3 Ta da amaian shi,

se no ba da poto Sidon,

se jatan Julio tëndë ku Pelavöl gavu,

se ëli lega ëli pa ba bë nna jamada dëli,

valadji pa ineñ tëndë ku ëli.

4 Se ta no së fo Sidon,

se no ma navian ba da Chipre pakë oventu ineñ se bi ska ligui da no.

5 Se no be bodo bodo tela Silisia ku Panfilia,

se no njola Mira,

uan palea Lisia.

6 Se ala se feshali dajonta ku uan navian nna nguë alejandria ku bi ska Italia,

se ëli fë pa no subili.

7 Dantu uan sapa djia se navian bi ska bë mole mole,

se apudjimidu se no ba da deenchi Knido.

Pakë oventu na bi ska lega nof,

se no da voto ië Kreta,

deenchi Salmona.

8 Se no bai ku tavadji monchi lome bodo bodo se no ba da uan jamian ku a ja sama Poto Gagavu lome palea Lasea.

9 Se a bi pëndë uan sapa tempu,

se ten bi sa uan tempu fëiu pa be ku navian,

dajantu ku a bi pasa fesa zhedu böjö bebezha.

Se fë ku Pelavöl bi faa ineñ:

10 «Nna masebu,

amu bë fa vadji no ske sa uan vadji fëiu se no ske pëndë uan sapa kuzhu,

ku na sa jalga ku navian mosofa,

shina da tuludöguë vida no».

11 Mandji se feshali tëndë shiölö navian ku jatan navian mashi ku jö shi Pelavöl bi ska fala.

12 Se ta poto sai na bi sa gavu pa ineñ pasa tempu fiiu alaf,

se nguë tudu faa pa be deenchi,

ku alagada pa ba da Fenise,

uan poto domali Kreta ku ja da benda dji liba ku benda basu,

ku pa pasa tempu fiiu ala.

13 Se ta uan gavina masu jomesa ja föfö fo bosai,

se ineñ bi këlë fa ineñ bi fo të jö shi ineñ bi dishia,

se amea sai se ineñ subili onjolo se ineñ be ja pasa bodo bodo ië Kreta.

14 Mandji se na pasa tempu löngöf se uan oventu ku tavada ku a ja sama Euroklidon ku bi ska bi fo ië sa fa ja ligui da navian.

15 Se jomesa ja sea navian,

se no na paadji fenka navian ku oventu sef,

se amea sai se no lega pa ëli ma no bai.

16 Se no pasa tashi uan mina ië ku a ja sama Kauda,

ala se oventu na bi ska föfö ku foshif,

se apudjimidu se no bi paadji mala batelu sava vida.

17 Se ta ineñ subili ëli ba liba navian,

se ineñ mala ku jodo lizhu pa fë foshi pë ëli,

se ta ineñ bi ska mendu pa ineñ paka pë mampuna dalea ku a ja sama Sirte,

se ineñ ta mëmë onjolo se ineñ lega pa oventu sea ineñ bai.

18 Ta da amaian shi,

se tavada tan ba ödu mashi,

se fë ku no jomesa ja zhuga jalga tudu ba omali,

19 se ta da tëishi djia,

se ineñ zhuga vadu ja navian tudu ba omali ku öma dëneñ.

20 Se pasa uan sapa djia shinke a tan bë solo ñi ntëla,

se ku taba tavada sai ku bi ska föfö pë no iai se no tudu pëndë alagada fa no ske sava.

21 Tadashi se ta no bi pasa tempu löngö shin kumu,

se Pelavöl ta mdjadu metadji nguë tudu se ëli faa:

«Nna masebu,

bi ta pa namsëdji tëndë amu pa no na së fo ië Kretaf,

amea sai se no ja gada ja fëiu sai ku jö ineñ se no pëndë iai.

22 Mandji se öseshi se amu ska faa pa namsëdji ma añimu,

pakë zhugan namsëdji na ske pëndë vida namsëdjif,

shina navian moso se a ske pëndë.

23 Pakë nöchi sai se uan anzhu Nashiolo shi amu sa nguë dëli ku amu ja shivi iai,

24 se faa amu:

“Pelavöl,

na menduf,

pakë ta pa bo ba deenchi Sesar,

se fë ku Nashian da bo vida nna nguë ineñ shi ska bai ku bo dantu navian se tudu”.

25 Dajantu shi,

nna masebu,

ma añimu,

pakë amu jonfa Nashian fa jö ineñ se tudu ske shiga amea shi ëli faa amu.

26 Mandji se,

ske ta pa no paka pë liba uan ië».

27 Ta no pasa uan deshi nöchi ku jatulu mete domali Adriatiko se ta da mete nöchi ku nna maliëlu ba sëbë fa no sa peetu ku san.

28 Se ineñ mindji amea shi fundu dëli bi sa,

se ineñ dajonta fa sa ku zhugan deshi tëishi ku metro sëishi jamian fundu.

Ta ineñ tan bai deenchi mashi,

se ineñ tan vlame mindji me,

se ineñ bë fa bi sa ku amea vinta seta metro fundu.

29 Se no bi ska mendu pa na ba ligui da lapa,

se a ta onjolo jatulu pë olalöba se a jomesa ja lezha pa pamasedu bla.

30 Tadashi se nna maliëlu bi mazhna pa ineñ jölë fo navian,

se ineñ jomesa ja ta batelu sava vida ba omali,

ja fë shimafan ja ineñ ska ta onjolo fo jasa navian.

31 Mandji se Pelavöl ba da feshali ku nna sodadji lazhan:

«Shi nna nguë ineñ se na ja mdja dantu navianf,

namsëdji na ten ske paadji savaf».

32 Tadashi se nna sodadji pota jodo shi a bi mala batelu sava vida se ineñ lega ba omali.

33 Ta da mazhugadu,

se Pelavöl da ineñ nguë tudu añimu pa nguë tudu kumu.

Ja faa ineñ:

«Ödjai se da kindjia jamian shi ku nguë tudu ska mazhna jö shi ske pasa,

se ontolo namsëdji na sa kumu zhugan jaf.

34 Dajantu shi,

amu luga namsëdji pa kumu uan kuzhu,

pakë fë namsëdji fata valadji pa bibe.

Zhugan namsëdji na ske pëndë ñi uan pono jabelu fo jasaf».

35 Ta ëli faa jö se jaba,

se ëli ma ampan se ëli da Nashian dezhupaga deenchi nguë tudu.

Zha se ëli pachi se ëli jomesa ja kumu.

36 Tadashi se nguë tudu ten ma añimu se ineñ ten jomesa ja kumu.

37 No ku nna pöjödölö ineñ shi bi sa dantu navian sai bi sentu dösu ku deshi seta ku sëishi.

38 Ta nguë tudu kumu jö shi ineñ paadji kumu,

se a ta tulugu ba omali valadji pa navian fo sa levu mashi.

39 Ta pamasedu bla,

se ineñ na bi jönsë san telaf,

mandji se ineñ bë uan iöjö jamian ku bi sa ku lalea,

se ala se ineñ jua uan jamian se ineñ mëtë navian pë.

40 Se ineñ pota jodo onjolo,

se ineñ lega pa pono da omali,

se ineñ ten fojo jodo ineñ shi bi sa olalöba.

Zha se ineñ lega se oventu föfö pë vela shi ja ta jasa navian,

se ineñ ba lalea.

41 Mandji se navian ba jaia pë liba uan mampuna alea se paka pë.

Se jasa navian paka pë dantu alea,

se sa öshi pukulu domali bi ska ligui da labu navian ku foshi.

42 Tadashi se nna sodadji ba mazhna pa ineñ chila nna djilima tudu vida folo,

valadji pa zhugan ineñ na jölë ja da patapataf.

43 Mandji se feshali,

ku bi ngongo sava Pelavöl,

na lega ineñ pa ineñ fë jö sef.

Se ëli da odji pa nna nguë ineñ shi sëbë da patapata pa sata pimëlu ba omali pa ineñ ba san tela,

44 pa utu nguë vada liba gachi taaba ö gachi navian.

Se amea sai se no tudu ba da san tela se no tudu sava.