Zhampulu jazha
7
Nna namain,
namsëdji jönsë alë,
se namsëdji sëbë fa alë ja të pödë liba uan pöjödölö öshi ontolo ëli sa vivu.
2 Uan zhampulu,
uan mooso jazhadu sa zhuntadu ku medu dëli basu alë öshi ontolo ëli sa vivu.
Mandji se shi medu dëli ja mölë,
mooso sai ja sa legadu fo alë shi bi zhunta ëli ku medu dëli iai.
3 Se shi ëli ja zhunta ku uan napai öshi ontolo medu dëli sa vida,
ëli ska kabajölöiö.
Mandji se shi medu dëli ja mölë,
se ëli ja sa legadu fo alë sai,
se ëli ja paadji zhunta ku uan utu napai shinke ëli ska kabajölöiö.
4 Se sa amea shime,
namsëdji,
nna namain amu,
ta namsëdji ja zhunta öguë namsëdji ku Kilitu se namsëdji ja mölë ku ëli ku alë,
valadji pa namsëdji ja mdja zhuntadu ku utu nguë,
ku nguë shi tan lanta fo mölë.
Se fo amea sai,
se no ja paadji da fuluta gavu da Nashiolo.
5 Pakë ta no bi ska bibe shimafan pekadölö,
se alë bi ska shivi valadji pa ja lanta öguë no dishamentu fëfëiu,
ku jö shi moso no ja da sa fuluta mölë.
6 Mandji se öseshi se mölë ku alë ku se bi pë no basu pödë dëli,
pa amea sai pa no ja sa legadu valadji pa no ja shivi Nashian dantu vida novu fo Spitu ku na sa basu uan mandamentu antigu skividuf.
Alë Nashian ja msa pekadu no
7 ¿Kë ja no ske fala?
¿Alë sa pekadu?
¡Zhugan limedji shif!
Mandji se pa na sa dajantu alëf,
amu na bi ske sëbë ja sa pekaduf.
Pakë zhugan djia amu na bi sëbë ja sa dishia ja dji nguëf,
shi alë na bi faaf:
«Na ja dishia ja dji nguëf».
8 Mandji se pekadu se ma fölöshö mandamentu sai,
se ëli ma gavu tuludöguë mandamentu se ëli lanta dantu döguë amu klase dishamentu fëfëiu tudu.
Pakë öshi na ja të alëf,
pekadu ja sa ja mölidu.
9 Bi të uan tempu ku,
shin alë,
amu bi sa ku vida,
mandji se ta mandamentu bi,
se pekadu tan të vida,
10 se amu se ma ba mölë.
Se jö shi bi sa fa mandamentu shi ku bi sa pa da amu vida,
se ma amu ba mölë,
11 pakë pekadu ma jamian mandamentu se ngaña amu,
se ku mandamentu se me,
se fë se amu mölë.
12 Se no jaba pë iai,
se no ja faa,
tuludöguë alë se me sa santu,
se mandamentu dëli sa santu,
dëtu ku gavu.
13 Mandji se tadashi,
¿jö sai ku sa ja gavu se ma amu ba mölë?
¡Zhugan limedji shif!
Jö shi ja fë sa fa pekadu,
valadji pa msa fa anta vedadji sa pekadu,
se fë se amu mölë amea jö shi gavu.
Se sa,
amea mandamentu,
se ja msa amea fëiu shi pekadu sa ja fëiu.
Pezha ku pekadu
14 No sëbë fa alë sa ja fo spitu;
mandji se amu sa nguë levu,
ku a vëndë amu shimafan sëlëva da pekadu.
15 *Amu na ja tëndë jabamentu fidu jö ineñ shi amu ja fëf,
pakë amu na ja fë jö shi amu ja ngongo fëf,
shina jö ineñ shi amu ja të pashian se sa jö ineñ shi amu ja fë.
16 Mandji se shi ku ineñ shi amu ja ska fë,
na se ja sa jö shi amu ja ngongo fëf,
se amu ja jönsë fa alë se sa gavu.
17 Se sa fa na sa amu se sa nguë shi ja fëf,
shina pekadu shi sa dantu amu.
18 Pakë amu sëbë fa dantu amu,
ku sa dishamentu döguë pekadu,
na ja të zhugan ja gavuf,
pakë benga zha pa amu ja sa ku dishamentu pa amu fë ja gavu,
amu na ja paadji fëf.
19 Amu na ja fë gavu shi amu ja ngongo fëf,
shina ja fëfëiu shi amu na ja ngongo fëf.
20 Se sa gavu öseshi,
shi amu ja fë jö shi amu na ngongo fëf,
na tan sa amu se sa nguë shi ja fëf,
shina pekadu shi sa dantu amu.
21 Se fë ku ja da amu ötëndë alë sai:
ku,
ta amu ja ngongo fë gavu,
se fëiu se ja sa ku amu.
22 Pakë dantu döguë amu,
amu ja ngongo ku alë Nashiolo,
23 mandji se amu ja bë uan ja ku ja ska tëjantu ku jö shi amu paadji mazhna:
se sa alë pekadu,
ku sa dantu amu se pë amu dantu djili.
24 ¡Puvili amu!
¿Kë nguë ske fë pa amu sa legadu fo pödë mölë se sa dantu öguë amu iai?
25 Nashian moso,
se amu ja da dezhupaga amea Shiölö no Djisukilitu.
Pa jabamentu:
amu ja tëndë fa ta pa amu ja pë öguë amu basu alë Nashiolo,
mandji dishamentu döguë pekadu amu sa ja basu alë pekadu.