Dëtu uan apostol
9
Namsëdji na ske naga fa amu sa legaduf se amu të dëtu shi uan apostol ja tëf,
pakë amu ten bë Shiölö no Djisu,
se tuludöguë namsëdji me se sa fuluta tabaia amu dantu sulvisu Shiölö.
2 Benga zha pa utu nguë ja ska mazhna fa amu na sa apostolf,
mandji da namsëdji,
amu sa,
tuludöguë namsëdji se sa sëiu shi ja faa amu sa apostol fo Shiölö.
3 Se tëjantu ku nna nguë ineñ shi ja ska lo amu mali:
4 ¿Sa fa no na sa ku dëtu pa no ja kumu ku bëbë ua?
5 ¿No na sa ku dëtu pa no ja ma uan miela ku ja këlë bai ku nofa,
shimafan ta utu nna apostol ten ja fë ku nna namain Shiölö ku Sefas ua?
6 ¿Sa fa amu ku Bernabe se sa nna nguë ineñ shi moso na sa dëtu pa guëzha ja fë lazhan dëneñfa?
7 ¿Kë nguë shi ja ska shivi shimafan sodadji ku ja ska da pagu öguë dëli me?
¿Kë nguë ja shimian matu uva ku na ja kumu uva dëlif?
¿Kë nguë ja sa ludjadölö jabala ku na ja bëbë aua mama döböiö ögö jabalaf?
8 Se namsëdji na ja këlëf fa amu moso se ja mazhna jö sef,
pakë alë Moises ten ja fala.
9 *Pakë amea shi sa skividu dantu alë Moises:
«Na ja pë kau tapadu böjö ku panu ta ëli ska pope öpa jambabu tuluguf».
¿Sa fa Nashian ja sa tave nna kau,
10 ö ëli ja faa shi dajantu no?
Pakë alë sa ja a skëvë dajantu no,
pakë ta shimadölö ja golo san se nguë shi ja pope öpa jambabu tulugu,
ta pa ëli ja fë ku alagada pa ineñ totolo pachi dëneñ.
11 *Se shi,
no ja shimian shimenchi fo spitu dantu namsëdji,
¿ske sa ja ngandji muntë pa no pindji pa no totolo ja gagavu?
12 Shi utu nguë ja të dëtu liba namsëdji,
¿no na se ske të dëtu liba namsëdji mashi ua?
Mandji se no na ja ma dëtu sef,
se no bi ska gaga jö ineñ se tudu,
valadji pa no na pë zhugan topu ku pegua evanjelio Kilituf.
13 Namsëdji sëbë fa nna nguë ineñ shi ja tabaia da sulvisu jadji Nashiolo,
ja bibe da jadji sai.
Sa fa nna nguë ineñ shi ja tëndë ku ja datali jamian shi a ja fë saklifisu,
ineñ ja kumu jañi limaia ineñ shi a ja ma fë saklifisu.
14 *Se ten sa amea shime ku,
Shiölö da odji pa nna nguë ineñ shi ja pegua evanjelio pa ineñ ja bibe fo evanjelio sai.
15 Mandji se zhugan djia amu na ma zhugan dëtu ineñ sef,
se ñi amu na ten ska skëvë jö ineñ sai valadji pa namsëdji da amu zhugan jaf.
Amu ngongo pa amu mölë mashi ku pa amu fë jö sai.
¡Zhugan nguë na paadji chila këlëdöguë se sa ku amu iai folof!
16 Da amu,
pegua evanjelio na sa ja pa amu ja këlëdöguë amuf,
pakë ja sa ja ku amu ja bë shimafan uan ja ku a fë amu foshi pa amu fë.
¡Se puvili amu shin amu na ja pegua evanjeliof!
17 Dajantu shi,
shi amu ja fë ku vintadji gavu,
amu ske sa dëtu pa da amu uan ja gavu,
mandji shi a ja fë amu afoshi,
ske sa fa amu ska fë ja kumpli ku tabaia mötölö shi ku a jonfa amu.
18 ¿Tadashi,
a kë i shi sa pagu amu?
Se ja sa fölöshö pa amu pegua evanjelio shin ma pagu fo zhugan nguë.
Sa fa,
shinke amu msa dëtu shi sa ku amu pa amu bibe dajantu pegua evanjelio.
19 Benga zha pa amu na sa sëlëva zhugan nguëf,
mandji se amu fë pa amu sa sëlëva nguë tudu,
valadji pa amu ngana da Kilitu namolo pöjödölö mashi shi amu ja paadji.
20 Ta amu bi sa metadji nna judio se amu ja vla fë uan judio,
valadji pa amu ngana ineñ.
Sa fa,
pa amu ske ngana nna nguë ineñ shi ja bibe basu alë Moises;
tuludöguë amu sa basu alë sai,
benga zha pa ske da vedadji amu na sa basu dëlif.
21 Se utu pachi,
pa amu ske ngana nna nguë ineñ shi na ja bibe basu alëf,
amu ten vla fë shimafan uan ineñ,
benga zha pa ske da vedadji amu sa basu alë Nashiolo,
da öshi amu sa basu alë Kilitu.
22 Ta amu bi sa ku nna nguë ineñ shi foli dantu jonfa,
se amu ja vla uan nguë foli shimafan uan ineñ,
valadji pa amu ten ngana ineñ.
Sa fa,
amu fë amu shimafan nna nguë tudu,
valadji pa amu paadji sava zhugan ineñ amea sai.
23 Se jö ineñ se tudu amu ja fë dajantu evanjelio,
valadji pa amu paadji të pachi besa dëli.
24 Namsëdji sëbë fa dantu mindji jölë nguë tudu ja jölë,
mandji se uan nguë soso se ja ngana.
Sa gavu,
pa namsëdji ja jölë amea shi pa namsëdji ja ngana.
25 Nna nguë ineñ shi ja fë vadu pa ineñ ja sa dantu uan fuga,
ineñ ske ja ata,
da jö ineñ shi ja paadji fë ineñ fëiu.
Se jö ineñ sai,
ineñ ja fë valadji pa ineñ ja ngana uan jölöiö ku tan ja vlame soja;
mandji se,
no ska pezha pa no ngana uan jölöiö ku ja sa pa sempele.
26 Amu,
fo pachi amu,
amu na ja jölë ku öiö tapadufa ñi pezha shimafan ja amu ska da fiezha ku kuzhuf.
27 Shina,
amu ja da öguë amu afoshi ku kuzhu,
se amu ja pë ëli pa ëli sa sëlëva amu,
valadji pa amu na mdja tashi öshi amu se bi pegua da utu nguëf.