Israel ku evanjelio
10
Nna namain,
dishamentu kusan amu ku lezha amu da Nashian da nna nguë Israel sa pa ineñ të savasan.
2 Amu paadji da lazhan gavu fa ineñ të dishamentu ngandji da Nashiolo ku kusan dëneñ tudu,
mandji se dajantu ngongo dëneñ na ja sa basu tëndëmentuf.
3 Pakë ineñ na ja tëndë fa,
Nashian se sa nguë shi ja fë nna napai tudu dëtuf,
se ineñ ja ska ngongo sa nna nguë dëtu ku öma dëneñ;
se sa amea shi ineñ na ja pë öguë dëneñ basu jö shi Nashian ja fë pa no sa nguë dëtuf.
4 Pakë ku Kilitu se ja të jabamentu alë,
se amea sai se nguë tudu ja sa dëtu amea jonfa sai.
5 Pakë se fo djustishi shi ku ja sa basu alë,
se Moises skëvë jö sai:
«Pöjödölö shi ja fë jö ineñ sai ske bibe tëjantu ku ineñ».
6 Mandji se djustishi ku ja sa basu jonfa,
se a ja faa:
«Na faa dantu kusan bof:
“¿Kë nguë ske subili ba ösë?”,
(sa jö sai,
pa ja fë pa Kilitu dësë bi);
7 ö “¿Kë nguë ske dësë ba jamian fundu shi ku a na ja bë basuf?”,
(jö sai se sa;
pa ja fë pa Kilitu ja subili fo dantu nna nguë mölë bebezha)».
8 ¿Kë jö se sa,
kë ja ëli fala?
«Fa Nashian sa lome bo,
sa böjö bo ku kusan bo».
Fala sai se sa nova jonfa shi no ja pegua.
9 Se shi ku böjö bo se bo ja jönsë Djisu shimafan Shiölö bo,
se ku kusan bo se ja këlë fa Nashian lanta ëli fo dantu nna nguë mölë bebezha,
bo ske të savasan.
10 Pakë ku kusan se a ja këlë pa ja të djustishi,
se ku böjö se ja jönsë Djisu pa ja të savasan.
11 Pakë Fa Nashian faa:
«Nguë shi ja jonfa ëli tudu,
na ske mdja ku govanf».
12 Na ja sa tave shi uan nguë ja sa judio ku uan na ja sa judiof;
pakë Shiölö shime se sa Shiölö nguë tudu,
se ëli ja da ku batanchi nna nguë ineñ shi ja lezha ja pindji ëli zhuda.
13 Pakë «ja sa nguë shi tudu ja lezha ku namu Shiölö ske të savasan».
14 Mandji,
¿kë amea shi ineñ ske lezha da ëli,
shi ineñ na bi ja këlë dëlif?
¿Se kë amea shi ineñ ske këlë da uan nguë ku ineñ na sa tëndë a faa ja tëjantu ku ëlif?
¿Se kë amea shi ineñ ske tëndë,
shi na të nguë pa bi pegua da ineñf?
15 ¿Se kë amea shi ineñ ske pegua nova sai,
shi a na da ineñ bef?
Se amea shi Fa Nashian faa:
«¡Kë amea shi ja fë fumözhö ta a ja bë nna nguë ineñ ja bi ku nova gavu!».
16 Mandji se ineñ tudu na tëndë evanjeliof,
pakë Isaias ja faa:
«Shiöla,
¿kë nguë këlë nova no?».
17 Se sa amea shi,
jonfa fo ja bi ta a ja tëndë nova,
se nova ja bi fo fala Kilitu.
18 Mandji se amu ja pongota:
¿Ske sa fa jativie ineñ na tëndë nova sefa?
¡Aen ineñ tëndë!,
pakë Fa Nashian ja faa:
«Fala dëneñ panta panta tela tela tudu,
ba toja jabamentu mundu fala dëneñ ba da ala».
19 Se amu tan ja vlame pongota:
¿Ske sa fa Israel na jönsë jö sefa?
Fo pimëlu jamian,
se Moises faa:
«Amu ske fë pa namsëdji të dishamentu ngandji uan pövu
ku na sa pövuf.
Se ku pövu mbasadu sai,
se amu ske fë namsëdji ma pashian».
20 Zha se,
pantafala Isaias ku amea tividu dëli tan faa:
«Se nna nguë ineñ shi na bi ska jua amuf,
dajonta ku amu
se amu msa öguë amu nna nguë ineñ na bi ska pongota tëjantu ku amuf».
21 Mandji se ta amu ja fala tëjantu ku nna nguë Israel,
se pantafala Isaias ja faa:
«Djia tudu amu ja bla baasu amu da ineñ,
mandji se ineñ sa uan pövu ödu ku na ja tëndë nguëf».