Pelavöl da nna jamada dëli manten
16
Amu ska da namsëdji gavu naamain no Febe,
almoñi guëzha Senkreas.
2 Amu pindji namsëdji dajantu Shiölö pa namsëdji ma ëli amea shi ëli mësë dantu nna pövu santu,
ku pa namsëdji zhuda ëli ku jö ineñ shi ja fë ëli fata tudu,
pakë ëli zhuda uan sapa dji nguë,
ku a shime tuludöguë amu.
3 *Namsëdji ja zhuda Prisila ku Akila,
nna jamada tabaia amu dantu sulvisu Kilitu Djisu.
4 Ku ineñ,
ku pë vida dëneñ pepe mölë valadji pa sava dji amu,
se amu na ja da ineñ dezhupaga mosofa,
shina a shime nna namain guëzha nna nguë ku na sa judiof.
5 A shime a ten ja da nna nguë guëzha shi ja zhunta dantu jadji dëneñ manten.
Da jamada kilidu amu Epeneto manten,
ku se bi sa pimëlu nguë ku këlë Kilitu dantu loso loso Asia.
6 Da Malia manten,
ku ëli tabaia monchi da namsëdji.
7 Da nna nguë tela amu Androniko ku Junias manten,
ineñ bi sa nna jamada amu dantu djili,
se a ja da ineñ ondolo monchi dantu nna apostol,
se ineñ se bi bi këlë Kilitu pimëlu amu.
8 Da jamada kilidu amu ku Shiölö,
Ampliato,
manten.
9 Da Urbano,
jamada tabaia no ku Kilitu ku jamada kilidu amu Estakis.
10 Da Apeles manten,
masebu ku sa ku aen Kilitu.
Da nna nguë jadji Aristobulo manten.
11 Da nguë tela amu Erodion,
ku nna nguë jadji Narsiso ku ja këlë Shiölö,
manten.
12 Da Trifena ku Trifosa,
nna tabaiadölö Shiölö,
manten.
A shime naamain kilidu no Persida,
ku fë uan sapa sulvisu da Shiölö.
13 *Namsëdji ten ja da Rufo manten,
nguë ku Shiölö se ma ku main dëli ku ten bi sa main amu.
14 Namsëdji ten ja da Asinkrito,
ku Flegonte,
ku Ermes,
ku Patroba,
ku Ermas ku nna namain ineñ shi sa ku ineñ,
manten.
15 Namsëdji ten ja da Filologo ku Julia,
ku Nereo ku namain dëli naamain,
ku Olimpas ku nna namain dantu jonfa ineñ shi ja ta ku ëli,
manten.
16 Namsëdji ja da namsëdji me manten ku uan beso santu.
Nna nguë guëzha Kilitu tudu da manten bi da namsëdji.
17 Nna namain kilidu amu,
amu luga namsëdji,
pa namsëdji ja pë öiö liba nna nguë ineñ shi ja ska baga nguë ja fë uachi ku ten ja fë pa ja da topu tëjantu ku shina kuzhu shi namsëdji shina fo no iai.
Ja safa fo ineñ.
18 Pakë tili nna nguë ineñ sai na ja ska shivi Kilitu Shiölö nof,
shina tuludöguë dishamentu dëneñ,
se ku fala levu levu ku fala gödö gödö se ineñ ja ngaña kusan nna nguë shi ja sa nasenchi.
19 No tudu sëbë fa namsëdji bi sa nna nguë ja tëndë nguë.
Se ja fë gavu da amu se amu ngongo pa namsëdji msa tëndëmentu pa ja fë ja gavu,
mandji pa na ja fë ja fëfëiuf;
20 se amea sai se Nashian padji ske pope Satanas pë basu dope namsëdji.
Pa galasa Shiölö Djisukilitu sa ku namsëdji.
21 *Jamada tabaia amu,
Timoteo,
da manten bi da namsëdji,
a shime Lusio,
Jason ku Sosipatro,
nna nguë tela amu.
22 Se amu,
Tersio,
ku se ska skëvë jaata sai,
ten da manten Shiölö bi da namsëdji.
23 *Se Gaio ten da manten bi da namsëdji.
Jadji dëli se no ja ta,
ku sa ja ëli ja pë pa nna nguë guëzha ja ta.
A shime Erasto,
nguë shi ja sa jasa gada djiëlu palea,
ku namain no Kuarto.
24 Pa galasa Shiölö no Djisukilitu ja sa ku namsëdji tudu.
Amen.*+
Jabamentu ilö da Shiölö
25 Se Shiölö se sa nguë shi paadji da namsëdji foshi amea evanjelio shi amu ska pegua tëjantu ku Djisukilitu,
amea msa nguë kumi jö shi ku bi sa jöndjidu fo tompu tompu chindadji.
26 Mandji se öseshi se a lega pa jönsë jö ineñ shi nna pantafala skëvë,
ku se ja sa jö shime ku mandatu Nashian shi sa chindadji.
Se ëli fë pa tela tela tudu jönsë ëli valadji pa ineñ ja tëndë ëli ku jonfa.
27 ¡A Nashiolo,
ëli shi sa ponodu ku sëbëdölö,
pa gloria sa ku ëli pa sempele amea Djisukilitu!
Amen.