EPISTOLA KU SAN PELAVÖL SKËVË DA NNA NGUË
ROMA
Manten
1
Pelavöl,
shividölö Kilitu Djisu,
ku Nashian se sama ëli valadji pa ëli sa apostol,
ku a safa ëli valadji pa ëli pegua evanjelio Nashiolo.
2 Ku amea nna pantafala dëli se ëli bi plomëtë evanjelio sai tempu baezha dantu Fala Santu Nashiolo.
3 Se evanjelio sai ja faa ja tëjantu ku Mina dëli,
ku bi sa minadjimina alë David amea zhenchi nna pöjödölö,
4 se a msa fa ëli se sa Mina Nashiolo ta a lanta ëli bi vida fo dantu nna nguë mölë bebezha amea pödë Spitu shi ku sa santu.
Ëli se sa Djisukilitu Shiölö no.
5 Se amea Djisukilitu se no të ondolo shi pa amu sa apostol,
pa no shivi shimafan shividölö dëli,
valadji pa dantu tela tela tudu ja të nguë pa ja këlë ku ja tëndë ëli ku se pa ja da namu dëli gloria.
6-7 Ku dantu ineñ se ten sa namsëdji,
ku ja ta Roma.
Nashian ngongo ku namsëdji,
se ëli sama namsëdji pa namsëdji sa dji Djisukilitu ku pachi pövu santu.
Pa Nashian Pai no ku Shiölö Djisukilitu ta galasa ku padji dëneñ pë liba namsëdji.
Fidu kuzhu ku galasa
8 Fo pimëlu pimëlu,
se amu ja da Nashian dezhupaga,
amea Djisukilitu;
dajantu namsëdji tudu,
pakë dantu mundu tudu ja sa ku monova amea jonfa namsëdji.
9 Nashian,
ku se amu ja shivi ku spitu amu tudu ja ska pegua evanjelio Mina dëli,
se ëli sëbë gavu fa jasa amu ja da namsëdji olatuvëdji dantu lezha amu.
10 Se amu ja pindji Nashian dantu lezha amu ja faa,
shi se ja sa vintadji dëli,
ëli ja lega amu pa amu paadji ba bë namsëdji.
11 Pakë amu dishia pa amu ba bë namsëdji valadji pa amu ma uan ja gavu dödji fo spitu ba da namsëdji,
pa namsëdji vla ödu mashi,
12 sa fa,
valadji pa no no me ma añimu ku jonfa se sa ku namsëdji ku no ten të iai.
13 *Amu ngongo pa namsëdji sëbë,
nna namain,
fa uan sapa vëdji se amu ja mazhna pa amu ba bë namsëdji,
mandji se bi toja öseshi amu ja ska të ja ku na ja lega amuf.
Dishamentu amu sa pa amu totolo zhugan fuluta spitu dantu namsëdji,
amea shi amu ten totolo dantu nna nguë na ja këlë Nashianf.
14 Amu ja sinchi fa amu sa ku deuda ku nna nguë tudu,
ja sa nguë sëbë kuzhu ö nguë na sëbë zhugan jaf,
nna sëbëdölö ku nna nguë buiadu,
15 dajantu shi se amu sa ku uan dishamentu ngandji pa amu ba pegua evanjelio a shime da namsëdji ku ja ta Roma.
16 *Amu na ja të govan evanjeliof,
pakë sa pödë Nashiolo valadji pa nna nguë ineñ shi ja këlë tudu ja të savasan,
nna judio pimëlu,
ku a shime ku nna nguë ineñ shi na sa judiof.
17 Pakë evanjelio ja msa no amea shi Nashian ja fë no dëtu:
sa dajantu jonfa shi,
sa fo jomesadu ba toja jabamentu.
Se sa amea shi sa skividu:
«Nguë shi dëtu ske ja bibe amea jonfa».
Mundu nna nguë shin Kilitu
18 Pakë Nashian ja msa pashian dëli fo ösë ja da nna nguë fëfëiu ku nguë ja fë ja masan masan tudu jatigu,
ku ja fëfëiu dëneñ se ineñ ja pë vedadji topu.
19 Jö ineñ shi a ja paadji jönsë fo Nashian tudu,
ineñ ja jönsë gavu,
pakë tuludöguë dëli me,
se ja msa ineñ;
20 pakë jö ineñ shi a na ja bëf fo Nashiolo ku a ja paadji jönsë,
öshi a ja mazhna jö shi ku ëli fë.
Se sa fa,
fo djia shi a mindji mundu,
se a ja bë gavu fa ëli se sa Nashiolo se ëli të pödë chindadji.
Dajantu shi se nna nguë fë ja fëfëiu na ja të ja pa ineñ faaf.
21 *Pakë benga zha pa ineñ jönsë Nashiolo,
ineñ na da Nashian gloriafa ñi ineñ na ja da ëli dezhupagaf.
Shina,
ineñ ja ska mazhna ja sono sono,
se kusan danadu ineñ ja vla fë jamian kulu.
22 Ineñ ja ska faa ineñ sa sëbëdölö,
mandji se ineñ tudu ja vla fë nna nguë danadu;
23 pakë ineñ ja tuka gloria Nashian shi na ja mölëf da fesan nna napai ku ja mölë;
ku ba toja fesan paatu,
ku nna limaia ku ja të ope jatulu ku ineñ shi ja sea öguë dëneñ san.
24 Dajantu shi,
se Nashian lega ineñ ku dishamentu kusan fëfëiu dëneñ,
se ineñ ja fë ja sunzhu dëneñ ku ineñ ineñ me ku utu ja govan ku öguë dëneñ me.
25 Se ineñ tuka vedadji Nashiolo,
ku fanchila,
se ineñ na ja adolafa ñi ja da jö ineñ shi Nashian mindji ondolof,
mandji se ineñ na ja da tuludöguë Nashian shime ku se mindji ja tudu ondolofa ku ëli se mësë besa pa sempele.
Amen.
26 Dajantu shi se Nashian lega ineñ ku dishamentu masan masan dëneñ.
Ba toja ku nna naamain dëneñ tuka zhuntadu shi shishizhu ku sa dji naamain ku napai ku i shi ja da ineñ vintadji,
ja zhunta naamain ku naamain,
27 se ten sa amea shime,
ku nna napai lega zhuntadu shi shishizhu naamain ku napai,
se ineñ ja sa ku dishamentu fëfëiu ineñ ku utu ineñ me.
Se napai ku napai ja fë ja masan masan,
se ineñ me se ske ma jatigu shi ineñ ja mësë dajantu masan dëneñ.
28 Se ta ku ineñ na bi ngongo jönsë Nashianf,
se Nashian lega ineñ ku mazhnamentu masan masan dëneñ,
valadji pa ineñ ja ska fë jö ineñ shi ineñ na ta pa ineñ ja fëf.
29 Se ineñ sa shia klase ja fëfëiu tudu,
kabajölöiö,
pekadu,
pashian chila nguë vida folo,
ngaña nguë,
nna nguë ja pezha,
gaga uan nguë ba da utu nguë.
30 Ineñ ja lo nguë mali,
ineñ ja sa nna namigu Nashiolo,
tividu,
subebu,
këlëdöguë dëneñ,
ineñ ja jua ja fëfëiu pa ineñ ja fë,
ineñ na ja tëndë pai dëneñf,
31 ineñ na ja ngongo tëndë nguëf,
na ja kumpli ku zhugan jaf,
na ja ngongo të padji ku zhugan nguëf,
na ja të mindjikodjif.
32 Ineñ sëbë gavu fa amea dëtu mandatu Nashiolo,
nna nguë ineñ shi ja fë fidu jö ineñ sai ineñ ja mësë mölë,
mandji se ineñ,
na ja chama fë fidu jö ineñ sefa,
shina ineñ ten ja da aen da nna nguë ineñ shi ja ska fë iai.