Jonfa Nashiolo
3
Tadashi,
¿kë gavu të ta a ja sa judio ö a ja sa kutadu napai?
2 Uan sapa,
fo amea tudu.
Fo pimëlu jamian,
se nna judio se Nashian jonfa tuludöguë fala dëli.
3 Mandji se tadashi,
shi ja fata zhugan ineñ jonfa,
¿sa fa fata jonfa dëneñ ske bolo jonfa Nashiolo?
4 ¡Zhugan limedji shif!
Mandji se Nashiolo olatuvëdji sa vedadji,
se pöjödölö tudu ja da fanchila;
se amea shi sa skividu:
«A ske ja pia bo nguë dëtu da jö ineñ shi bo ja fala,
se bo ske ja ngana ta a ske juzhga bo».
5 Mandji,
shi fata djustishi no ja msa djustishi Nashiolo,
¿kë ja no ske fala?
¿Sa fa fata Nashian djustishi pa ëli ta pashian dëli pë liba no?
(Amu ska faa fala shimafan napai).
6 ¡Zhugan limedji shif!
Amea patadu,
¿kë amea shi Nashiolo ske paadji juzhga mundu?
7 Zhugan nguë bi paadji ja be ja faa:
«Mandji se shi fanchila shi amu ja da ja shivi pa vedadji Nashiolo ja ska panta panta ku gloria mashi,
¿jama fë a ja juzhga amu shimafan pekadölö?».
8 ¿Jama fë a na ja faa:
«Ja fë ja fë ja fëiu valadji pa ja gavu ja bif?».
Se sa amea shi zhugan nguë ja faa no fala pogogovan,
ja faa se sa jö ineñ no ja shina nguë.
¡Mandji se ineñ ja mësë kondena dëneñ gavu!
Na të zhugan nguë dëtuf
9 ¿A kë ja sa?
¿Sa fa no nna judio se gavu mashi ku nna utu nguë?
¡Zhugan limedji shif!,
pakë no msa fa nguë tudu,
fo nna judio shimafan nna nguë ineñ shi na sa judiof,
tudu sa basu pödë pekadu,
10 amea shi sa skividu dantu Fa Nashiolo:
«¡Na të zhugan nguë dëtufa,
ñi uan ponoduf!
11 Na të zhugan nguë ku tëndëmentuf;
na të zhugan nguë ku ja jua Nashianf.
12 Nna nguë tudu be jamangandji shi fëiu,
nguë tudu vla fë nna nguë fë ja masan masan.
¡Na të zhugan nguë ku ja fë ja gavuf!
¡Na të ñi uan ponoduf!».
13 «Dantu gochi dëneñ sa uan spitula ku sa betu,
se lunga dëneñ ja da fanchila».
«Se olaböjö dëneñ ja jöndë beneno jobolomatu».
14 «Se böjö dëneñ sa shia ku masan ku böjö sunzhu».
15 «Se ope dëneñ ja jölë dandjian pa ba jölë sangui.
16 Ja të ja të fea fea ku mavida se ja sa jamangandji dëneñ.
17 Se ineñ na ja jönsë jamangandji shi ja da nguë padjif».
18 «Se ineñ na ja da Nashian ondolof».
19 No sëbë fa jö ineñ shi lavulu dalë se ja fala,
ja faa tëjantu da nna nguë ineñ shi ja ta basu dëli,
valadji pa ineñ tudu ja jaböjö ku pa mundu nguintëlu nguintëlu ja pono da basu djustishi Nashiolo,
20 *pakë zhugan nguë na ske paadji faa ëli ja kumpli ku alë sai,
se Nashian ske ja jönsë ëli shimafan uan nguë dëtuf,
sa fa alë shivi pa ja msa no moso fa no sa pekadölö.
Kilitu sufli jatigu no
21 Mandji se öseshi,
se fo apachi dalë,
se Nashian ja msa no kë amea shi ku ëli ja fë pa no sa dëtu,
se jö ineñ se ja da lazhan alë se me ku dji nna pantafala:
22 *se amea jonfa shi a ja të ku Djisukilitu,
se Nashian ja fë nna nguë ineñ shi ja këlë dëli tudu sa nna nguë dëtu.
Pakë ëli na ja pia uan nguë mashi ku utu nguëf.
23 Pakë nguë tudu fë pekadu se ineñ tudu sa löndji fo deenchi gloria Nashiolo.
24 Mandji se Nashian,
dantu galasa dëli se ëli ja fë nguë dëtu dödji limpi pepepe,
amea Kilitu Djisu ku se fë pa no sa legadu.
25 Nashian fë pa Kilitu,
se sa saklifisu shi ku amea sangui dëli pa pada pekadu no tudu.
Se pekadu no ja sa padadu amea jonfa shi ja sa ku no.
Se amea sai se Nashian ngongo msa amea shi ëli ja fë pa no sa nguë dëtu ja pada pekadu ineñ shi no bi fë tudjia bebezha,
26 pakë ëli sa ku pashiensa.
Se ëli ja ngongo msa no tempu;
öseshi amea shi ëli ja fë no dëtu.
Amea sai Nashian sa dëtu,
se ëli ja msa nna nguë ineñ ja këlë Djisu dëtu.
27 ¿Kë jama,
këlëdöguë sa?
¡A ja chila folo!
¿Dajantu kë kuzhu?
Na sa dajantu ku a ja kumpli alëf,
shina dajantu a ja këlë.
28 Pakë no ja tëndë fa napai tudu sa dëtu dajantu jonfa dëli,
se na ja dajantu fidu jö ineñ shi alë ja ska pindjif.
29 ¿Sa fa Nashiolo sa Nashian nna judio moso?
¿Na ten sa Nashian nna nguë mundu nguintëlu nguintëlu ua?
Shiën,
se ten sa Nashian nna nguë na ja këlë Nashianf,
30 *pakë të uan Nashian soso,
se ëli se ja fë pa nna judio sa dëtu se nna nguë ineñ shi na sa judiofa sa dajantu amea jonfa dëneñ.
31 Tadashi,
¿ku jonfa se no chila foshi fo alë?
¡Zhugan limedji shif!
Se sa öshi no tan ja da alë pödë mashi.