Pagu pekadu sa mölë
6
¿Tadashi,
a kë ja no ske fala?
¿No ske ja be deenchi ja fë pekadu valadji pa Nashian ja ska msa no galasa dëli mashi?
2 ¡Zhugan limedji shif!
No tudu bi sa mölidu dajantu pekadu,
¿kë,
amea shi,
no ten ske paadji ja bibe ku pekadu?
3 ¿Namsëdji na sëbëfa,
öshi no sa zhuntadu ku Kilitu Djisu fo bachizha dëli,
no ten ja sa zhuntadu ku mölë dëli ua?
4 *Pakë fo bachizha se a ntëla no ku Kilitu,
se no ske mölë valadji pa tan lanta no fo dantu nna nguë ineñ shi mölë bebezha zha pa no bibe uan vida novu,
se sa amea shi ku a ten lanta Kilitu fo dantu nna nguë mölë bebezha ku pödë gloria Pai.
5 Shi no ja sa zhuntadu ku Kilitu amea uan mölë shimafan dji dëli,
a shime no ten ske zhunta ku ëli ta ëli ten ske lanta fo dantu nna nguë ineñ shi mölë bebezha.
6 No sëbë fa jö shi no bi sa tudjia sa dadu pë kusu ku Kilitu,
valadji pa të öguë pekadu të baga pa no na tan sa sëlëva pekaduf.
7 Pakë,
ta uan nguë ja mölë,
se ëli ten ja mdja legadu fo pödë pekadu.
8 Se shi no ja mölë ku Kilitu,
no ten ja jonfa fa a shime no ten ske bibe ku ëli.
9 Se no sëbë fa Kilitu,
ku lanta fo dantu nna nguë ineñ shi mölë bebezha,
na tan ske vlame mölëf.
Mölë na tan të pödë liba dëlif.
10 Pakë Kilitu,
ta ëli mölë,
ëli mölë uan ope soso pa sempele tëjantu ku pekadu,
mandji se ta ëli ja bibe,
se ëli ja bibe da Nashiolo.
11 Se a shime,
ten ja pia öguë namsëdji mölidu dajantu pekadu,
mandji pa namsëdji ja sa vivu ku Nashiolo zhuntadu ku Kilitu Djisu.
12 Dajantu shi,
namsëdji na ja ska lega pa pekadu ja ska be ja domina öguë mölidu namsëdjif ku pa ja ska fë namsëdji afoshi pa namsëdji ja tëndë dishamentu döguëf.
13 Na ma öguë namsëdji ba da pekaduf,
shimafan uan limenta pa ma fë ja fëfëiuf.
Shina da öguë namsëdji a Nashiolo,
shimafan nna pöjödölö ku mölë bebezha ku tan vlame bi vida,
ku ja da öguë namsëdji shimafan limenta valadji pa fë jö shi sa ja dëtu deenchi dëli.
14 Se sa amea shi pekadu na tan ske të pödë liba namsëdjif,
pakë namsëdji na tan sa basu alëfa shina basu galasa Nashiolo.
Shividölö djustishi
15 ¿Tadashi kë kuzhu?
¿No ske ja fë pekadu pakë no na tan sa basu alëfa,
shina basu galasa Nashiolo?
¡Zhugan limedji shif!
16 Namsëdji sëbë gavu fa shi namsëdji ja ska da öguë namsëdji uan shiölö shimafan sëlëva pa ja tëndë ëli,
tadashi namsëdji ske sa sëlëva shiölö se namsëdji ja tëndë iai.
Se jö sai sa shi,
shi namsëdji ja tëndë pekadu,
ku se ja ma nguë ba mölë,
se sa amea shi a ten ja tëndë Nashiolo pa bibe ku djustishi.
17 Mandji se dezhupaga ku Nashiolo ku namsëdji,
ku tudjia namsëdji bi sa sëlëva pekadu,
namsëdji tëndë ku kusan amea shina ja ineñ shi a da namsëdji.
18 Se öseshi ku namsëdji sa legadu fo sëlëva pekadu,
namsëdji lantela dantu sëlëva djustishi.
19 (Amu ska faa fala,
ku namsëdji amea sai,
pakë namsëdji ontolo sa foli,
se namsëdji na paadji tëndë ja gavu ineñ sef).
Se sa fa,
amea shi tudjia namsëdji bi da öguë namsëdji sulvisu da sëlëva ja nozhodu ku ja masan masan valadji pa namsëdji ja fë ja fëfëiu,
ten da öguë namsëdji sulvisu öseshi da sëlëva djustishi,
valadji pa namsëdji të uan vida santu.
20 Ta namsëdji ontolo bi sa sëlëva pekadu,
namsëdji na bi sa sëlëva djustishif,
21 mandji,
¿tadashi kë ja gavu namsëdji chila?
Öseshi se namsëdji ja të govan jö ineñ sai,
pakë tudu sa ja ku ja ma nguë ba mölë.
22 Mandji se öseshi,
namsëdji sa legadu fo basu sëlëva pekadu,
se namsëdji lantela basu sëlëva Nashiolo.
Jö sai se ja sa gavu da namsëdji,
pakë gavu dëli sa uan vida santu,
se jabamentu ja sa vida chindadji.
23 Pakë pagu shi pekadu ja da sa mölë,
mandji se ja gavu dödji shi Nashian ja da nguë sa vida chindadji zhuntadu ku Kilitu Djisu,
Shiölö no.