Da apostol Pelavöl ja fë gavu ta ëli ja ska skëvë jaata da guëzha guëzha nna kitan tempu dëli. Jativie jaata sai se sa i shi fumözhö mashi, i shi ku ëli skëvë ku ëli da ba nna namain ngongodu guëzha shi ku ja ta Roma (1:1).

Fala sai ku utu fala mashi ja fë pa msa fa Pelavöl djia shi ëli bi ska skëvë jaata sai, ëli na bi ska mazhna pa ëli skëvë lavulu shina nguë jaf, shina pa ëli bi ska da lazhan ku nna namain dëli kitan. Mandji se dajantu ngongo shi sa ku ëli ku Nashiolo ku a shime dajantu ineñ, ku amea shi ku ëli ten jönsë Fa Nashiolo se fë ku jaata dëli ineñ sai vla fë fejaata shina ja ödu da nna kitan.

Shina ja shi sa liba mashi dantu ineñ sa fa «monova gavu ja shina no Fa Nashiolo fa Nashian ja ma nna nguë ineñ shi ja këlë Djisu», ku sa fa nguë dëtu ske bibe amea jonfa (1:17).

Pelavöl bi sa judio, dajantu shi se ëli ja faa fala shimafan judio, mandji se ëli ja skëvë da nna nguë ku ja sa zhuntadu ku nna kitan judio ku dji utu tela tela. Mandji se ëli ja faa ku ineñ shimafan uan judio kitan. Ku Biblia faladu pë öma dëli se ëli ja shina ineñ fa ngongo Nashiolo ten ja ma nna nguë ineñ shi na sa judiof, mandji se ëli ja da ineñ lazhan fa jö sai ja paadji fë amea jonfa Djisukilitu, ku na ja sa amea kumpli alë Moises mosof (2:17–3:31).

Pelavöl ja jaba jaata sai ja da uan sapa nna namain kitan manten, ku namu dëneñ, ja lezha da ineñ: «¡A Nashiolo, ëli shi sa ponodu ku sëbëdölö, pa gloria sa ku ëli pa sempele amea Djisukilitu! Amen» (16:27).