Shina kuzhu tëjantu ku nna nashian balu
10
Nna namain,
amu na ngongo pa namsëdji na ja sa tave fa nna paipai no tudu bi ska nda basu növufa,
se ineñ tudu pasa omalif.
2 Se amea sai se ineñ tudu bi sa zhuntadu ku Moises ta ineñ tudu bi sa bachizhadu basu növu ku dantu domali.
3 Se sa amea shime,
ineñ tudu kumu manchimentu spitu shime,
4 se ineñ tudu bëbë fo bëbë shi spitu shime.
Pakë ineñ bi ska bëbë aua fo lapa spitu shi bi ska be vadji ku ineñ,
ku se sa Kilitu.
5 Mandji se uan sapa ineñ na fë ja gavu da Nashianf,
se dajantu shi se öguë dëneñ mdja basu solo dantu jamian sölö sölö.
6 Jö ineñ se tudu shiga shimafan zhampulu da no,
valadji pa no na ja dishia ja fëfëiufa,
shimafan ta ineñ bi dishiaf,
7 ñi pa namsëdji na ja adola nna nashian baluf,
shimafan ta zhugan ineñ bi bi fëf,
amea shi Fa Nashian faa:
«Nna nguë tudu bi tusan ja kumu ku ja bëbë,
zha se ineñ lanta pa fë ja ku liguilia».
8 Na ja da öguë no fë ja nda ölöluiaf,
amea shi zhugan ineñ ja fëf,
ku dajantu shi ku uan ponodu djia se uan vinta ku tëishi milidji pöjödölö mölë.
9 Ñi pa no na ten puva Kilituf,
amea shi zhugan ineñ bi fëf,
ku dajantu shi ku jobolomatu munda ineñ ku ineñ mölë.
10 Ñi pa namsëdji na ja lo Nashian malif,
amea shi zhugan ineñ lo ëli mali,
ku dajantu shi ku anzhu shi ja mata nguë mata ineñ.
11 Jö ineñ sai tudu shiga nna paipai no shimafan zhampulu da no,
se sa skividu dantu Fa Nashiolo shimafan ja pa no ja pinchidu dantu jabamentu tempu se no ska bibe iai.
12 Dajantu shi,
nguë shi ja pë fa ëli sa mdjadu,
pa ëli ja pinchidu pa ëli na ponof.
13 Namsëdji na sa pasa zhugan tentasan dantu vida namsëdji ku utu dji nguë na sa pasa ie zhaf.
Se namsëdji ja paadji jonfa Nashiolo,
ku na ske lega pa namsëdji padësë zhugan tentasan mashi ku i shi a ja paadji gagaf.
Shina,
ta namsëdji ja të tentasan,
Nashian ske da namsëdji uan poto pa namsëdji së,
valadji pa namsëdji paadji gaga.
14 Dajantu shi,
nna namain kilidu amu,
ja jölë fo adola nna nashian balu.
15 Amu faa ku namsëdji shimafan nna pöjödölö ku të tëndëmentu,
namsëdji me juzhga fa jö ineñ shi amu ska faa namsëdji sa vedadji.
16 *Ta no ja bëbë fo pukulu dezhupaga ku se no ja ma da Nashian dezhupaga,
no ska ma pachi shime fo sangui Kilitu;
ta no ja kumu ampan shi no ja pachi iai,
no ja ma pachi shime fo öguë Kilitu.
17 Se benga pa të uan ponodu ampan,
se no sa monchi ku uan öguë soso,
se dajantu shi se no ja ma pachi ampan shime.
18 Namsëdji ja pia pövu Israel:
¿nna nguë ineñ shi ja kumu limaia ineñ shi a jama fë saklifisu,
se ineñ na ja të pachi sulvisu datali ua?
19 ¿Kë ja amu ngongo fala?
¿Fa kumu shi a ja fë saklifisu da nna nashian balu sa uan ja ngandji ö nna nashian balu sa nna nashian shishizhu?
20 Na,
zhugan limedji shif.
Jö shi amu ska faa sa fa saklifisu ineñ se sa ja a ja fë da nna damono,
na sa da Nashianf.
Se amu na ngongo pa namsëdji të pachi zhugan jö shime ku nna damonof.
21 Namsëdji na paadji bëbë fo pukulu Shiölö,
pa öshime,
fo pukulu nna damonof;
ñi namsëdji na paadji ma pachi fo mezha Shiölöfa;
pa öshime,
fo mezha nna damonof.
22 ¿Sa fa no ngongo pa Shiölö ma pashian?
¿Sa fa no se ödu mashi ku ëli?
23 *Namsëdji ja faa:
«Uan nguë ja sa legadu pa ëli ja fë jö shi ëli ngongo fë»,
mandji se ja tudu na se sa ja sa gavuf.
Namsëdji ten ja faa:
«Uan nguë ja sa legadu pa ëli ja fë jö shi ëli ngongo fë»,
mandji se ja tudu na se ja zhudaf.
24 Na ja ska jua gavu da tuludöguë bof,
shina gavu da utu dji nguë.
25 Namsëdji ja ska kumu jö ineñ shi a ja ska vëndë dantu jamian vëndë jañi tudu;
shin pongota zhugan kuzhu ku ja tëjantu ku kusan limpi namsëdji.
26 Pakë «mundu nguintëlu nguintëlu,
ku jö ineñ shi sa dantu dëli tudu,
sa ja Shiölö».
27 Shi uan nguë ku na ja këlëf ja sama namsëdji ba kumu,
se namsëdji ja ngongo bai,
namsëdji ja kumu jö ineñ shi ëli ja shivi namsëdji tudu,
shin pongota zhugan kuzhu tëjantu ku kusan limpi namsëdji.
28 Mandji se shi uan nguë ja faa namsëdji:
«Jañi sai sa ja a fë saklifisu da nna nashian balu»,
tadashi namsëdji na ja kumuf,
tëjantu ku kusan limpi namsëdji.
29 Amu ska faa ja tëjantu ku kusan utu dji nguë,
na sa dji namsëdjif.
Amu na ta pa fë pa legadu amu se a ja ma juzhga kusan limpi utu pöjödölöf.
30 Shi amu ja da Nashian dezhupaga da jö shi amu ja kumu,
¿na ta pa ja ska kondena amu da jö shi ku amu ska kumu ku ba toja ku amu da Nashian dezhupaga bebezhaf?
31 Se sa shi,
ja sa jö shi namsëdji ja kumu,
ku namsëdji ja bëbë,
ja sa utu jö shi namsëdji ja fë,
ja fë jö ineñ se tudu da gloria Nashiolo.
32 Na ja fë pa zhugan nguë ja da topuf;
ñi nna judiofa,
ñi nna nguë ineñ shi na sa judiof,
ñi nna nguë ineñ shi ja sa nna nguë guëzha Nashianf.
33 Amu,
fo pachi amu,
amu ja ngongo fë ja pa ja sa gavu da nguë tudu,
ku ja tudu,
shinke amu ja ska jua gavu döguë amu,
shina dji utu dji nguë,
valadji pa ineñ ja të savasan.