Nova tëjantu ku Kilitu shi a da pë kusu
2
Mandji nna namain,
djia shi amu bi faa namsëdji ja tëjantu ku kumi ja Nashiolo iai,
amu na bi fë ku fala gödö gödö mosofa ö ku tëndëmentu amuf.
2 Se,
ta amu bi sa dantu namsëdji,
amu na bi mazhna pa amu sëbë utu ja patudufa shina Djisukilitu,
nguë shi a bi da pë kusu.
3 *Se amu bi sa dantu namsëdji ku öguë levu,
ja mendu ku ja timbla monchi,
4 se nova amu ku pegua amu na bi sa pa amu ngana namsëdjif,
shina sa ja amu fë pa ja msa pödë Spitu Santu ku pödë Nashiolo.
5 Valadji pa jonfa namsëdji ja sa ja fo pödë Nashiolo ku pa na ja sa ja fo tëndëmentu nna napaif.
Nashian lega pa jönsë kumi ja dëli amea Spitu Santu
6 Mandji se,
ta amu ja sa ku nna nguë ineñ shi sa ödu dantu jonfa dëneñ,
se sa öshi amu ja faa fala ku tëndëmentu,
mandji se na ja sa klase tëndëmentu shi ja sa dji nna nguë mundu sefa ö nna nguë ineñ shi ja sa gövöndölö mundu sef,
nna nguë ku na ja jaba ku zhugan jaf.
7 Mandji se no ja ska faa ja tëjantu ku kumi tëndëmentu Nashiolo,
uan tëndëmentu ku ja ta jöndjidu,
se Nashiolo bi ma da gloria no fo anta pa tempu da.
8 Jö sai sa uan ja ku nna jasa jasa mundu dödjai na bi tëndëf,
pakë ja pa sa ja ineñ tëndë,
zhugan djia ineñ na bi ske da Shiölö gloria pë kusuf.
9 Mandji,
se amea shi sa skividu:
«Jö ineñ shi zhugan öiö na bi bëfa,
ñi olea na bi tëndëf,
ñi na subili ba kusan nna pöjödölöf.
Se sa jö ineñ shi ku Nashiolo fë vadu da nna nguë ineñ shi ku ngongo ku ëli».
10 Mandji se Nashian fë pa no jönsë amea Spitu Santu,
pakë Spitu Santu ja golo ja tudu,
ba toja ku jö ineñ shi ja sa fundu mashi fo Nashiolo.
11 Pakë,
¿kë nguë dantu nna napai tudu paadji jönsë jö ineñ shi ja ta dantu kusan napai,
shina Spitu Santu shi ja ta dantu napai mosof?
Se sa amea shime,
ku Spitu Santu Nashian moso se ja sëbë jö shi sa ku Nashiolo.
12 Se no na ja ma spitu munduf,
shina Spitu Santu shi ku së fo Nashiolo,
valadji pa no paadji tëndë jö ineñ shi Nashian ku gavu dëli se ëli da no.
13 Se no ja ska faa jö ineñ sai ku fala ineñ shi Spitu Nashian shina no,
na ja sa fala ineñ shi,
no shina fo tëndëmentu tuludöguë nof.
Se sa amea shi no ja da lazhan jö ineñ shi ja sa ja spitu amea vedadji spitu.
14 Se nguë shi na ja sa nguë spituf na ja ma jö ineñ shi sa ja Spitu Nashianf,
pakë jö ineñ se tudu ja sa ja dana danadu da ëli.
Se ëli na ten ja paadji tëndëf,
pakë jö ineñ se tudu ja sa ja pa golo amea spitu.
15 Mandji se nguë shi ja sa ku Spitu Nashiolo paadji golo ja tudu,
se zhugan nguë na ja paadji golo ëlif.
16 Pakë,
«¿Kë nguë jönsë miolo Shiölö?
¿Kë nguë ske shina ëli kuzhu?».
Mandji se no të miolo Kilitu.