Spitu Nashiolo ja da no vida
8
Se sa shi,
öseshi na tan të zhugan kondena shif da nna nguë ineñ shi sa zhuntadu ku Kilitu Djisuf,
2 pakë alë Spitu Nashian se ja da nguë vida ku Kilitu Djisu,
ku se fë pa bo sa legadu fo alë pekadu ku dji mölë.
3 Pakë jö shi alë na bi paadji fëf,
pakë bi sa ja levu da döguë;
dajantu shi se Nashian da tuludöguë Mina dëli bi shimafan pöjödölö ku ja fë pekadu se dajantu pekadu,
valadji pa amea sai pa kondena pekadu döguë.
4 Se fë valadji pa no paadji kumpli mandatu shi dëtu dalë,
pakë no na tan ska bibe amea döguëf,
shina amea Spitu.
5 Nna nguë ineñ shi ja bibe amea döguë,
ineñ ja ska mazhna dishamentu döguë;
mandji se nna nguë ineñ shi ja ska bibe amea Spitu,
ineñ ja ska mazhna dishamentu Spitu.
6 Dajantu shi,
se nna nguë ineñ ineñ shi ja ska mazhna dishamentu döguë ja ska ma ineñ ba mölë,
mandji se nna nguë ineñ shi ja ska mazhna dishamentu Spitu ja ska ma ineñ ba vida ku padji.
7 Se nna nguë ineñ shi ja ska pë jasa pa ineñ ja ska lë dishamentu döguë pekadu sa nna namigu Nashiolo,
pakë ineñ na ja ngongo ñi na ja paadji sa basu alë dëlif.
8 Dajantu shi,
se nna nguë ineñ shi ja ska bibe amea dishamentu döguë levu ineñ sai na ja paadji fë ja gavu pa ja fë gavu da Nashianf.
9 Mandji se namsëdji na tan ja bibe basu amea dishamentu döguë pekadufa,
shina amea dji Spitu,
ku se sa öshi Spitu Nashian ja ta dantu namsëdji.
Nguë shi na ja të Spitu Kilituf,
ëli na sa ja Kilituf.
10 Mandji se shi Kilitu ja sa dantu namsëdji,
se öguë ja sa mölidu tëjantu pekadu;
mandji se Spitu shi ja sa dantu namsëdji se sa vida tëjantu djustishi.
11 *Se shi Spitu nguë shime ku lanta Djisu fo dantu nna nguë mölë bebezha ja ta dantu namsëdji,
ëli shime ku lanta Kilitu fo dantu nna nguë mölë bebezha ske da öguë mölidu namsëdji uan vida novu amea Spitu Nashian shi ku ja ta dantu namsëdji.
12 Se sa shi,
nna namain,
no na sa ku deuda pa no ja bibe amea dishamentu döguë pekaduf.
13 Mandji se shi namsëdji ja ta amea dishamentu döguë pekadu,
namsëdji ske mölë,
mandji se shi amea Spitu Nashiolo se ja fë pa dishamentu döguë ja mölë,
namsëdji ske bibe.
14 Nna nguë ineñ shi ja ska tëndë Spitu Nashiolo,
ineñ sa nna mina Nashiolo.
15 **Pakë namsëdji na ma spitu sëlëva pa namsëdji tan vlame ba të mendufa,
shina Spitu Nashian shi ku ja fë pa namsëdji sa nna mina Nashiolo.
Se dajantu Spitu se no ja paadji faa Nashian:
«¡Abba,
Pai!».
16 Se Spitu Nashian se me,
se ja zhunta ku spitu no valadji pa da lazhan fa no sa nna mina Nashiolo.
17 Se shi no ja sa nna mina dëli,
se no ten ske të pachi gagavu ineñ shi Nashian bi plomëtë no iai,
ku se no ske pachi ku Kilitu,
shi anta vedadji no ska padësë zhuntadu ku ëli,
se no ten ske të pachi ku ëli dantu gloria dëli.
Gloria shi ku tan ske bi
18 Amu ja bë fa mavida tempu dödjai na ske paadji sa shimafan gloria shi ku tan ske bi bi msa dantu no ief.
19 Pakë mundu nguintëlu nguintëlu ja ska gada ku dishamentu ngandji ta a ske msa nguë tudu kë nna nguë ineñ shi sa nna mina Nashiolo.
20 Pakë jö ineñ shi a mindji sa basu ja shipë.
Jö sai na bi shiga dajantu tuludöguë vintadji dëlif,
shina dajantu nguë shi se bi pë shi,
mandji se ontolo ëli ja të alagada;
21 fa jö shi a mindji ta pa sa legadu fo sëlëva ku ja sa poto potodu,
valadji pa ëli paadji sa legadu ku pa ëli të gloria shi nna mina Nashiolo ja të.
22 No sëbë fa mundu nguintëlu nguintëlu ja ska bë ja djimi shimafan uan naamain ku sa ku dölö pali bi toja öseshi.
23 *Se na sa ëli mosof,
shina a shime tuludöguë no,
ku sa ku Spitu,
no ja ska djimi dantu döguë no,
ja gada tempu shi a ske ma no shimafan nna mina,
ku se sa,
legadu öguë no.
24 Ku alagada sai se a sava no.
Ja gada jö ineñ shi a ska bë bebezha na ta sa ja a ska gadaf,
pakë,
¿kë nguë tan ja gada jö shi a ska bë bebezha?
25 Mandji,
se shi no ska gada jö shi ku ontolo no na tëf,
se dantu gada no se no ja msa amea gaga pashiensa no.
26 Se sa amea shime,
ku Spitu ja vëlë no ta no ja sa levu.
Pakë no na sëbë pindjif,
mandji se Spitu se me,
se ja luga da no,
ku djimi ku a na ja paadji faa ku falaf.
27 Se Nashian ku se ja golo kusan tudu,
ja sëbë jö shi Spitu Nashian ngongo fala,
pakë Spitu Nashian ja luga da pövu santu amea vintadji Nashiolo.
28 No sëbë fa Nashian ja ska pë ja tudu,
pa ja sa gavu da nna nguë ineñ shi ja ngongo ku ëli,
nna nguë ineñ shi ëli sama amea vintadji dëli.
29 Nna nguë ineñ shi fo tempu baezha se ëli bi jönsë bebezha,
se fo jomesadu se ëli pë ineñ pa ineñ sa amea fesan Mina dëli,
valadji pa Mina dëli se sa pimëlu dantu uan sapa nna namain.
30 Se nna nguë ineñ shi Nashian ma fo jomesadu,
se ëli sama ineñ,
se nna nguë ineñ shi ëli sama se ëli fë ineñ dëtu,
se nna nguë ineñ shi ëli fë dëtu,
se ëli da ineñ gloria dëli.
Zhugan ja na ske paadji safa no fo ngongo Nashiolo
31 ¿Kë ja no tan ja fo faa mashi?
¡Shi no ja të föböli Nashiolo,
zhugan nguë na ske paadji të zhugan ja tëjantu ku nof!
32 Shi Nashian na naga no ñi tuludöguë Mina dëlif,
shina ëli da pa mölë dajantu no tudu,
¿jama fë ëli na ten ske da no ku vintadji,
ku kusan betu zhuntadu ku Mina dëli,
ja tuduf?
33 ¿Kë nguë ske paadji da fëiu da nna nguë ineñ shi ku Nashian se ma?
Nashian se fë nna nguë dëtu.
34 ¿Kë nguë ske kondena?
Kilitu Djisu se sa nguë shi mölë,
ku se mashi,
se ëli tan lanta bi vida,
se ëli sa benda dëtu Nashiolo,
ja luga da no.
35 ¿Kë nguë ske paadji safa no fo ngongo Kilitu?
¿Mavida ö dantu kulënchë,
ö sa tashi dji nguë ja pëtëpë nguë,
ö fomu,
ö gödödji,
ö pepe mölë,
ö mölë fëiu?
36 Se sa amea shi Fa Nashian faa:
«Dajantu bo se no olatuvëdji ja sa pepe mölë;
a ja fë no shimafan jabala ku a ska ma ba jamian kote jañi».
37 Mandji se dantu jö ineñ se,
se no ja ngana amea nguë shi ngongo ku no.
38 Dajantu shi se amu sa suguladu fa zhugan ja na ske paadji safa no fo ngongo Nashianf,
ñi mölë,
ñi vida,
ñi nna anzhu,
ñi zhugan pödë,
ñi foshi fo spituf,
ñi ja dödjai,
ñi jö ineñ shi tan ska bif,
39 ñi jö shi atu mashi,
ñi jö shi fundu mashi,
ñi zhugan utu jö ineñ shi ku Nashian mindjif.
Zhugan ja na ske paadji safa no fo ngongo Nashian shi ku ëli msa no amea Kilitu Djisu Shiölö nof.