Tabaia nna apostol
4
Pa nguë tudu ja pia no nna shividölö Kilitu,
nna jasa mötölö kumi ja Nashiolo.
2 Se sa gavu öseshi,
a ja ngongo fo nna mötölö,
pa unian unian ineñ ja sa jonfadu.
3 Se tëjantu ku amu,
amu na ja sa tave zhugan fi ja shif pa namsëdji juzhga amufa ö utu nna jasa jasa juzhga nguëf.
Ñi amu na ja juzhga tuludöguë amuf.
4 Amu sa ku kusan limpi,
mandji se jö sai na ja msa fa amu sa ku dëtuf.
Tuludöguë Shiölö se ske juzhga amu se ëli se sëbë jö shi ëli ske fë.
5 Dajantu shi namsëdji na ja ska juzhga zhugan ja ta na ja sa da tempuf,
ja gada pa ta Shiölö ja bi,
pa ëli se chila jö ineñ shi ja ta jamian kulu bi deenchi fögö djidjidu ku pa ëli ten fë pa jönsë mazhnamentu ineñ shi sa dantu kusan.
Tadashi se Nashian ske da nguë tudu ilö shi ineñ ja mësë.
6 Nna namain,
amu faa namsëdji jö ineñ sai da gavu tuludöguë namsëdji,
se amu ja pë Apolos ku tuludöguë amu me shimafan zhampulu.
Amu ja faa namsëdji jö ineñ sai valadji pa namsëdji ja shina ja fo no ku ja da ötëndë fa «na ja be mashi ku jö shi sa skividuf».
Ku a shime pa zhugan nguë na ja këlëdöguë dëli mashif,
pa uan nguë ja sa gavu na ja pope nguë shi ja sa fëiuf.
7 Pakë,
¿kë dëtu sa ku namsëdji pa ja juzhga amea sai?
¿Kë ja sa ku namsëdji ku na sa ja Nashian se da namsëdjif?
Se shi jö ineñ shi sa ku namsëdji tudu sa ja fo Nashiolo,
¿jama fë bo ja këlëdöguë bo shimafan ja na sa ja a da bof?
8 Namsëdji sa ku jö ineñ shi fë namsëdji fata tudu.
Namsëdji sa liku bebezhaf.
¡Ba toja ku namsëdji ja sa shimafan alë,
jö ineñ sai shin no!
Bi ske sa gavu pa anta vedadji pa namsëdji ja sa alë valadji pa no ten sa alë ku namsëdji.
9 Zhugan vëdji amu ja mazhna fa,
no nna apostol,
Nashian pë no jabamentu jamian,
shimafan ja no sa nna nguë kondenadu a mölë.
No vla fë nna nguë pa mundu ja ua ku li böjö shimafan ja no na zhugan jaf,
da nna anzhu ku da nna pöjödölö.
10 No sa nna nguë danadu dajantu ku Kilitu,
mandji se namsëdji,
dezhupaga ku Kilitu se namsëdji ja sa nna nguë ku ja të tëndëmentu.
No ja sa nna nguë foli,
mandji se namsëdji ja sa nna nguë ödu.
No ja sa nna nguë nozhodu,
mandji se a ja da namsëdji ondolo.
11 Bi toja ödjai me no na chama padësë ku fomuf,
fomu daua ku fata bitidu,
nna nguë tudu ja fë no machi,
se no na ja të jadjif,
12 *se no ja jansa ja ska fë tabaia ku maian öma no.
Se ta a ja ta no masan se no ja kundji ku besa,
se a ja pëtëpë no,
se no ja gaga ku pashiensa.
13 Ta a ja suta no,
se no ja kundji ku ngongo.
A ja pia no shimafan ja nozho nozhodu ku iku mundu.
Se sa amea sai bi toja ödjai.
14 Amu na ska skëvë jö ineñ sai da namsëdji pa da namsëdji govanf,
shina pa namsëdji ja ma shizhu,
shimafan namina ngongodu.
15 Pakë benga zha pa namsëdji,
ja sa ku uan deshi milidji meeth ku Kilitu,
namsëdji na ja të uan sapa paif.
Pai namsëdji sa amu;
pakë amu se pegua evanjelio shi fë ku namsëdji iaba Kilitu Djisu.
16 *Se fë ku,
amu ja luga namsëdji pa ja lë zhampulu amu.
17 Dajantu shi se amu da Timoteo ba da namsëdji,
mina ngongodu ku jonfadu amu ku Shiölö,
ku ske lambela namsëdji amea kutumu amu dantu Kilitu Djisu,
amea jö shi amu ja shina guëzha ku jamian ineñ shi amu ja be tudu.
18 Zhugan namsëdji ja ska këlëdöguë dëneñ ja mazhna fa amu zhugan djia na tan ska ua namsëdjif;
19 mandji se shi Shiölö ja ngongo,
goleme amu ske ba ua namsëdji.
Se sa öshi amu ske jönsë nna nguë ineñ shi ja ska këlëdöguë dëneñ,
ku na sa jö ineñ shi ineñ ja ska paadji ja faa mosofa ö kë pödë sa ku ineñf.
20 Pakë gövöndölö Nashiolo na sa dji fala mosofa,
shina ku dji pödë.
21 ¿Kë ja namsëdji ngongo?
¿Pa amu ba ua namsëdji ku valasöchi,
ö pa amu ba ua namsëdji ku ngongo ku spitu masu?