbë fo pukulu Shiölö shin ondolo,
ëli ske sa ku kupa tëjantu ku öguë ku sangui Shiölö.
28 Dajantu shi,
pa unian unian nguë ja ska golo golo maian döguë dëli me anta pa ëli ja kumu ku ja bëbë fo pukulu sai.
29 Pakë nguë shi ja kumu ku ja bëbë shinke ëli golo öguë Shiölö,
ëli ja kumu ku ja bëbë juisio pë öguë dëli.
30 Dajantu shi se të dantu namsëdji uan sapa nguë levu se utu nguë ja ska danchi,
se a shime uan sapa ineñ ten mölë bebezha.
31 Shi no ja ska golo golo gavu tuludöguë no no me,
Shiölö na ske ta pa juzhga nof;
32 se benga zha pa Shiölö ja da no jatigu ske sa valadji pa no shina kuzhu ku pa na kondena nof shimafan nna nguë ineñ sa nna nguë munduf.