Mindjikodji Nashian ku Israel
11
*Tadashi se amu pongota öseshi:
¿Ske sa fa Nashian naga pövu dëli?
¡Zhugan limedji shif!
Tuludöguë amu sa nguë Israel,
minadjimina Abraam,
fo zhenchi Benjamin.
2 Fo jomesadu se Nashian na bi naga pövu dëlif;
nguë shi ku ëli bi jönsë bebezha.
¿Namsëdji na sëbëfa Fa Nashian dantu soia pantafala Elias,
dantu lezha dëli ku Nashiolo,
ja da fëiu da pövu Israel?
Se ëli faa:
3 «Shiöla,
a chila nna pantafala bo tudu vida folo;
se a të datali bo tudu të lolo.
Se amu moso se mdja ku vida,
se a ten ngongo chila amu vida folo».
4 Mandji se Nashian kundji ëli:
«Amu safa da amu milidji seta napai,
ku na dajözhöiö deenchi Baal,
nashian balu dëneñf».
5 Se sa amea shime,
öseshi zhugan ponodu pövu Israel se mdja ku jonfa dajantu galasa Nashiolo ku se ma ineñ.
6 Se shi ja sa dajantu galasa Nashiolo,
na tan sa dajantu fidu jaf,
pakë shi se ja sa amea sai,
gavu Nashiolo na tan ske sa gavuf.
7 ¿Tadashi a kë ja sa?
Pövu Israel na të jö ineñ shi ineñ bi ska juaf,
mandji se ineñ shi ku ëli ma,
se ineñ se bi të jö shi ineñ ska jua.
Utu nna nguë të kusan dëneñ,
të vla ödu,
8 amea shi Fa Nashian faa:
«Nashian da ineñ uan spitu ku na ja sinchi jaf,
se ëli da ineñ öiö ku na ja bëfa ku olea ku na ja tëndë jaf».
9 A shime alë David ten faa:
«Pa bankëtë dëneñ ja vla fë lasu ku alëdë,
valadji pa ineñ da topu pa da ineñ jatigu.
10 Ku pa öiö dëneñ ja vla tapadu,
pa ineñ na tan ja bë jaf;
pa pemetadji dëneñ ja mba pa sempele».
Savasan nna nguë ku na sa judiof
11 Se öseshi se amu pongota:
¿Ske sa fa nna judio,
ineñ da topu,
valadji pa ineñ na tan lantafa?
¡Zhugan limedji shif!
Shina,
mandji se tëjantu ku pekadu dëneñ se savasan bi da nna nguë ineñ shi na sa judiof,
valadji pa pövu Israel ma pashian.
12 Se shi,
pekadu nna judio fë pa nna nguë mundu vla fë liku,
ku nna nguë ineñ shi na sa judiof,
¿kë amea shi ske kuta pa ineñ tan të savasan ntëlelele?
13 Mandji se amu të uan kuzhu pa amu faa namsëdji,
namsëdji ineñ shi na sa judiof.
Pakë Nashian pë amu apostol da nna nguë ineñ shi na sa judiof,
se amu ja da sulvisu se ondolo.
14 Amu ngongo pa zhugan nna nguë tela amu ja leva namsëdji,
pa amea sai pa fë pa zhugan ineñ të savasan.
15 Pakë shi naga shi nna judio ma bi da mundu se zhunta jözhë ja pë ku Nashiolo,
¿kë ja a na tan ske ma bif,
shina vida fo dantu nna nguë ineñ shi bi sa möliduf?
¡Zhugan ja shif,
shina vida dantu nna nguë ku bi sa mölidu bebezha!
16 Pakë shi ampan shi pimëlu se a ja fë ku tulugu madu shi sa ja santu,
a shime ten ja sa tulugu madu shi sa ntëlu.
Se shi leezha döpa sa ja santu,
se sa shime se ten ja sa manga manga.
17 Se öpa olivo,
ku sa nna judio,
ku se a pota ineñ zhugan ponodu manga manga,
se jamian dëneñ se a paka manga manga öpa olivo djiga pë ku se sa bo.
Se sa amea shi bo ten ma pachi leezha shime ku aua öpa olivo shime.
18 Mandji se bo na ja këlëdöguë bofa,
ja ska pia manga manga ineñ sai shimafan ja sono sonof.
Shi bo ja fë shi,
ja lambela fa bo na sa nguë shi ja gaga leezhaf,
shina leezha se ja gaga bo.
19 Jativie bo ja faa:
«Aen,
mandji se a pota zhugan manga manga valadji pa mëtë amu pë dantu manga öpa olivo».
20 Sa gavu.
Mandji se a pota ineñ folo dajantu ku ineñ na të jonfaf,
se bo dajantu jonfa se bo ja mdja dëtu.
Dajantu shi pa bo na ja sa subebuf,
shina pa bo ja sa ku mendu.
21 Pakë shi Nashian na pada manga manga ineñ shi shishizhuf,
ëli na ten ske pada bof.
22 Ja pia,
pakë,
kë amea shi Nashian gavu,
benga zha pa ëli me ten sa dëtu.
Dëtu ku nna nguë ineñ shi na ja tëndë ëli,
se ëli bi sa gavu ku bo.
Mandji se ta pa bo ja bibe olatuvëdji shi ja jonfa gavu dëli,
pakë na ja sa shif,
a shime a ten ske pota bo.
23 Fo utu pachi,
shi nna judio ja chama sa nna nguë ku na ja këlëf,
se a tan ske vlame paka ineñ pë,
pakë Nashian të pödë pa ëli tan vlame paka ineñ pë.
24 Pakë shi bo,
ku fo uan tempu bi sa uan manga öpa olivo djiga,
se a pota bo se a paka bo pë dantu öpa olivo shi gavu,
¡jantu mashi nna judio,
ku se sa manga manga shishizhu öpa olivo shi gavu,
se a tan ske vlame paka ineñ pë tuludöguë öpa olivo dëneñ!
Tela Israel tudu ske sava
25 Nna namain,
amu ngongo pa namsëdji sëbë kumi jö sai fo Nashiolo,
valadji pa namsëdji na këlëdöguë namsëdji fa namsëdji sa sëbëdölöf:
nna pövu Israel uan pachi vla fë kusan ödu,
mandji ba toja pa nna nguë na ja këlë Nashianf tudu ske lantela.
26 Ta jö sai ja shiga,
se pövu Israel tudu ske të savasan,
pakë Fa Nashian faa:
«Nguë shi ske fë pa sa legadu ske së fo Sion
se ëli ske safa ja fëfëiu fo Jakob.
27 Se jö sai se ske sa bechi amu ku ineñ
ta amu ja chila pekadu dëneñ folo».
28 Se tëjantu ku evanjelio,
a ja pia nna judio shimafan ja ineñ sa nna namigu Nashiolo valadji pa ineñ da nna namsëdji fölöshö;
mandji se Nashian ontolo ngongo ku ineñ,
pakë ëli ma nna paipai dëneñ.
29 Pakë ja gavu dödji shi Nashian ja da nguë na tan ja ma fo nguëf,
amea shi sama dëli ten ja sa.
30 Tempu baezha,
namsëdji na bi ska tëndë Nashianf,
mandji se öseshi nna judio na tëndë Nashianf,
se Nashian ten të mindjikodji namsëdji.
31 Se ten sa amea shime,
ku ineñ na tëndë ëli öseshif,
mandji se sa pa Nashian të mindjikodji namsëdji ku valadji pa,
a shime öseshi pa ten të mindjikodji da ineñ.
32 Pakë Nashian ma nguë tudu amea shime ku a na ja tëndë ëlif,
valadji pa ëli të mindjikodji nguë tudu.
33 ¡Kë amea ngandji shi sa gagavu Nashiolo,
ku sëbëdölö ku tëndëmentu!
Zhugan nguë na paadji jua juisio dëlif,
ku a na ja paadji lantela jamangandji dëlif.
34 Pakë,
¿kë nguë jönsë miolo Shiölö?
¿Kë nguë sa nguë shi ja da ëli shizhu?
35 ¿Kë nguë da ëli uan kuzhu zha,
valadji pa ëli tan vlame da ëli?
36 *Pakë ja tudu sa ja fo ëli,
se ja tudu sa dajantu ëli se ja tudu sa ja da ëli.
¡Ilö ku gloria pa sempele da ëli!
Amen.