Ja da nna nguë jasa jasa tela ondolo
13
Nna nguë tudu ta pa sa basu nna nguë ineñ ja sa pödë liba pövu.
Pakë na të zhugan nguë ku ja sa ku pödë ku na ja sa ja fo pachi Nashianf,
se ineñ shi ja sa,
ja sa ineñ shi Nashian se ja pë.
2 Se amea sai se nguë shi ja pë öpa ku nna nguë pödë,
ja sa nna nguë ku na ja ngongo ku jö shi Nashian ja da odjif.
Se nna nguë ineñ shi na ja ngongo ku jö shi Nashian ja faaf,
ineñ ske të jatigu.
3 Pakë nna nguë ineñ shi ja sa nna nguë pödë na ja sa nguë pa ja fë pa nna nguë fë ja gagavu ja menduf,
shina nna nguë fë ja fëfëiu.
¿Bo ngongo bibe shinke bo ja mendu nna nguë pödë?
Ja fë ja gagavu se ineñ ske ja da bo aen,
4 pakë ineñ sa sulvisu Nashiolo dajantu gavu bo.
Mandji se shi bo ja ska fë ja fëfëiu,
se sa öshi bo ske ja të mendu,
pakë na sa shipë shi se nna jasa jasa tela ja sa ku jatanaf,
pakë ineñ sa basu sulvisu Nashiolo valadji pa ja da ineñ jö shi ineñ mësë dajantu ja fëfëiu ineñ shi ineñ ja fë iai.
5 Dajantu shi se ja fë fata pa sa basu nna jasa jasa tela,
na sa dajantu jatigu mosofa,
shina,
shimafan uan kuzhu pa ja fë ku kusan limpi.
6 *A shime dajantu shi se namsëdji ja da pagu tesu,
pakë nna nguë pödë sa basu sulvisu Nashiolo,
se sa jö shi ineñ ja ska fë.
7 Da nna nguë tudu pagu,
jö shi ineñ mësë.
Nguë shi ske ta pa da pagu uan kuzhu,
pa ja da ëli pagu dëli,
nguë shi ta pa ja da pagu tesu,
pa ten ja da ëli tesu dëli.
Nguë shi ta pa ja ondolo,
pa ja da ëli ondolo;
nguë shi ta pa ja ngongo ku ëli,
pa ja ngongo ku ëli.
Ngongo ku nna namain
8 Na ja të deuda ku zhugan nguëf,
shina pa ja sa deuda ngongo shi uan nguë ja të ku nguë;
pakë nguë shi ja ngongo ku pusumu dëli ëli ja kumpli ku jö ineñ shi alë Nashian ja ska pindji.
9 Mandamentu ja faa:
«Na ja kabajölöiöf,
na ja chila nguë vida folof,
na ja futaf,
na ja dishia ja dji nguëf»;
mandji se ineñ sai ku mandamentu tudu ja zhunta faa uan fala soso:
«Ngongo ku pusumu bo shimafan tuludöguë bo».
10 Ngongo na ja fë pusumu bo malif.
Se dajantu shi se ngongo ja kumpli jö ineñ shi alë Nashian ja ska pindji.
11 Dantu jö sai,
ja gavu pa ja jönsë tempu se ku no ska bibe iai,
ku pa no ja sëbë fa tompu da zha pa no lanta fo dantu djuni.
Pakë savasan no tan sa peetu öseshi mashi ku fo jomesadu,
ta no bi bi këlë nova.
12 Nöchi la ja kubili se pamasedu ske bla goleme.
Dajantu shi,
ta pa no chama fë jö ineñ shi a ja ska fë jamian kulu kulu ku pa no bishi bitidu fögö djidjidu,
shimafan ta nna sodadji ja sa ku bitidu pezha dëneñ.
13 Pa no ja ska nda amea gavu,
shimafan dantu fögö djidjidu djia,
pa na ja sa dantu bankëtë ku bedaduf,
pa na ja ska fë ja nda ölöluiafa ku visiof,
ñi ku djiskatudjiafa ñi ku pa na ja të dishamentu ngandji fëfëiu ja dji nguëf.
14 Mandji pa no ja sa bishidu ku Shiölö Djisukilitu,
ku pa no na ja jua amea shi pa no ja da öguë no vintadji ku dishamentu ku mazhnamentu fëfëiuf.