Jonfa shi ja bi pa zhuntadu ku Kilitu
5
Sa fa Nashian fë pa no sa dëtu amea jonfa sai,
se no ten të padji ku Nashiolo amea Shiölö no Djisukilitu.
2 Pakë dajantu Kilitu se no paadji iaba lome Nashiolo amea jonfa,
valadji pa no të galasa dëli,
ku pa no ja sa mdja dëtu.
Dajantu shi se no ja të liguilia dantu alagada pa no ja dajonta ku gloria Nashiolo.
3 Se na sa jö se mosofa,
shina ku a shime no ten ja të gloria dantu padësë,
pakë no sëbë fa dantu padësë ja da no foshi pa no paadji gaga ja tudu,
4 se shi no ja shina gaga ja tudu,
se a ja da no aen,
se ta no ja sa ku aen se no ja të alagada.
5 Se alagada sai na ja fë no të govan zhugan jaf,
pakë Nashian ja shia kusan no ku ngongo dëli amea Spitu Santu shi ku ëli da no iai.
6 Pakë ta no na bi paadji sava öguë nof,
ta bi da tempu se Kilitu,
mölë dajantu pekadu nna malvadu.
7 Sa uan ja ödu pa uan nguë mölë dajantu uan nguë dëtu.
Benga zha pa të nguë shi ja paadji mölë dajantu uan nguë gavu döme gavu.
8 Mandji se Nashian msa amea ngongo shi ëli të ku no,
ku benga zha pa no sa pekadölö,
se Kilitu mölë dajantu no.
9 Se öseshi,
ta Nashian fë pa no sa dëtu amea sangui Kilitu,
se sa öshi no tan sa dëtu mashi pa no sa savadu fo jabamentu pashian.
10 Pakë shi,
ta ontolo no bi sa nna namigu Nashiolo,
se ëli tan zhunta no ku ëli amea mölë Mina dëli,
se dajantu jö sai se no të dëtu mashi,
pa no sa zhuntadu ku ëli,
se a ske sava dajantu vida dëli.
11 Se na sa jö se mosofa,
shina ku a shime no ten ja të gloria Nashian amea Shiölö no Djisukilitu,
pakë fo Kilitu se ëli ma no öseshi pa no sa zhuntadu.
Adan ku Kilitu
12 Dajantu shi,
se sa amea shi fo uan ponodu napai se pekadu lantela mundu sai,
se dajantu pekadu se lantela mölë,
se sa amea shi pasa ku nguë tudu pakë nna nguë tudu fë pekadu.
13 Anta pa bi të alë,
mundu bi të pekadu bebezha,
mandji se ta na ja të alëf,
a na ja sa tave pekaduf.
14 Mandji se,
se fo tempu Adan ba toja dji Moises,
mölë bi sa alë liba nna nguë ineñ shi ja fë pekadu,
benga zha pa pekadu nna nguë ineñ sai na bi sa dajantu ineñ na ja tëndë uan mandatufa,
amea shi Adan bi fëf,
ku se bi sa fesan nguë shi bi ske ta pa bi.
15 Mandji se gavu dödji na sa shimafan pekaduf,
pakë se shi dajantu pekadu ponodu nguë shiki se uan sapa dji nguë mölë;
se tan ba monchi mashi da uan sapa dji nguë da galasa ku gavu dödji Nashiolo dajantu galasa uan ponodu napai,
Djisukilitu.
16 Pekadu uan ponodu napai na fo sa shimafan ja gavu dödjif,
pakë anta vedadji se juisio bi dajantu uan ponodu pekadu ku se bi kondena nguë,
mandji se ja gavu dödji bi dajantu uan sapa pekadu pa tan vla fë dëtu.
17 Pakë shi dajantu pekadu uan ponodu napai,
se mölë bi sa gövöndölö,
ku dëtu ngandji mashi da nna nguë ineñ shi Nashian,
fo gavu ngandji dëli dödji limpi pepepe,
se ëli ja fë nguë tudu sa dëtu,
pa ineñ sa alë dantu vida shi novu amea uan ponodu napai,
Djisukilitu.
18 Se sa amea shi pekadu Adan pë napai tudu basu kondena,
se ten sa amea shime ku fidu ja dëtu Djisukilitu ja fë napai tudu dëtu valadji pa ineñ të vida.
19 Sa fa,
dajantu uan ponodu napai ku na tëndë Nashianf,
se uan sapa nguë vla fë pekadölö,
mandji se ten sa amea shime,
dajantu uan ponodu napai ku tëndë Nashiolo,
se uan sapa ineñ vla fë nna nguë dëtu.
20 Alë sa ja a da bi valadji pa pekadu tan ba monchi mashi;
mandji se ta pekadu tan monchi mashi,
se Nashian tan msa galasa dëli mashi.
21 Se shi,
se sa amea shi pekadu sa ja të pödë liba no,
ku ëli se bi ku mölë,
se ten sa amea shi galasa Nashian ku sa pödë ja ska fë no nna nguë dëtu se ëli ten ja da no vida chindadji amea Shiölö no Djisukilitu.