Nna nguë levu ku nna nguë ödu
14
*Ja ma nna namain ineñ shi ku sa nna nguë levu dantu jonfa ku pa na ja të pufiaf.
2 Pakë zhugan nguë ja këlë fa a ja paadji kumu ja tudu;
mandji se utu nguë ku jonfa ja sa levu mashi,
ja ska kumu fadöpa moso.
3 Se nguë shi ja ska kumu ja tudu iai ja ska pia nguë shi na ja ska kumuf ai nna nguë sono;
se nguë shi na ja ska kumu zhugan jaf ai na ta pa ëli ja ska kondena nguë shi ja kumuf,
pakë Nashian ja ngongo ku ëli amea sai.
4 ¿Kë nguë sa bo,
pa bo ja juzhga shividölö utu dji nguë?
Shi ja sa gavu ö ja sa fëiu,
sa ja ku ja të ku tuludöguë shiölö dëli.
Mandji ske sa gavu,
pakë Shiölö të pödë pa ëli ja fë pa ja tudu pa ja sa gavu.
5 Utu zhampulu:
Sa ku zhugan nguë ku ja fë pa uan djia ja ngandji mashi ku utu djia,
mandji se ten të utu nna nguë ku ja këlë fa djia tudu ja sa uan soso.
Pa uan nguë ja ska këlë shishizhu jö shi ëli ja mazhna.
6 Se nguë shi ja gada uan djia,
pa da Shiölö ondolo pa ëli ja gada da Shiölö.
Nguë shi ja kumu ja tudu,
pa ëli ja da Shiölö ondolo da jö shi ëli ja kumu,
pa ëli ten ja da Nashiolo dezhupaga;
se nguë shi na ja kumu uan kumu pataduf,
pa ëli ja da Shiölö ondolo pa ëli ja chama kumu,
ku a shime pa ëli ten ja da Nashian dezhupaga.
7 Zhugan no na ja bibe da tuludöguë no fa,
se zhugan no na ja mölë da tuludöguë nof.
8 Shi no ja bibe,
no ja bibe da Shiölö;
se shi no ja mölë,
da Shiölö se no ja mölë.
Dajantu shi se shi no ja sa vivu ö no ja sa mölidu,
no ja sa nna nguë Shiölö.
9 Dajantu jö sai se Kilitu mölë se ëli tan vlame tan lanta bi vida:
valadji pa ëli sa Shiölö dantu nna nguë ineñ mölë ku nna nguë ineñ shi sa vivu.
10 *Se bo,
tadashi,
¿jama fë,
bo ja ska faa nna namain bo kuzhu?
¿Jama fë bo ska pia ineñ shimafan nna nguë sono?
No tudu ske ta pa sa deenchi Nashiolo,
valadji pa ëli juzhga no.
11 Pakë Fa Nashian ja faa:
«Amu ja jula da vida amu,
se Shiölö ja fala,
fa deenchi amu se özhöiö tudu ske sa dubadu,
se lunga tudu ske ja da Nashiolo ilö».
12 Se amea sai,
se unian unian no ske ta pa da Nashiolo kuenta döguë dëli.
13 Dajantu shi,
no na ske sa pa no ja ska faa no no me jaf.
Shina,
ja ska mazhna amea shi pa namsëdji na ja fë zhugan jaf pa se ja fë pa namain namsëdji ja da topu ö pa ja pëndë jonfa dëlif.
14 Amu sëbë fa na të zhugan ja shi pa ja sa nozhoduf,
shimafan uan namain Shiölö Djisu,
amu sa suguladu da jö sai.
Mandji se shi uan namain ja ska mazhna fa uan kuzhu sa nozhodu,
ske sa nozhodu da ëli.
15 Se shi öseshi,
se dajantu jö shi bo ja kumu se namain bo ja sinchi modoia,
se fidu ja bo na tan ja sa amea ngongof.
Pa na sa dajantu jö shi bo ja kumu se uan nguë ku Kilitu mölë dajantu dëli ja pëndëf.
16 Na lega pa,
ja da fëiu namsëdji da ja gagavu ineñ shi namsëdji ja ska fëf,
17 pakë gövöndölö Nashiolo na sa kumufa ñi bëbëf,
shina djustishi,
padji ku liguilia amea Spitu Santu.
18 Se nguë shi ja shivi Kilitu,
ja ska fë ja pa ja fë gavu da Nashiolo se ëli ten ja të aen fo nna napai.
19 Dajantu shi,
ja ska jua jö ineñ shi ja ska ma nguë pa ja të padji ku ja ska fë pa ja të foshi dantu namsëdji me.
20 Na ja ska të tabaia Nashian të lolo dajantu kumuf.
Pakë vedadji,
manchimentu tudu ja sa limpi,
mandji jö shi sa ja fëiu sa kumu uan kuzhu ku ja fë pa utu nguë ja da topu.
21 Ja sa gavu mashi pa na ja kumu jañif,
ñi bëbë vianf,
ñi pa na ja fë zhugan ja pa dajantu jö sai pa namain bo ja da topuf.
22 Jonfa shi sa ku bo iai,
se ta pa bo ma shimafan uan ja ku sa ku bo deenchi Nashiolo.
¡Besa ja sa ku nguë shi na ja kondena tuludöguë dëli me da jö shi ku ëli da aenf!
23 Mandji se nguë shi na ja sa suguladu da jö shi ëli ja ska kumuf,
se öshi ëli ja ska kumu,
se ëli ja sa kupa,
dajantu ku ëli na ska kumu ku jonfaf;
se jö ineñ shi a ja ska fë shinke a ja sa suguladu ku jonfa,
ja sa pekadu.