Jonfa shi sa ku Abraam
4
Mandji se tadashi,
¿kë ja no ske faa,
tëjantu ku paipai no Abraam,
amea zhenchi nna pöjödölö?
2 Sa vedadji fa,
shi Abraam bi ske sa jönshidu shimafan uan nguë dëtu dajantu fidu ja dëli,
ëli bi ske sa dëtu pa ëli ja sinchi gloria döguë dëli,
benga zha pa na sa deenchi Nashianf.
3 *Pakë Fa Nashian faa:
«Abraam këlë Nashiolo,
se dajantu shi se Nashian ma ëli shimafan nguë dëtu».
4 Se öseshi,
shi uan nguë ja ska tabaia,
a na ja da ëli pagu shimafan uan föbölif,
shina shimafan uan deuda.
5 Mandji se,
shi uan nguë na ja tabaiaf,
shina ëli ja këlë nguë shi ja malvadu dëtu,
jonfa dëli a ja jonta shimafan djustishi.
6 Amea shi,
a shime alë David faa ja ku besa tëjantu ku nguë shi Nashian ja jönsë shimafan nguë dëtu shinke ëli jonta fidu ja dëli,
7 ëli faa:
«¡Besa se ja sa ku nna nguë ineñ shi a ja pada ja fëfëiu dëneñ tudu,
se ëli ja tapa pekadu dëneñ tudu!
8 ¡Besa se ja sa nguë shi Shiölö na ja jonta pekadu dëlif!».
9 ¿Ske sa fa besa sai sa ja nna nguë ineñ shi sa kutadu napai moso,
ö ten sa dji nna nguë ineñ na ten ja saf?
Pakë no faa a ma Abraam dajantu jonfa dëli shimafan nguë dëtu.
10 Mandji,
¿kë djia ëli jonta ku ëli?
¿Ta a bi kuta Abraam napai dëli bebezha,
ö anta ja fë pa kuta ëli?
Na bi sa shif anta ja fë pa kuta ëlif.
11 Zha se a bi kuta Abraam napai dëli,
shimafan shinali ö sëiu shi Nashian msa fa ëli jönsë ëli shimafan nguë dëtu dajantu jonfa dëli.
Se amea sai,
Abraam ten bi sa pai nna nguë ineñ shi ja jonfa Nashiolo tudu,
benga zha pa napai dëneñ na sa kutaduf;
se sa amea shime Nashian ten ja jönsë ineñ shimafan nna nguë dëtu.
12 Se Abraam se ten sa a shime pai nna nguë ineñ shi,
ku benga zha pa ineñ na sa kutadu napai dëneñf,
ineñ ja ska lë zhampulu jonfa shi bi sa ku nna paipai no djia shi ontolo a na bi sa kuta ineñ napai dëneñf.
Plomesa nna minadjimina Abraam
13 *Pakë Nashian plomëtë Abraam ku nna minadjimina dëli fa ineñ ske të mundu shimafan gagavu dëneñ,
mandji se plomesa na bi sa basu da ta a ja kumpli alëf,
shina da dëtu shi sa amea djustishi ku ja bi ku jonfa.
14 *Pakë shi nna nguë ineñ shi ske ta pa ma gagavu se sa nna nguë ineñ shi sa basu alë,
tadashi jonfa se ske sa shipë,
se plomesa Nashian na ske shivi da zhugan jaf.
15 Pakë alë ja bi ku jatigu,
mandji se ja ma ëli shi na ja të alëf,
na ten ja të zhugan ja tëjantu ku alëf.
16 *Dajantu shi,
se plomesa se ja bi amea jonfa sai,
valadji pa sa dajantu galasa,
pa sa suguladu da nna minadjimina Abraam tudu;
plomesa sai na ja sa da nna nguë ineñ shi sa basu alë mosof,
shina basu jonfa shimafan dji Abraam,
ku se sa pai no tudu.
17 Amea shi sa skividu:
«Amu pë bo pa bo sa pai uan sapa tela tela»,
deenchi Nashiolo,
ku se ëli këlë,
ku se ja da nna nguë mölidu vida,
se ëli ja sama jö ineñ shi na ja saf,
shimafan ja bi sa.
18 Ëli këlë alagada tëjantu ku alagada,
valadji pa ëli se sa pai uan sapa tela tela,
amea jö shi a bi bi faa ëli bebezha:
«Se sa amea shi nna minadjimina bo ske sa».
19 Se jonfa Abraam na ja vla ja levu ta ëli ja pa öguë dëlif,
ku bi sa shimafan ja ëli bi sa mölidu (ëli bi sa ku amea uan sentu danu),
ku a shime chia Sara ten bi sa mölidu bebezha.
20 Se ëli na da butanjafa ñi pëndë jonfa fo plomesa Nashianf,
shina jonfa dëli tan bi sa ödu mashi.
Se ëli da Nashiolo ilö,
21 ku uan këlë shishizhu fa Nashian të pödë valadji pa ëli kumpli jö shi ku ëli plomëtë.
22 Dajantu shi se a ma jonfa dëli shimafan jonfa dëtu.
23 Se sa jö shi fë ku Nashian bi bi jonta ku jö sai,
a na skëvë tëjantu ku Abraam mosof;
24 a ten skëvë dajantu no.
Pakë Nashian ten ja jonta jonfa no,
shi no ja këlë nguë shi se lanta Djisu,
Shiölö no,
25 ku se a bi da dajantu mölë pekadu no tudu ku ske lanta no fo mölë,
pa ëli fë no nna nguë dëtu.