Kesa deenchi nna nguë juzhga nguë ku na ja këlëf
6
Ta zhugan uan namsëdji ja sa ku kesa ku utu namsëdji,
¿jama fë namsëdji ja pindji djustishi deenchi nna nguë ku na ja këlëf,
jama fë namsëdji na ja pindji dantu no shimafan nna namainf?
2 ¿Sa fa namsëdji na sëbëfa namsëdji sa nna namain ineñ shi ske juzhga kesa mundu sefa?
Se shi namsëdji se ske juzhga mundu sai,
¿jama fë namsëdji na ja paadji juzhga fi jö ineñ sef?
3 ¿Namsëdji na sëbëfa no se ske juzhga nna anzhu ua?
¡Jantu mashi uan fi jö ineñ shi sa ja vida sai!
4 Se sa fa,
shi namsëdji ja ska të kesa tëjantu ku ja vida sai,
¿jama fë namsëdji ja pë jues liba namsëdji nna nguë ku na ja sa ku ondolo dantu guëzhaf?
5 Amu ja faa jö ineñ sai valadji pa ja da namsëdji govan:
¿Sa fa na të zhugan nguë ku shizhu dantu namsëdji pa ja juzhga kesa dantu nna namain dëneñfa?
6 Shina ja sa patadu,
uan namain ja ska pindji djustishi ku utu namain,
¡se jö sai ja sa deenchi nna nguë ku na ja këlëf!
7 Ku jö se moso ku a faa namsëdji ja ska të kesa dantu namsëdji iai sa uan ja fëiu ngandji muntë.
¿Pakë jama fë namsëdji na ja paadji gaga zhugan ja fëiuf?
¿Pakë,
jama fë,
tan gavu mashi,
pa namsëdji ja lega pa ja futa namsëdjif?
8 ¡Mandji se namsëdji,
amea patadu,
namsëdji ja ska fë ja fëfëiu ku ja ska futa tuludöguë nna namain namsëdji!
9-10 ¿Namsëdji na sëbëfa nna nguë ineñ shi ja ska fë ja malvadu na ske të pachi dantu gövöndölö Nashian ua?
Na lega pa ngaña namsëdjif,
pakë nna nguë fë ja nda ölöluia,
ñi nna nguë adola nna nashian balu,
ñi nna nguë kabajölöiö,
ñi nna nguë ja fë ja naamain,
ñi nguë ja fë ja fëfëiu napai ku napai,
ñi nna nguë sa futadölö,
ñi nna nguë jasu,
ñi nna bedadölö,
ñi nna nguë pogogovan,
ñi nna nguë fë nguë danadu,
na ske të pachi dantu gövöndölö Nashianf.
11 Se sa amea shi zhugan namsëdji bi sa;
mandji se öseshi se a laba namsëdji bebezha,
se a fë namsëdji santu,
se a fë namsëdji dëtu a namu Shiölö Djisukilitu ku fo Spitu Santu Nashian no.
No na sa legadu pa no ja fë pekaduf
12 *Namsëdji ja faa:
«Amu sa legadu pa amu fë jö shi amu ja ngongo».
Sa vedadji,
mandji se na sa ja tudu se ja gavu pa amu fëf.
Se benga zha «pa amu sa legadu pa amu ja fë ja sa jö shi amu ja ngongo fë»,
na ta pa amu sa basu zhugan jaf.
13 A shime a ten ja faa:
«Manchimentu sa ja a fë da chipa,
se chipa sa da manchimentu».
Sa vedadji,
mandji se uan djia Nashian ske jaba ku jö ineñ se dödösu.
Mandji se öguë na sa pa ja nda ölöluiaf,
shina da Shiölö,
se Shiölö sa da öguë.
14 Se amea shime ku Nashian lanta Shiölö fo dantu nna nguë mölë bebezha ku pödë dëli,
se sa amea shime ku ëli ten ske lanta no amea pödë dëli fo dantu nna nguë mölë bebezha.
15 ¿Namsëdji na sëbëfa öguë namsëdji sa pachi öguë Kilitu ua?
¿Se sa fa amu ske ma pachi öguë Kilitu pa amu të vla fë pachi öguë uan naamain dölöluia?
¡Zhugan limedji shif!
16 ¿Namsëdji na sëbëfa ta uan masebu ja zhunta ku naamain dölöluia,
ineñ dödösu ja vla uan öguë soso ua?
Pakë Fa Nashian ja faa:
«Se ineñ dödösu ske sa uan ponodu öguë soso».
17 Mandji se ta uan nguë ja zhunta öguë dëli ku dji Shiölö,
se ëli ja zhunta fë uan spitu soso ku ëli.
18 Namsëdji jölë fo fë ja nda ölöluia.
Zhugan utu pekadu ku uan pöjödölö ja fë,
na ja dana öguë dëli shimafan pekadu sef,
pakë nguë shi ja fë pekadu ja nda ölöluia sa uan pekadu ku ja tëjantu ku tuludöguë öguë dëli.
19 *¿Namsëdji na sëbëfa öguë namsëdji se sa jadji Spitu Santu ku Nashian se da namsëdji ua,
se Spitu Santu ja bibe dantu namsëdji ua?
Namsëdji na sa tuludöguë shiölö namsëdjif,
20 pakë Nashian se kumpa namsëdji.
Dajantu shi se ta pa namsëdji da öguë namsëdji ondolo.