Pelavöl sa ië Malta
28
Ta no bi sa savadu,
se no ba sëbë fa ië sai a ja sama Malta.
2 Se nna nguë ië sai fë lazhan no gavu,
pakë ineñ sëndë uan taba fögö se ineñ sama no tudu pa ba lome dëneñ,
pakë aua bi ska da se ten bi ska fë fiiu.
Hechos 28.1-14
3 Tadashi,
se Pelavöl bi totolo zhugan öpa ñia se ta ëli bi ska ta ba fögö se uan jobolomatu ku bi ska jölë da kenchi fögö,
se pindja pë öma dëli.
4 Se ta nna nguë ië se bë amea shi jobolomatu sai pindjadu pë öma Pelavöl,
se ineñ faa:
«Ja fo sa fa masebu se sa uan nguë chila nguë vida folo,
ku benga zha pa ëli sava fo mölë omali,
djustishi na ska lega pa ëli bibef».
5 Mandji se Pelavöl sugudji öma dëli se jobolomatu se pono da fögö,
se zhugan ja na fë ëlif.
6 Se ineñ tudu bi ska gada pa ëli vla fumadu,
ö pa ëli pasala pono da san mölidu öshi öshime,
ta ineñ tudu tëpë uan böjö tempu,
ku ineñ bë fa zhugan ja fëiu na shiga ëlif,
se ineñ tuka mazhnamentu se ineñ faa Pelavöl sa uan nashiolo.
7 Se lome jamian sala bi sa ku uan matu ku shiölö dëli bi sa uan nguë dondolo liba ië sai,
ku a ja sama ëli Publio,
se ëli fë lazhan no se ëli ten tëndë ku no gavu dantu tëishi djia ineñ sai.
8 Se bi fë se pai Publio bi sa jaama,
ja danchi ku fibil ku chipa lolodu.
Se Pelavöl lantela ba ua ëli,
se ta ëli ten lezha da ëli,
se ëli pë öma öma liba dëli se ëli kula ëli.
9 Ta ëli fë jö sai,
se a shime utu nna nguë liba ië sai ku bi ska danchi,
ineñ bi ska bi,
se ineñ bi sa kuladu.
10 Se ineñ ten da no ondolo ku uan sapa kuzhu;
se ta no lantela navian se ineñ da no jö ineñ shi fë no fata tudu.
Pelavöl ba da Roma
11 Ta pasa tëishi mëdji ku no sa ië sai,
se no ma uan navian Alejandria ku pasa tempu fiiu ala,
ku bi sa ku fesan namu nna nashian balu Kastor ku Poluks.
12 Se no ba da Sirakusa,
se no mdja ala tëishi djia.
13 Fo ala,
se no pasa bodo bodo,
se no ba da Rejio.
Ta da amaian shi se lanta uan oventu fo bosai,
se ta da djia shi fë dösu se no ba da Poteoli.
14 Ala se no dajonta ku zhugan nna namain,
se ineñ pindji no pa no mdja uan sumanu ku ineñ.
Zha se no ba da Roma.
15 Se nna namain Roma,
ta ineñ bi tëndë nova tëjantu ku no,
se ineñ së bi ma no ba toja Foro dji Apio ku Tres Tabernas.
Se ta ëli ba bë ineñ,
se Pelavöl da Nashian dezhupaga se ëli tan ma añimu.
Hechos 28.15-31
Pelavöl ja pegua Roma
17 Ta pasa tëishi djia,
se Pelavöl manda sama jasa jasa nna judio,
se ta ineñ bi sa zhuntadu,
se ëli faa ineñ:
—Amu,
nna namain amu,
amu na fë zhugan ja fëiu tëjantu ku pövufa ñi tëjantu ku kutumu nna paipai nof.
Mandji se a të amu ba djili fo Jerusalen ba öma nna nguë roma.
18 Se ineñ,
ta golo golo amu jaba,
se ineñ bi ngongo sota amu dajantu ku ineñ bë fa na të zhugan ja fëiu pa amu mësë mölëf.
19 *Mandji se nna judio pöpa,
se fë ku afoshi ku bi ta pa amu pindji pa Sesar tëndë amu,
mandji se na sa dajantu ku amu bi të zhugan ja tëjantu ku tela amuf.
20 Dajantu jö sai se fë ku amu sama namsëdji valadji pa amu bë namsëdji pa amu ten faa ku namsëdji,
pakë dajantu alagada Israel se amu sa maladu ku guian sai.
21 Tadashi se ineñ kundji ëli:
—No na sa bë zhugan jaata fo Judea ku ja tëjantu ku bof,
ñi zhugan nna namain na sa fo ala bi ku zhugan lazhan fëiu ö ku a faa ja fëiu tëjantu ku bof.
22 Mandji no ngongo tëndë fo bo jö shi bo ja mazhna,
pakë no sëbë fa jamian tudu a ja da lazhan fëiu tëjantu ku nna nguë uachi sai.
23 Tadashi se ineñ jua uan djia,
se uan sapa dëneñ bi toja ëli jamian shi ku dëli ja ta.
Se fo pamasedu ba toja tetadji,
se ëli bi ska da ineñ lazhan gavu ja gövöndölö Nashiolo,
ja ska shina ja tëjantu ku Djisu,
ja jomesa fo alë Moises ku a shime ku dji nna pantafala.
24 Se zhugan ineñ bi ja këlë jö ineñ shi ku ëli bi ska fala,
mandji se utu na bi këlëf.
25 Se ta ineñ na paadji tëndë ineñ ku ineñ mef,
se ineñ jomesa ja bai,
se Pelavöl faa ineñ fala sai:
«Spitu Santu faa ja gavu ku nna paipai namsëdji amea pantafala Isaias,
ja faa:
26 “Ba toja pövu sai pa bo faa ëli:
Benga zha pa ja tëndë ku olea,
namsëdji na ja ske ja tëndëf,
se benga zha pa ja bë ku öiö,
namsëdji na ske ja bë jaf.
27 Pakë kusan pövu se vla ödu bebezha;
se olea dëneñ sa tapadu,
se öiö dëneñ sa tapadu.
Valadji pa ineñ na ja bë ja ku öiöfa,
pa ineñ na ja tëndë ja ku oleafa,
pa ineñ na ja tëndë ja ku kusanf,
pa amu kula ineñf”.
28 »Ta pa,
namsëdji sëbë fa,
da nna nguë ineñ shi na sa judiof se Nashian da savasan sai bi da,
se ineñ ske tëndë».
29 Se ta ëli faa ineñ jö se jaba,
se nna judio tan bai dëneñ,
ja të pufia ngandji dantu dëneñ me.*+
30 Se Pelavöl mdja ala dösu anu ntëlelele dantu uan jadji ku a bi ja da pagu,
se ëli bi ska tëndë ku nna nguë ineñ shi bi ska toja ëli.
31 Se ëli bi ska pegua amea gövöndölö Nashiolo ja shina nguë ja tëjantu ku Shiölö Djisukilitu,
amea betu shinke zhugan nguë pë ëli öpa.
Hechos - conclusión