Pelavöl ku Apolos, nna shividölö Kilitu
3
Amu,
nna namain,
amu na paadji faa ku namsëdji shimafan nna nguë ödu dantu spituf,
shina shimafan nna nguë foli,
shimafan nna mina tëjantu ku jö ineñ shi ja sa ja Kilitu.
2 *Amu shina namsëdji ja foli foli,
amea shime ku uan namina ontolo a ska da mama,
anta pa da ëli manchimentu lizhu.
¡Pakë ineñ na ja paadji nguli öseshif,
3 pakë ineñ ja sa foli!
Öshi ontolo namsëdji ja ska të dishamentu ngandji ku a ja ska pezha,
¿ontolo namsëdji na ske sa foli ua,
se namsëdji ja ska fë fidu ja ntëlelele amea nna pöjödölö mundu ua?
4 *Pakë ta uan nguë ja faa:
«Amu sa nguë Pelavöl»,
se utu:
«Amu sa nguë Apolos»,
ineñ ska fë fidu kuzhu ntëlelele amea nna pöjödölö mundu sai.
5 Ta ja tudu ja jaba,
¿kë nguë sa Apolos?
¿Kë nguë sa Pelavöl?
Nna shividölö shipë shi ku amea dëneñ se namsëdji ba këlë.
No tudu unian unian fë tabaia shi Shiölö da no pa no fë:
6 *Amu se bi bi shimian se Apolos fë lazhan,
mandji se Nashian se fë pa jö ineñ shi ja a shimian iai ja këësë.
7 Se amea sai se ñi nguë shi ja shimian ñi nguë shi ja fë lazhan na ja sa zhugan jaf,
shina Nashian se ja sa ja tudu,
pakë ëli se sa nguë shi ja fë pa jö shi a ja shimian ja këësë.
8 Nna nguë ineñ shi ja shimian ku nna nguë ineñ shi ja fë lazhan tudu ja sa uan soso,
benga zha pa Nashian ske da pagu amea tabaia shi nguë tudu ja fë.
9 Pakë no tudu sa jamada tabaia Nashiolo,
se namsëdji sa matu shimian ja Nashiolo,
namsëdji sa jadji Nashiolo.
10 Amu bi sa meeth fë jadji ku se Nashian dantu gavu dëli se ëli manda pa amu pë fundamentu,
se utu nguë ja ska fë jadji pë liba dëneñ.
Mandji se nguë tudu ta pa ja ska pinchidu amea shi ineñ ja ska fë jadji,
11 pakë zhugan nguë na paadji pë utu fundamentu liba da unian ku ja sa pidu bebezhaf,
ku se sa Djisukilitu.
12 Se liba fundamentu sai,
se uan nguë ja paadji fë jadji ku oro,
plata ku budu ngola ngola,
ku taaba,
jambabu ku öpa anjana;
13 mandji se tabaia nguë tudu a ske bi bë amea shi betu djia djustishi,
pakë djia se ske bi ku fögö,
se fögö ske puva klase tabaia shi nguë tudu bi bi fë bebezha.
14 Shi jö shi a ja fë ja sa ja ödu,
ëli ske të pagu dëli;
15 mandji se shi jö shi a ja fë ja kama,
ëli ske pëndë tabaia dëli,
benga zha pa ëli me ske paadji sava öguë dëli shimafan nguë shi ska jölë fo fögö.
16 *¿Sa fa namsëdji na sëbëfa namsëdji sa jadji Nashianfa,
se Spitu Nashian ja bibe dantu namsëdji ua?
17 Shi uan nguë ja të jadji Nashian të lolo,
Nashian ske të ëli të lolo,
pakë jadji Nashian sa santu,
se jadji se sa tuludöguë namsëdji.
18 Pa zhugan nguë na ngaña öguë dëlif:
shi uan nguë dantu namsëdji ja pë fa ëli sa sëbëdölö amea tëndëmentu mundu sai,
sa gavu pa ëli tan ja vla fë nguë danadu,
valadji pa amea sai pa ëli vla fë sëbëdölö shishizhu.
19 Pakë tëndëmentu mundu sai sa ja danadu da Nashiolo.
Se sa amea shi Fa Nashiolo ja faa:
«Öma Nashian ja kë nna sëbëdölö dantu tuludöguë öiö djidjidu dëneñ».
20 Se a shime ten ja faa:
«Shiölö ja sëbë fa mazhnamentu nna sëbëdölö tudu sa ja dana danadu».