Nashian ja juzhga amea vedadji
2
*Dajantu shi,
se na ja të ja pa bo faaf,
pakë bo ku ja juzhga utu nguë,
ja sa nguë shi bo sa.
Öshi bo ja juzhga utu nguë bo ja ska kondena tuludöguë bo me,
sa fa bo ten ja fë jö shime ku ineñ.
2 Mandji se no sëbë fa Nashian ja juzhga amea vedadji ta ëli ja kondena nna nguë ineñ shi ja fë ja amea sai.
3 Tëjantu ku bo,
ku ja juzhga utu nguë ku bo ten ja fë jö shime ku ineñ,
na mazhna fa bo ske paadji jölë fo kondena Nashianf.
4 Bo ku na ja pia gavu Nashian shi na ja jabaf shimafan uan ja gavuf,
ku pashiensa ku ngongo Nashiolo,
shinke ja da bo ötëndë fa gavu dëli se ja ma bo ba vla ku ope tashi.
5 Mandji se bo,
ku kusan ödu bo,
ku bo na ngongo chama fë pekaduf;
bo ska zhunta jatigu pë liba bo da djia shi sa dji pashian,
ta Nashian ske msa juisio dëtu dëli.
6 Pakë ëli ske da nguë tudu pagu dëneñ amea fidu ja dëneñ.
7 Ëli ske da vida chindadji nna nguë ineñ shi ja ska fë fidu ja gavu,
pakë amea sai se ineñ ja msa fa ineñ ska jua gloria ku ondolo ku pa ineñ na ten ja mölëf.
8 Mandji se ëli ske jatiga ku pashian nna nguë subebu,
nna nguë ineñ shi ja naga vedadji valadji pa ineñ ja ska fë ja fëfëiu.
9 Ske të suflimentu ku mavida da nna nguë ineñ shi ontolo ja ska fë ja fëfëiu,
fo nna judio pimëlu ku a shime nna nguë ineñ shi na sa judiof.
10 Mandji se Nashian ske da nna nguë ineñ shi ja ska fë ja gagavu gloria,
ondolo ku padji,
nna judio pimëlu ku a shime nna nguë ineñ shi na sa judiof.
11 Pakë Nashian na ja pia uan nguë mashi ku utu nguëf.
12 Nna nguë ineñ shi tudu ja fë pekadu,
shinke ineñ sa tave alë Moises,
ineñ ske mölë shin alë sai,
se nna nguë ineñ shi ja fë pekadu basu alë sai,
amea alë sai se a ske juzhga ineñ.
13 Pakë Nashian na ja pia nna nguë dëtu dajantu ku ineñ ja tëndë alë mosofa shina nna nguë ineñ shi ja kumpli.
14 Pakë ta nna nguë ineñ shi na sa judiof ñi na ja të alëf ku ja fë jö ineñ shi alë ja manda,
ineñ me,
se sa tuludöguë alë dëneñ,
15 pakë ineñ ja msa amea fë ja dëneñ alë shi sa skividu dantu kusan dëneñ.
Se tuludöguë kusan ja ska puva,
se ineñ ja sëbë fa sa gavu ö sa fëiu.
Se tuludöguë mazhnamentu dëneñ ske ja juzhga ineñ ja msa ineñ ta ineñ ja fë ja fëfëiu ö ja gagavu.
16 Dantu djia shi ku Nashian ske juzhga amea Kilitu Djisu,
ku se sa kumi vida nna pöjödölö amea evanjelio shi ku amu ja pegua.
Nna judio ku alë Moises
17 Bo ja sama tuludöguë bo judio,
se bo ja jonfa alë Moises,
se bo ja ska këlëdöguë bo fa bo sa ku Nashiolo.
18 Bo ja jönsë vintadji dëli,
se alë ja shina bo pa bo ja sëbë amea shi pa da aen da jö shi gavu mashi.
19 Bo ja sa suguladu fa bo ja fo msa nna nguë sebu jamian,
se bo ten sa fögö djidjidu da nna nguë ineñ shi ja sa jamian kulu;
20 se bo faa bo ja paadji shina nna nguë buiadu kuzhu ku bo ten ja sa meeth nna nguë shipë,
dajantu ku dantu alë bo të amea tëndëmentu ku dji vedadji.
21 Öseshi sa fa,
shi bo ja shina utu nguë kuzhu,
¿jama fë bo na ja ska shina tuludöguë bo mef?
Shi bo ja ska pegua fa pa na ja futaf,
¿jama fë bo ja ska futa?
22 Shi bo ja faa pa na ja kabajölöiöf,
¿jama fë bo ja ska kabajölöiö?
Shi bo ja ska të pashian nna nashian balu,
¿jama fë bo ja ska futa ja gagavu fo jadji nashian dëneñ?
23 Bo ja ska këlëdöguë bo dajantu alë,
mandji se bo na ja da Nashian ondolof,
pakë bo na ja tëndë jö shi alë ja faaf.
24 Ku dëtu se Fa Nashian ja faa:
«Namu Nashiolo ja sa zhogoveadu dantu nna nguë ineñ shi na ja këlë Nashianf».
25 Sa vedadji fa,
ja sa nguë shi ja tëndë alë Moises,
kuta napai ja shivi ëli da uan kuzhu.
Mandji se shi bo na ja tëndëf,
sa shimafan ja bo na sa kutadu napai bof.
26 Se nna nguë ineñ shi na sa kutadu napai dëneñf ku ja ska gada jö ineñ shi sa dantu mandatu alë,
a ske ja bë ineñ shimafan nna nguë kutadu benga pa ineñ na ja sa kutaduf.
27 Nguë shi ja këlë alë,
benga zha pa ëli na ja sa kutadu napai dëlif,
ëli ske paadji juzhga nguë shi ja kabela alë benga zha pa ëli të alë skividu ku pa ëli ten sa kutadu napai dëli.
28 Pakë pa sa judio na sa fo pachi döluia mosofa,
ku pa ten sa kutadu napai fo pachi döluia döguë mosof,
29 shina nguë shi sa judio shishizhu ten ja sa kutadu napai fo dantu döguë dëli,
ku sa dji kusan:
na ja sa skividu dajantu alëfa,
shina fo Spitu Nashiolo,
se nguë shi ja sa shi,
se ja sa nguë shi ja sa gavu,
na ja sa aen fo napaifa,
shina fo Nashiolo.