Pövu shishizhu Nashiolo
9
Amu ska da vedadji dajantu Kilitu,
amu na ska da fanchilaf.
Vlame,
kusan limpi amu ku ja ska lë Spitu Santu,
ja ska sugula amu fa,
jö sai sa vedadji:
2 amu sa ku uan modoia ngandji se dantu kusan amu sa ku uan duadu tempu löngö ku na ja lega amuf,
3 ba toja ku tuludöguë amu ja ngongo sa basu masan,
safadu fo Kilitu,
pa amea sai pa amu paadji fë ja pachi nna namain amu,
nna nguë zhenchi amu.
4 Ku sa nna nguë pövu Israel,
se Nashian ma ineñ shimafan nna mina dëli.
Se Nashian bi sa dantu ineñ ku gloria dëli,
se ëli da ineñ bechi,
alë Moises,
ku sulvisu ku plomesa.
5 Ineñ se sa nna minadjimina nna paipai no;
ku zhenchi dëli,
se Kilitu se fo dantu nna pöjödölö,
ku se sa Nashian liba ja tudu,
besa ja sa ku ëli pa sempele.
Amen.
6 Mandji se na sa fa plomesa Nashian ku nna paipai Israel pëndë sinchidu dëlif,
shina na sa fa nna nguë ineñ shi së fo Israel tudu se sa pövu Israel shishizhuf.
7 Na sa nna minadjimina Abraam tudu se sa nna mina dëli shishizhuf,
shina:
«Nna minadjimina bo tudu ske bi amea Isaak».
8 Jö sai ja da no ötëndë fa zhugan nguë na ja sa mina Nashian moso pakë ëli sa nguë uan zhenchif.
Shina,
ja sa nna nguë ineñ shi sa nna mina ku ja fë pa kumpli plomesa Nashiolo,
se a ja bë ineñ shimafan nna minadjimina shishizhu.
9 Pakë palavulu se sa plomesa sai:
«Dantu uan anu amu tan ske bi,
se Sara ten ske sa ku uan mina».
10 Mandji se jö sai na se sa ja tuduf.
Nna mina Rebeka dödösu tudu sa dji pai shime,
paipai no Isaak.
11 Ontolo a na bi sa pali ineñf,
ñi ontolo ineñ na bi sa fë zhugan ja gavu ñi fëfëiuf,
valadji pa ja msa fa Nashian se ma ineñ amea vintadji dëli,
12 na ja sa dajantu fidu jaf,
shina dajantu ëli shi ja sama.
Se Nashian faa ëli:
«Nguë shi ngandji ske shivi nguë shi kichi».
13 Ku se ten bi sa jö shime ku jö shi Fa Nashian faa:
«Amu ngongo ku Jakob,
mandji se amu nozho Esau».
«Amu ske të mindjikodji da nguë shi amu ja ngongo të mindjikodji da,
se amu ten ske të dölö da nguë shi amu ja ngongo të dölö da».
16 Se sa amea shi,
na sa dajantu ku uan napai ja ngongo ö ja fë ja ku foshif,
shina da öshi Nashian ja të mindjikodji.
17 Pakë dantu Fa Nashiolo se Nashian ja faa Faraon:
«Amu se fë pa bo sa alë dajantu pa amu msa pödë amu fo bo ku pa mundu nguintëlu nguintëlu jönsë amu».
18 Amea sai se Nashian ja të mindjikodji ku nguë shi ëli ja ngongo të ku ëli,
se a shime ëli ten ja fë pa ja të kusan ödu ku nguë shi ëli ja ngongo pa të kusan ödu.
19 Mandji se bo ske faa amu:
«Se ja sa shi,
¿kë amea shi Nashian ske paadji da napai kupa,
shi zhugan nguë na paadji pöpa tëjantu ku vintadji dëlif?».
20 Se bo,
napai,
¿kë nguë sa bo pa bo pindji Nashiolo kuenta?
¿Sa fa ögögö balu ske faa nguë shi fë ëli:
«¿Jama fë bo fë amu amea sai?»?
21 Nguë shi ja fë ja ku balu të pödë pa ëli fë jö shi ëli ja ngongo fë ku balu,
se fo balu se me,
se a ja paadji fë uan ögögö da uan djia ngandji ku da uan djia shipë.
22 Se Nashian,
ku bi ngongo da uan zhampulu jatigu ku pa ëli ten msa pödë dëli,
se ëli gaga nna nguë ineñ shi bi bi mësë jatigu ku ineñ bi sa pindjidu ku pashiensa monchi.
23 Se tempu shime se ëli bi ngongo msa no amea shi gloria dëli ngandji,
pakë ëli të mindjikodji no,
se ëli fë vadu da no pa ëli da no besa valadji pa no të pachi ku ëli.
24 Se sa amea shi Nashian bi sama no,
zhugan nguë fo dantu nna judio se utu nguë fo dantu nna nguë ineñ shi na sa judiof.
25 Amea shi lavulu pantafala Oseas faa:
«Se nna nguë ineñ shi na bi sa pövu amuf,
se amu ske sama ineñ pövu amu;
se amu ske sama nguë shi na sa ngongodu amuf ai,
ngongodu amu».
26 Se ëli ten faa:
«Se jamian shime se ëli faa ineñ:
“Namsëdji na sa pövu amuf”,
se a ske ja sama namsëdji
“nna mina Nashian shi sa vivu”».
27 Se tëjantu ku pövu Israel,
pantafala Isaias bi faa:
«Benga zha pa nna namina Israel sa monchi shimafan alea domali,
zhugan fi ponodu ineñ se ske të savasan,
28 pakë goleme Shiölö ske kumpli fala dëli
ntëlelele mundu nguintëlu nguintëlu».
29 Amea shi tuludöguë pantafala Isaias bi faa bebezha:
«Shi Shiölö shi sa Pödë Tudu na bi bi lega nna minadjimina pa ëli da nof,
öseshi me no bi ske sa shimafan nna nguë sodoma ku Gomora».
Israel na ja këlëf
30 ¿Kë ja no ske faa da jö sai?
Fa,
dajantu amea jonfa,
se Nashian fë nna nguë dëtu nna nguë ineñ shi na ja këlë Nashianf,
ku na ja jua djustishif.
31 Mandji se nna namina Israel,
ku bi ngongo pë djustishi dëneñ basu alë,
se ineñ na të djustishi zhugan djiaf.
32 ¿Pakë ja fë?
Pakë ineñ na bi ska sa tave jonfaf,
shina dajantu fidu ja dëneñ.
Dajantu shi se ineñ da topu ku «budu shi a ja ma da topu».
33 Amea shi sa skividu:
«Namsëdji ja pia amu ja pë Sion uan budu da topu,
uan lapa ku ja fë nguë pono,
mandji se nguë shi ja jonfa ëli,
na ske ma govanf».