Pelavöl kondena nna nguë nda ölöluia
5
Se nguë tudu ba sëbë fa uan namsëdji sa ku uan mooso ku sa mooso pai dëli.
Se jö sai ja sa uan ja nda ölöluia ku se sa jö shi tan fëiu mashi,
ku a na ja limian ñi dantu nna nguë ineñ shi na ja këlë Nashianf.
2 ¡Se ontolo namsëdji ja ska këlëdöguë namsëdji!
¡Ske ta pa namsëdji ja sa modoia!
Se masebu shi ja ska bibe amea sai ske ta pa chila ëli fo dantu namsëdji.
3 Se tëjantu ku amu,
benga zha pa ku öguë amu,
amu na ja paadji sa dantu namsëdjif,
spitu amu sa ku namsëdji,
se ske sa shimafan ja amu sa plesteñi,
amu juzhga nguë shi fë fidu jö sai.
4 Ta namsëdji ja sa zhuntadu,
spitu amu ske sa dantu namsëdji;
a shime pödë Shiölö no Djisu ske sa ku namsëdji.
Tadashi,
a namu Shiölö no Djisu,
5 ske ta pa da Satanas masebu sai,
valadji pa të öguë dëli të fea fea pa sava spitu dëli ta Shiölö tan ja bi.
6 *Namsëdji na sa ku dëtu pa namsëdji ja këlëdöguë namsëdjif.
Namsëdji jönsë jö shi a ja faa:
«Uan fi levadura se ja fë pa tulugu fuma».
7 Amea sai chila levadura shi veiu ku se ska të namsëdji të buia iai folo,
valadji pa namsëdji sa shimafan ampan ku a fë ku tulugu novu.
Namsëdji,
shishizhu sa shimafan ampan shin levadura shi a kumu djia fesa Paskua.
Pakë Kilitu,
ku se sa Jabala Paskua no,
ëli mölë da saklifisu no.
8 Se fë ku ta pa no na ja da fesa Paskua no ku levadura shi veiuf ku se a ja fë ja fëfëiu ku masan,
shina ku ampan shin levadura,
ku se ja sa shishizhu ku vedadji.
9 Dantu jaata amu shiki amu bi faa namsëdji pa na ja të lazhan ku zhugan nguë ku ja da öguë dëneñ a vida pekadu ja nda ölöluiaf.
10 Se ku jö sai amu na bi ngongo fa pa namsëdji safa ntëlelele fo nna nguë mundu tudu ku ja da öguë dëneñ pekadu ja nda ölöluiaf,
ö ku nna nguë jasu,
nna futadölö,
ö ku nna nguë adola nashian balu,
pakë pa fë jö ineñ sai ske ta pa namsëdji së fo mundu sai.
11 Jö shi amu bi ngongo fa namsëdji sa fa pa namsëdji na të lazhan ku zhugan nguë ku,
ja sama öguë dëli namain,
se ëli ja da öguë dëli a fë ja nda ölöluiaf,
ö ku ja sa jasu,
ku ja adola nna nashian balu,
ö ja faa ja fëfëiu;
ö sa bedadölö;
ö futadölö.
Na ja zhunta ku klase na pöjödölö ineñ sefa,
ñi pa na ja kumu ku ineñf.
12 Amu na sa pa amu se juzhga nna nguë öluiaf;
Nashian se sa nguë shi ske juzhga ineñ.
Mandji se namsëdji la ja juzhga nna nguë sa guëzha bebezha.
Dajantu shi,
chila pekadölö se fo dantu namsëdji.
13 Nashian ske juzhga nna nguë ineñ shi sa öluia,
mandji se amea shi Fa Nashian ja faa:
«Chila na nguë fë ja masan masan folo dantu namsëdji».