Vida shi novu
12
Dajantu shi,
nna namain,
amu luga namsëdji da mindjikodji Nashiolo pa namsëdji msa öguë namsëdji shimafan saklifisu vivu,
santu ku tadu pa ja fë gavu da Nashiolo.
Ku se sa amea shi shishizhu pa ja shivi ëli.
2 Namsëdji na ja ska bibe amea shi a ja ska fë mundu dödjaif,
shina,
pa namsëdji ja ska tuka amea mazhnamentu novu namsëdji,
valadji pa namsëdji ten ja ska puva amea shi namsëdji ja ska ta ku pa namsëdji ja jönsë vintadji Nashiolo,
ku se sa,
jö shi gavu,
ku se ja fë gavu ku se sa dëtu.
3 Amea galasa shi Nashian da amu,
se amu faa namsëdji pa zhugan nguë na ja mazhna döguë dëli mashi ku jö shi ske ta pa ëli ja mazhnaf.
Sa gavu mashi,
pa nguë tudu ja mazhna döguë dëneñ ku sinchidu gavu,
amea mindjida jonfa shi Nashian ja da ëli.
4 *Pakë se sa amea shi fo uan ponodu öguë moso se no ja të uan sapa pachi,
mandji se na sa pachi tudu se ja fë jö shimef,
5 se ten sa amea shime ku no,
ku benga zha pa no monchi,
se no ja zhunta fë uan ponodu öguë ku Kilitu,
se no ja sa zhuntadu no no me shimafan pachi uan öguë shime.
6 *Amea sai,
sa fa,
pa no ja të gavu dödji pata patadu,
amea galasa shi ëli ja ngongo da pa fë.
Dajantu shi,
nguë shi a ja da pa pantafala,
pa ëli ja ma fë amea jonfa dëli;
7 nguë shi a ja da pa ja shivi,
pa ja shivi;
nguë shi ja da pa ëli shina nguë kuzhu,
pa ja shina nguë kuzhu;
8 se nguë shi ja të añimu,
pa ja da nguë añimu;
nguë shi ja da pa pachi nguë ja gagavu,
pa ja fë ku öma betu;
nguë shi ja da pa sa jasa,
pa ja fë ku cheche;
nguë shi ja da pa sa ku mindjikodji,
pa ja fë ku liguilia.
Ngongo dantu vida nna namain
9 Pa ngongo ja sa shishizhu uan nguë ku utu nguë.
Ja nozho ja fëfëiu pa ja lë ja gagavu.
10 Ja ngongo ku namsëdji me shimafan nna namain uan nguë ku utu nguë,
ja da nguë ondolo dantu namsëdji me.
11 Ja ska fë ku cheche,
namsëdji na ja sa pisközhuf,
shina ja ku liguilia spitu,
ja shivi Shiölö.
12 Ja bibe ku liguilia ku alagada,
ku jö shi namsëdji të bebezha,
ja ma mavida ku valëntë,
na ja chama lezhaf.
13 Ja pachi ja da dishamentu ku nna namain,
pa ten ja ska ma nguë jadji.
14 *Ja da nna nguë ineñ shi ja pëtëpë nguë besa,
ja da nna nguë ineñ shi ja ta nguë masan besa.
15 Ja të liguilia ku nna nguë ineñ shi ja të liguilia pa ja ska sula ku nna nguë ineñ shi ja ska sula.
16 Ja bibe ku padji uan nguë ku utu nguë.
Na ja këlëdöguë dji nguëf,
shina ja ska zhunta ku nna nguë shipë shipë.
Na ja mazhna fa a sa sëbëdölöf.
17 Na ja da pagu zhugan nguë ja fëiu ku ja fëiuf.
Ja ska jua amea shi pa ja fë ja gavu deenchi nguë tudu.
18 Shi ja paadji sa,
tëjantu ku namsëdji,
ja sa gavu pa namsëdji ja bibe ku padji ku nguë tudu.
19 Nna namain kilidu amu,
na ja da pagu ku namsëdji mef,
shina ja lega pa Nashian se sa nguë shi ja da nguë jatigu,
pakë Fa Nashian faa:
«Amu se sa nguë shi ja fë djustishi,
amu se ske da pagu»,
se sa jö shi Shiölö fala.
20 Se a shime,
«Shi namigu bo ja të faku,
bo ja da ëli kumu;
shi ëli ja të fomu daua,
bo ja da ëli ja pa ëli bëbë;
se amea sai se bo ja zhunta öpa fögö djidjidu pë liba jasa dëli».
21 Na lega pa mali ngana bof,
shina,
ngana mali ja fë ja gagavu.