PIMËLU EPISTOLA KU SAN PELAVÖL SKËVË DA NNA NGUË
KORINTO
Manten
1
Amu,
Pelavöl,
ku Nashian sama ëli ku vintadji dëli pa sa apostol Kilitu Djisu,
ku namain no Sostenes,
2 *da guëzha Nashian shi ku ja ta palea Korinto manten,
da namsëdji ku Nashian se sama pa sa pövu santu dëli.
Ëli fë ineñ santu amea Kilitu Djisu,
amea shime ku ëli fë ku nna nguë ineñ shi sa jamian tudu ja lezha ku namu Shiölö no Kilitu Djisu,
Shiölö dëneñ ku dji no.
3 Pa Nashian Pai no ku Shiölö Djisukilitu ta galasa ku padji dëneñ pë liba namsëdji.
Fidu ja ku dezhupaga
4 Olatuvëdji amu ja da Nashian amu dezhupaga da namsëdji,
dajantu galasa shi Nashian ta pë liba namsëdji amea Kilitu Djisu.
5 Pakë amea dëli se Nashian da namsëdji gagavu spitu tudu,
amea fala a shime ku tëndëmentu,
6 se sa amea shi lazhan gavu tëjantu ku Kilitu sa suguladu dantu namsëdji.
7 Se amea sai se na ja fata namsëdji zhugan klase ja gavu dödji fo Nashianf,
öshi ontolo namsëdji ja ska gada djia shi Shiölö no Djisukilitu ske msa tuludöguë dëli.
8 Nashian ske fë pa namsëdji ta shin kupa ba toja jabamentu,
valadji pa zhugan nguë na paadji da fëiu namsëdji da zhugan jaf ta Shiölö no Djisukilitu tan ja vlame bi.
9 Nashian sa jonfadu,
ëli se sa nguë shi sama namsëdji pa ja bibe zhuntadu ku Shiölö no,
Djisukilitu Mina dëli.
Sa ku uachi dantu guëzha
10 Nna namain,
no luga namsëdji ku namu Shiölö no Djisukilitu pa namsëdji ja ska fë jö shime ku pa na ja të uachi dantu namsëdjif.
Shina pa namsëdji ja ska bibe ku liguilia,
pa ja ska mazhna ku pa ja ska sinchi jö shime.
11 Amu faa jö sai,
nna namain amu,
pakë zhugan nna nguë jadji Kloe da amu lazhan fa ja ska të pezha dantu namsëdji.
12 *Amu ngongo faa,
zhugan namsëdji ja ska faa:
«Amu sa nguë Pelavöl»;
se utu ja faa:
«Amu sa nguë Apolos»,
ö «Amu sa nguë Sefas»,
ö «Amu sa nguë Kilitu».
13 ¿Sa fa Kilitu sa pachidu fë uachi?
¿A da Pelavöl pë kusu dajantu namsëdji?
¿A namu Pelavöl se a bachizha zhugan namsëdji?
14 *Amu da Nashiolo dezhupaga ku amu na bachizha zhugan namsëdjif,
shina Krispo ku Gaio,
15 pa amea sai pa zhugan nguë na paadji faa a bachizha ëli ku namu amuf.
16 *A shime amu ten bachizha nna nguë jadji Estefanas,
mandji se jasa amu na tan da fa amu bachizha zhugan nguë mashif.
17 Pakë Kilitu na manda amu bi bachizhaf,
shina pa amu ba pegua evanjelio,
ku pa na ja faa fala gödö gödö mosof,
valadji pa kusu Kilitu na së shipëf.
Kilitu, sëbëdölö ku pödë Nashiolo
18 Nova mölë Kilitu liba kusu ja sa shimafan ja dana danadu da nna nguë ineñ shi ske sa pindjidu,
mandji se nova sai se sa pödë Nashiolo da nna nguë ineñ shi ske të savasan.
19 Amea shi Fa Nashiolo ja faa:
«Amu ske fë pa nna sëbëdölö pëndë shizhu dëneñ
ku pa nna nguë tëndëmentu pëndë tëndëmentu dëneñ».
20 ¿Kë jamian sëbëdölö sa?
¿Kë jamian meeth dalë sa?
¿Kë jamian nguë shi të djisputa mundu se sa?
¡Nashian fë pa sëbë kuzhu napai tudu vla fë ja dana danadu mundu sai!
21 Öshi mundu na usa sëbëdölö dëneñ pa ineñ jönsë Nashianf,
jamian shi ëli msa ineñ sëbë ja dëli amea gagavu dëli pa ëli sava amea pegua dëli nna nguë ineñ shi ja të jonfa,
benga zha pa pegua dëli ja sa shimafan ja «dana danadu».
22 Nna judio ja ska ngongo bë shinali ngangandji fo ösë,
se nna griego ja ska jua tëndëmentu,
23 mandji se no ja ska pegua da uan Kilitu ku a da pë kusu.
Jö sai sa ja ku ja da nna judio topu,
se da nna nguë ineñ shi na sa judiof ja kë ja dana danadu.
24 Mandji se da nna nguë ineñ shi Nashian se sama,
ja sa judio ö griego,
Kilitu sai se sa pödë ku tëndëmentu Nashiolo.
25 Pakë jö shi fo Nashiolo ja sa shimafan ja «dana danadu»,
se ja të tëndëmentu mashi ku tëndëmentu nna pöjödölö;
se jö shi ja kë ja levu da Nashiolo,
se ja sa ja ödu mashi ku foshi nna pöjödölö tudu.
26 Nna namain,
ja pia sama namsëdji:
Namsëdji na ja monchi ku ja sa sëbëdölöfa amea shizhu nna pöjödölöf;
se na ja sa monchi nna nguë ineñ shi ja sa ku pödëfa ñi na ten të ja sa monchi nna nguë jadji dondolof.
27 Se sa fa,
pa nna nguë ku tëndëmentu ska ma govan,
se Nashian ma nna nguë ineñ shi mundu ja të shimafan nna nguë danadu;
se sa pa nna nguë ödu ja ma govan,
se ëli ma nna nguë ineñ shi mundu ja të shimafan nna nguë levu levu.
28 Nashian ma nna nguë nozho nozhodu shin ondolo dantu mundu sai,
sa fa nna nguë ku na ja sa zhugan jaf,
valadji pa ëli ja të nna nguë ineñ shi sa uan kuzhu ai të lolo.
29 Valadji pa zhugan nguë na ja pë fa ëli se mashi deenchi Nashianf.