Apostol Pelavöl skëvë pimëlu jaata sai da nna kitan ineñ shi ja ta palea Korinto, ja kundji ineñ da uan pongota ku ineñ bi bi fë ëli tëjantu ku jazha (7:1). Mandji se djiskatudjia ineñ shi bi sa dantu guëzha bi sa utu ja pata patadu, Pelavöl bi ja be ja jözhë unian unian pë, ja jomesa fo djiskatudjia shi ja pachi nna namain guëzha sai fë uachi uachi (1:10-17).

Guëzha Korinto bi sa uan guëzha fumözhö dantu tempu sala dajantu ja nda ölöluia. Ba toja ku bi të uan fala ku a bi ska faa «ja fë fidu ja nna nguë korinto» tëjantu ku ta a ja limian pekadu ineñ shi fëfëiu mashi. Uan pekadu ineñ sai bi sa ta uan kitan, ku bi jazha ku miela pai dëli (5:1). Pelavöl ja fë ineñ bë nna kitan korinto fa ñi nna nguë ineñ shi na sa kitanf ai na fë jö ineñ sef.

Ku utu djiskatudjia mashi, dajantu shi se ëli ja da ineñ lazhan: Shi no ske juzhga nna tuludöguë anzhu, se fë no të dëtu mashi pa no juzhga djiskatudjia vida sai (6:3).

Zhugan ineñ bi ska mazhna fa na sa gavu pa ja jazhaf, mandji se Pelavöl ja msa ineñ fa na sa vedadjif. Dajantu shi se ëli ja faa ineñ: nguë shi ja jazha ëli ja fë ja gavu, se nguë shi na ja jazhaf, ja fë gavu mashi (7:38).

Se ten bi sa ku zhugan nna nguë ineñ ku bi ska pufia tëjantu tan lanta nguë bi vida (15:3-8). Utu ineñ bi ska bachizha da nna paipai dëneñ ku na bi jönsë Djisukilituf (15:29).

Uan kapitulo ku se a jönsë mashi dantu jaata sai, sa uan ku a ja jönsë shimafan «Janta ngongo» (13:1-13). Pelavöl ja jaba shi ja faa: sa ku ja tëishi ku ja sa pa sempele: jonfa Nashiolo, ja sa suguladu fa ëli ske kumpli plomesa dëli tudu, ku ngongo. Dantu ineñ tëishi ineñ sai, i shi ngandji mashi sa ngongo (13:13).